പാലക്കാട്: പട്ടാമ്പി മണ്ഡലത്തിലെ സ്ഥാനാർഥി പട്ടികയിൽ നിന്നും മുഹമ്മദ് മുഹ്സിനെ വെട്ടി നേതൃത്വം. സിപിഐ പാലക്കാട് ജില്ലാ എക്സിക്യൂട്ടീവ് യോഗത്തിലാണ് തീരുമാനം. പട്ടാമ്പി മണ്ഡലം കമ്മിറ്റി മുഹ്സിനെ തീരുമാനിച്ചിരുന്നു. ഈ വർഷത്തെ മികച്ച നിയമസഭാ സാമാജികനുള്ള മാഹാത്മ പുരസ്ക്കാർ 2026 അവാർഡ് നേടിയ എംഎൽഎ കൂടിയാണ് മുഹമ്മദ് മുഹ്സിൻ.
2016-ലാണ് പട്ടാമ്പിയിൽ നിന്ന് ആദ്യമായി മുഹമ്മദ് മുഹ്സിനെ നിയമസഭയിലേക്ക് തിരഞ്ഞെടുക്കപ്പെട്ടത്. അന്നത്തെ സഭയിലെ ഏറ്റവും പ്രായം കുറഞ്ഞ അംഗമായിരുന്നു മുഹമ്മദ് മുഹ്സിൻ. 2021-ലെ തിരഞ്ഞെടുപ്പിലും സഭയിലെത്തി. മുതിർന്ന നേതാവ് പന്ന്യൻ രവീന്ദ്രൻ, ജില്ലാ എക്സിക്യൂട്ടീവ് അംഗം ഒ.കെ. സൈതലവി, എഐവൈഎഫ് സംസ്ഥാന പ്രസിഡൻ്റ് കെ. ഷാജഹാൻ എന്നിവരാണ് സ്ഥാനാർഥി പട്ടികയിൽ ഉള്ളത്. സംസ്ഥാന കമ്മിറ്റി യോഗം അന്തിമ തീരുമാനമെടുക്കും.