കൊച്ചി: പരീക്ഷ എഴുതാൻ അനുമതി തേടി കാലടി സംസ്കൃത സർവകലാശാലയിലെ വിദ്യാർഥികൾ നൽകിയ ഹർജിക്കെതിരെ സുപ്രീം കോടതിയിൽ രജിസ്ട്രാർ തടസ്സഹർജി ഫയൽ ചെയ്തു. വിദ്യാർഥികളുടെ ഹർജിയിൽ കോടതി ഉത്തരവ് പുറപ്പെടുവിക്കും മുൻപ് തന്റെ ഭാഗം കൂടി കേൾക്കണമെന്നാണ് രജിസ്ട്രാറുടെ ആവശ്യം. കോടതി നാളെ ഈ ഹർജി പരിഗണിക്കാനിരിക്കെയാണ് സർവകലാശാലയുടെ ഈ നീക്കം
ഇന്ന് വിദ്യാർഥികളുടെ ഹർജി സുപ്രീംകോടതി ചീഫ് ജസ്റ്റിസിന്റെ ബെഞ്ചിന് മുൻപാകെ എത്തിയിരുന്നു. വിദ്യാർഥികൾ ഉന്നയിക്കുന്ന വിഷയം ന്യായമാണെങ്കിൽ അവർക്ക് വേണ്ടി പിന്നീട് പ്രത്യേകമായി പരീക്ഷ നടത്തുമെന്ന പരാമർശം വാക്കാൽ കോടതിയുടെ ഭാഗത്തുനിന്നുണ്ടായി. ഇതിനുശേഷമാണ് സർവകലാശാല രജിസ്ട്രാർ തടസ്സഹർജി സമർപ്പിച്ചത്. ഏതെങ്കിലും തരത്തിൽ കോടതി അനുകൂല ഉത്തരവ് പുറപ്പെടുവിക്കുകയാണെങ്കിൽ, തന്റെ ഭാഗം കൂടി കേട്ടതിനു ശേഷമേ ഉത്തരവ് നൽകാവൂ എന്നാണ് തടസ്സഹർജിയിൽ പ്രധാനമായും ആവശ്യപ്പെടുന്നത്.