കോഴിക്കോട്: കക്കോടിയിൽ മതിലിടിഞ്ഞ് അപകടം. മതിലിനടിയിൽ കുടുങ്ങിയ ഇതര സംസ്ഥാന തൊഴിലാളിക്ക് ദാരുണാന്ത്യം. ഒഡീഷ സ്വദേശി ഉദയ്മാജിയാണ് മരിച്ചത്. അപകടത്തിൽ ഇയാളുടെ തലയ്ക്ക് ഗുരുതരമായി പരിക്കേറ്റിരുന്നു.
ഇന്ന് രാവിലെ പത്തരയോടെയാണ് അപകടമുണ്ടായത്. മറ്റൊരു മതിൽ കെട്ടാനായി മണ്ണെടുത്തപ്പോൾ മുൻപുണ്ടായിരുന്ന മതിൽ മറിഞ്ഞുവീഴുകയായിരുന്നു. രണ്ട് പേർ മതിലിനടിയിൽ പെട്ടിരുന്നു. ഒരാളെ നിസാര പരിക്കുകളോടെ രക്ഷപ്പെടുത്തി. മതിലിനടിയിൽ കുടുങ്ങിയ ഉദയ്മാജിയെ രക്ഷിക്കാൻ നാട്ടുകാർ ശ്രമിച്ചെങ്കിലും സാധിച്ചില്ല.
പിന്നാലെയാണ് ഫയർഫോഴ്സ് സ്ഥലത്തെത്തിയത്. ഗുരുതരമായി പരിക്കേറ്റ ഇയാളെ കോഴിക്കോട് മെഡിക്കൽ കോളേജ് ആശുപത്രിയിലേക്ക് മാറ്റിയെങ്കിലും ജീവൻ രക്ഷിക്കാനായില്ല.