സംസ്ഥാനത്തെ യുഡിഎഫ് ഭരണം സംഘപരിവാറിന് വെടിമരുന്ന് ഉണക്കാനുള്ള സമയമെന്ന് സിപിഐഎം സംസ്ഥാന സമിതി അംഗം പി ജയരാജൻ. കേരളത്തെ ബിജെപി ഭരണത്തിലേക്ക് എത്തിക്കാനുള്ള നീക്കമാണ് നടക്കുന്നത്. ഹൈന്ദവ ആരാധനാലയങ്ങളെ ഹിന്ദുത്വ പ്രചാരണ കേന്ദ്രമാക്കി മാറ്റുന്ന സംഘപരിവാർ വിശ്വാസികളെ വർഗീയവത്കരിച്ച് അണികളാക്കാൻ ശ്രമം നടത്തുകയാണെന്നും ജയരാജന് ആരോപിച്ചു.
ശ്രീനാരായണ ഗുരുവിനെ ഹിന്ദു സന്യാസി ആക്കുന്നവർ ശിവഗിരി മഠത്തെ കയ്യടക്കാൻ ശ്രമിക്കുകയാണെന്ന് ജയരാജൻ കുറ്റപ്പെടുത്തി. വർഗീയ പ്രചാരണങ്ങൾക്കെതിരെ ജനങ്ങളെ ഉണർത്തിക്കൊണ്ടിരിക്കുക എന്നതാണ് കമ്മ്യൂണിസ്റ്റ് പ്രസ്ഥാനങ്ങൾ ചെയ്യേണ്ടത്. ന്യൂനപക്ഷ വിഭാഗങ്ങൾക്കിടയിലും വർഗീയശക്തികൾ സമാനമായ പ്രവർത്തനമാണ് നടത്തുന്നതെന്നും ജയരാജൻ കൂട്ടിച്ചേര്ത്തു. സനാതനികളുടെ ഹിന്ദുത്വ വഴികൾ, സംഘർഷങ്ങളുടെ രാഷ്ട്രീയ വഴികൾ എന്നീ പുസ്തകങ്ങളുടെ പുതിയ പതിപ്പുകൾ പ്രകാശനം ചെയ്യുന്ന വേദിയിൽ സംസാരിക്കുകയായിരുന്നു അദ്ദേഹം.