കേരളത്തിൽ എയിംസ് സ്ഥാപിക്കുന്നതിനായി കോഴിക്കോട് കിനാലൂരിൽ സംസ്ഥാനം നിർദ്ദേശിച്ച സ്ഥലത്ത് സാധ്യതാ പഠനം നടത്താൻ കേന്ദ്രത്തിന് ഹൈക്കോടതിയുടെ നിർദേശം.സംസ്ഥാന സർക്കാർ പ്രതിനിധികളുമായി ഏകോപിപ്പിച്ചുകൊണ്ടാവണം ഈ പഠനം നടത്തേണ്ടത്. ഭൂമിയുടെ കാര്യത്തിൽ മാനദണ്ഡങ്ങൾ പാലിക്കുന്നുണ്ടോ എന്ന കാര്യത്തിൽ വ്യക്തത വരുത്തണമെന്നും കോടതി ആവശ്യപ്പെട്ടു.
ഇക്കാര്യത്തിൽ ഫെബ്രുവരി 25 നു മുമ്പ് കേന്ദ്ര ആരോഗ്യ സെക്രട്ടറിയുടെ മറുപടി കേന്ദ്ര ആരോഗ്യ-കുടുംബക്ഷേമ മന്ത്രാലയം സത്യവാങ്മൂലം നൽകണമെന്നും ഹൈക്കോടതി അറിയിച്ചിട്ടുണ്ട്. എയിംസ് സ്ഥാപിക്കുന്നതിനായി സംസ്ഥാന സർക്കാർ കണ്ടെത്തിയിരിക്കുന്ന സ്ഥലം മാനദണ്ഡങ്ങൾ പാലിക്കുന്നതാണോ എന്ന് ഉറപ്പു വരുത്തുന്നതിനാണ് നിർദേശം.