തിരുവനന്തപുരം: ലൈംഗിക ആരോപണങ്ങളില്‍ രാഹുൽ മാങ്കൂട്ടത്തിലിന് സമ്പൂർണ സംരക്ഷണം പ്രഖ്യാപിച്ച് യുഡിഎഫ്. പാലക്കാട് എംഎല്‍എയ്ക്ക് എതിരെ ഉയർന്നത് കഴമ്പില്ലാത്ത ആരോപണങ്ങളാണെന്നായിരുന്നു യുഡിഎഫ് കൺവീനർ അടൂർ പ്രകാശിൻ്റെ മറയില്ലാത്ത ന്യായീകരണം. രാഹുൽ സഭാ സമ്മേളനത്തിൽ പങ്കെടുക്കുന്നതിൽ സിപിഐഎം തീരുമാനം എടുക്കേണ്ടെന്നും അടൂർ പ്രകാശ് വെല്ലുവിളിച്ചു.
രാഹുലിനെതിരെ ആരോപണം ഉയർന്ന സാഹചര്യം പരിഗണിച്ചാണ് സംഘടനാ തലത്തിൽ നടപടി സ്വീകരിച്ചതെന്ന് അടൂർ പ്രകാശ് വ്യക്തമാക്കി. എൽഡിഎഫിൽ ഉള്ളവർക്കെതിരെയും സമാന ആരോപണമുള്ളപ്പോൾ രാഹുലിനെ മാത്രം എന്തിന് നിയമസഭാ സമ്മേളനത്തിൽനിന്ന് മാറ്റി നിർത്തണമെന്നും അടൂർ പ്രകാശ് ചോദിച്ചു. എല്ലാവർക്കും നീതി ലഭ്യമാകേണ്ടതുണ്ടെന്നും രാഹുലിന് സംരക്ഷണം ഒരുക്കുമെന്നും യുഡിഎഫ് കണ്‍വീനർ കൂട്ടിച്ചേർത്തു.
കഴിഞ്ഞ ദിവസം, രാഹുല്‍ മാങ്കൂട്ടത്തിലിനായി വടകര എംപി ഷാഫി പറമ്പിലിൻ്റെ നേതൃത്വത്തിൽ എ ഗ്രൂപ്പ് യോഗം ചേർന്നിരുന്നതായാണ് റിപ്പോർട്ടുകള്‍. കെപിസിസി ജനറൽ സെക്രട്ടറി സി. ചന്ദ്രൻ്റെ വീട്ടിലായിരുന്നു യോഗം. യോഗത്തില്‍ ചന്ദ്രന്‍ പങ്കെടുത്തിരുന്നില്ല. രാഹുൽ മാങ്കൂട്ടത്തിലിനെ തള്ളിപ്പറയാൻ പാടില്ലെന്ന് യോഗത്തില്‍ ചർച്ചയായി. എംഎല്‍എയെ ഒഴിവാക്കി നിർത്തേണ്ട സാഹചര്യമില്ല. മണ്ഡലത്തിൽ നിന്ന് എംഎല്‍എ ഏറെ നാൾ വിട്ടുനിന്നാൽ പ്രതിസന്ധിയാകുമെന്ന് യോഗം വിലയിരുത്തി. പ്രതിസന്ധി ഘട്ടത്തിൽ രാഹുലിനെ കൈവിടേണ്ട എന്നാണ് ഗ്രൂപ്പ് യോഗത്തിലെ പൊതുധാരണ. ഉമ തോമസിന് എതിരെയും യോഗത്തിൽ വിമർശനം ഉയർന്നു.
അതേസമയം, രാഹുലിനായി ഗ്രൂപ്പ് യോഗം നടന്നിട്ടില്ലെന്നാണ് ഷാഫി പറമ്പില്‍ എംപി പ്രതികരിച്ചത്. പാലക്കാട് വന്നത് കല്യാണത്തിനാണെന്നാണ് എംപിയുടെ വിശദീകരണം.