തിരുവനന്തപുരം: പിഎം ശ്രീ വിഷയത്തില് സര്ക്കാര് മലക്കം മറിയുന്നതിനിടെ, പ്രതിഷേധമറിയിച്ച് കെഎസ്യു കാസര്ഗോഡ് ജില്ലാ പ്രസിഡണ്ട്. അഡ്വ. ജവാദ് പുത്തൂര്. പിഎം ശ്രീ വിഷയത്തില് യുഡിഎഫ് സര്ക്കാര് അടിയന്തരമായി രാഷ്ട്രീയ തീരുമാനം കൈക്കൊള്ളണമെന്ന് ഫേസ്ബുക്ക് കുറിപ്പില് ജവാദ് പൂത്തൂര് ആവശ്യപ്പെട്ടു.
കേരളത്തിന്റെ വിദ്യാഭ്യാസ സ്വയംഭരണത്തെയും ഫെഡറല് മൂല്യങ്ങളെയും ബാധിക്കുന്ന വിഷയങ്ങളില് സാങ്കേതിക ന്യായീകരണങ്ങള്ക്കപ്പുറം വ്യക്തമായ രാഷ്ട്രീയ നിലപാട് സ്വീകരിക്കേണ്ട സമയമാണിത്. മുന് എല്ഡിഎഫ് സര്ക്കാര് കേരളത്തിന്റെ വിദ്യാഭ്യാസ മേഖലയെ കേന്ദ്ര സര്ക്കാരിന്റെ നയങ്ങള്ക്ക് മുന്നില് അടിയറവെച്ചപ്പോള് അതിനെ രാഷ്ട്രീയമായി ചോദ്യം ചെയ്യുകയും പ്രതിരോധിക്കുകയും ചെയ്തവരാണ് കെഎസ്യു. ആ നിലപാടില് നിന്ന് ഒരു അടിപോലും പിന്നോട്ടില്ലെന്നും ജവാദ് പുത്തൂര് വ്യക്തമാക്കി.
വിദ്യാഭ്യാസ രംഗത്തെ സംസ്ഥാനത്തിന്റെ അവകാശങ്ങളും സ്വയംഭരണവും സംരക്ഷിക്കേണ്ട ഉത്തരവാദിത്തം ഇന്ന് യുഡിഎഫ് സര്ക്കാരിനാണ്. ഫെഡറല് സംവിധാനങ്ങളെയും സംസ്ഥാനങ്ങളുടെ ഭരണഘടനാപരമായ അവകാശങ്ങളെയും കാറ്റില് പറത്തുന്ന കേന്ദ്ര സര്ക്കാരിന്റെ ഏകപക്ഷീയ സമീപനത്തിനെതിരെ കേരളത്തിന്റെ ശബ്ദം ശക്തമായി ഉയരേണ്ടതുണ്ട്.
കേരളത്തിന്റെ വിദ്യാഭ്യാസ താല്പര്യങ്ങളും ജനാധിപത്യ മൂല്യങ്ങളും സംരക്ഷിക്കുന്ന നിലപാടാണ് സര്ക്കാര് സ്വീകരിക്കേണ്ടത്. വിദ്യാര്ത്ഥി സമൂഹത്തിന്റെ ആശങ്കകള് അവഗണിക്കുന്ന സാഹചര്യം ഉണ്ടാകരുത്. വിദ്യാഭ്യാസ സ്വയംഭരണവും ഫെഡറല് മൂല്യങ്ങളും സംരക്ഷിക്കുന്ന മുന് കാലങ്ങളില് കെഎസ്യുവും കോണ്ഗ്രസും എടുത്ത ശക്തമായ രാഷ്ട്രീയ തീരുമാനം സര്ക്കാര് കൈക്കൊള്ളുമെന്ന് പ്രതീക്ഷിക്കുന്നുവെന്നും ജവാദ് പൂത്തൂര് പറഞ്ഞു. കെഎസ്യു നേതാവിന്റെ എഫ് ബി കുറിപ്പ് വയറലായതോട് കൂടി യുഡിഎഫിലും പ്രതിഷേധമുയര്ന്നിട്ടുണ്ട്.