തിരുവനന്തപുരം:കിഫ്ബിയിൽ പ്രതിപക്ഷത്തിനോട് ചോദ്യവുമായി മുഖ്യമന്ത്രി വി.ഡി. സതീശൻ. കിഫ്ബിയുടെ കൈവശം 30000 കോടി ഉണ്ടെന്ന തോമസ് ഐസക്കിന്റെ പരാമർശം ചൂണ്ടിക്കാണിച്ചാണ് ചോദ്യം.
"കിഫ്ബിയുടെ ഓഡിറ്റ് റിപ്പോർട്ടിൽ നീക്കിയിരുപ്പ് 10633 കോടി മാത്രം. ഇതില്‍ 4,128 കോടി രൂപ സര്‍ക്കാരിന്റെ തന്നെ ട്രഷറി കോര്‍പ്പസ് ഫണ്ട്. ഇത് കിഴിച്ചാല്‍ കിഫ്ബിയുടെ ആകെ നിക്ഷേപം 6,521 കോടി. എന്നാൽ കിഫ്ബിയുടെ കടബാധ്യത 32,000 കോടി രൂപയോളം.അങ്ങനെയെങ്കില്‍ തോമസ് ഐസക് പറഞ്ഞ '30,000' കോടി 2026 മാര്‍ച്ച് 31 ആയപ്പോള്‍ 6521 കോടി ആയത് എങ്ങനെ?, അന്നത്തെ മുഖ്യമന്ത്രി പിണറായി മറുപടി പറയണം" മുഖ്യമന്ത്രി ഫേസ്ബുക്കിൽ കുറിച്ചു. കിഫ്ബിയുടെ മുന്‍ ചെയര്‍മാനും മുന്‍ ധനമന്ത്രി കെ എന്‍ ബാലഗോപാലും മറുപടി നൽകണമെന്നും സതീശൻ ആവശ്യപ്പെട്ടു.
കുറിപ്പിൻ്റെ പൂർണരൂപം;
"കേരള ഇൻഫ്രാസ്ട്രക്ചർ ഇൻവെസ്റ്റ്‌മെന്റ് ഫണ്ട് ബോർഡിന്റെ (കിഫ്ബി) സമഗ്ര അവലോകനത്തിനായുള്ള കമ്മിറ്റിയുടെ റിപ്പോർട്ട് കഴിഞ്ഞ ദിവസം പുറത്തു വന്നിരുന്നു. ഇതിനു പിന്നാലെ മുന്‍ ധനകാര്യ മന്ത്രി ഡോ.തോമസ് ഐസക് നടത്തിയ വാർത്താ സമ്മേളനത്തില്‍ കിഫ്ബിയുടെ കൈവശം '30,000' കോടി രൂപ പണമായും നിക്ഷേപമായും ഉണ്ടെന്നും ഇതിലാണ് ഈ സർക്കാരിന്റെ കണ്ണ് എന്നാണ് പറഞ്ഞിരിക്കുന്നത്.
എന്നാൽ കിഫ്ബിയുടെ വെബ്‌സൈറ്റിൽ ലഭ്യമായ ഓഡിറ്റ് രേഖകളിൽ നിന്നും 2026 മാർച്ച് 31ലെ കിഫ്ബിയുടെ ആകെ നീക്കിയിരിപ്പ് 10,633 കോടി രൂപയാണ്. ഇതിൽ 4,128 കോടി രൂപ സർക്കാരിന്റെ തന്നെ ട്രഷറി കോർപ്പസ് ഫണ്ട് ആണ്. ഇത് കിഴിച്ചാൽ കിഫ്ബിയുടെ ആകെ നിക്ഷേപം 6,521 കോടി രൂപയാണ്. ഈ സർക്കാർ അധികാരത്തിൽ വരുമ്പോൾ കിഫ്ബിയുടെ പണമായും നിക്ഷേപമായും ഉണ്ടായിരുന്നത് 6521 കോടി രൂപയാണെന്ന് ഇതിൽ നിന്നും വ്യക്തമാണ്. പക്ഷെ, കിഫ്ബിയുടെ കടബാധ്യത 32,000 കോടി രൂപയോളമാണ്.
അങ്ങനെയെങ്കിൽ സുപ്രധാനമായ ഒരു ചോദ്യമുയരുന്നു. മുൻ മന്ത്രി ഡോ.തോമസ് ഐസക് പറഞ്ഞ കിഫ്ബിയുടെ കൈവശമുള്ള '30,000' കോടി രൂപ 2026 മാർച്ച് 31 ആയപ്പോൾ 6521 കോടി ആയത് എങ്ങിനെ?
കിഫ്ബിയുടെ മുന്‍ ചെയര്‍മാനും അന്നത്തെ മുഖ്യമന്ത്രിയും ഇപ്പോഴത്തെ പ്രതിപക്ഷ നേതാവായ പിണറായി വിജയനും മുൻ ധനമന്ത്രി കെ.എൻ ബാലഗോപാലും ഈ ചോദ്യത്തിന് മറുപടി നൽകണം."