ലോകത്തിലെ ഏറ്റവും പ്രഹരശേഷിയേറിയ ആണവേതര ആയുധങ്ങളില് ഒന്നായ സെബെക്സ് 2ന് ഇന്ത്യന് നേവി അംഗീകാരം നല്കി. സാധാരണയായി ഉപയോഗിച്ചു വരുന്ന ട്രൈനൈട്രോടൊലുവിനേക്കാള് (ടിഎന്ടി) രണ്ട് മടങ്ങ് മാരകമാണ് സെബെക്സ് 2. പോര്മുനകളുടെ ഭാരം വര്ദ്ധിപ്പിക്കാതെ പ്രഹരശേഷി കൂട്ടുക എന്ന ലക്ഷ്യത്തോടെയാണ് സെബെക്സ് 2 നിര്മിച്ചിരിക്കുന്നത്.
എക്ണോമിക് ടൈംസിന്റെ റിപ്പോര്ട്ട് പ്രകാരം, പുതുതായി രൂപകല്പ്പന ചെയ്ത സെബെക്സ് 2വിന്റെ പരീക്ഷണം നേവിയുടെ ഡിഫന്സ് എക്സ്പോര്ട്ട് പദ്ധതിയില് ഉള്പ്പെടുത്തി പെട്ടെന്ന് നടത്തുകയായിരുന്നു. നാഗ്പൂര് ആസ്ഥാനമായി പ്രവര്ത്തിക്കുന്ന സോളാര് ഇന്ഡസ്ട്രീസിന്റെ ഉപസ്ഥാപനമായ എക്കണോമിക് എക്സ്പ്ലോസീവ് ലിമിറ്റഡാണ് സെബെക്സ് 2 അടക്കം മൂന്ന് പുതിയ സ്ഫോടക വസ്തുക്കള് രൂപകല്പ്പന ചെയ്തിരിക്കുന്നത്.
പ്രതിരോധ മേഖലയിലെ 'ആത്മ നിര്ഭരതയിലേക്കുള്ള' ചുവടെന്ന് എക്സില് കുറിച്ചു കൊണ്ടാണ് ഇന്ത്യന് നേവിയുടെ വക്താവ് സെബെക്സ് 2നെ രാജ്യത്തിന്റെ ആയുധപ്പുരയിലേക്ക് സ്വീകരിച്ചത്.