തിരുവനന്തപുരം: തിരുവിതാംകൂർ ദേവസ്വം ബോർഡിന്റെ ക്ഷേത്ര ഭരണസമിതികളിലും പ്രവർത്തനങ്ങളിലും പുതിയ മാറ്റങ്ങൾ വേണമെന്ന് പ്രസിഡന്റ് കെ. ജയകുമാർ. സമയത്ത് ഒരു കാര്യം ചെയ്യാൻ പറ്റാത്തതാണ് ദേവസ്വം ബോർഡിന്റെ ഏറ്റവും വലിയ പരാജയം. പണം ഇല്ലാത്തതല്ല കാര്യക്ഷമമായി അത് ഉപയോഗിക്കാൻ കഴിയാത്തതാണ് പ്രശ്നമെന്നും തിരുവിതാംകൂർ ദേവസ്വം ബോർഡ് പ്രസിഡന്റ് പറഞ്ഞു.
ഇരുപതിനായിരം രൂപയുടെ പണി 5 ലക്ഷം രൂപ ആയാലും തീരാത്ത അവസ്ഥയാണ്. എങ്ങനെയൊക്കെയോ വന്നുപോയ സംസ്കാരമാണ്. അത് മാറ്റാൻ ശ്രമിക്കുന്നുണ്ടെന്നും കെ. ജയകുമാർ പറഞ്ഞു. നേരത്തേ ഏറ്റുമാനൂരിൽ നടന്ന ദേവസ്വം ബോർഡ് യോഗത്തിൽ ജാതി വാദം ഉയർത്തി ഉദ്യോഗസ്ഥനെ വിമർശിച്ചും കെ. ജയകുമാർ പ്രതികരിച്ചിരുന്നു.
വൈക്കം മഹാദേവ ക്ഷേത്രത്തിലെ കഴകം ജീവനക്കാരായി ബ്രാഹ്മണ സമുദായത്തിൽ നിന്നുള്ളവർ മതിയെന്ന് ആവശ്യമാണ് ദേവസ്വം ബോർഡ് അസിസ്റ്റൻറ് കമ്മീഷണർ കെ എസ് പ്രവീൺ ഉന്നയിച്ചത്. ഉദ്യോഗസ്ഥനോട് ഏത് കാലത്താണ് ജീവിക്കുന്നതെന്നായിരുന്നു എന്ന് ചോദിച്ച കെ. ജയകുമാർ, കഴക നിയമനത്തിന് നിലവിലുള്ള നടപടിക്രമങ്ങൾ പിന്തുടർന്നാൽ മാത്രം മതിയെന്നും നിർദേശം നൽകുകയായിരുന്നു.