നാളെ രാത്രി ഒരു മണിക്കൂർ ഭൗമ മണിക്കൂറായി ആചരിക്കാൻ അഭ്യർഥനയുമായി കെഎസ്ഇബി. ആഗോള താപനത്തില്‍ നിന്ന് ഭൂമിയെ രക്ഷിക്കാൻ ലോക വ്യാപകമായി ആഹ്വാനം ചെയ്യുന്നതിരിക്കുന്നതാണ് ഭൗമ മണിക്കൂർ. രാത്രി 8.30 മുതല്‍ 9.30 വരെ അത്യാവശ്യമില്ലാത്ത വൈദ്യുതി വിളക്കുകളും മറ്റ് ഇലക്ട്രിക് ഉപകരണങ്ങളും ഓഫ് ചെയ്യണമെന്ന് കെഎസ്ഇബി അറിയിച്ചു. വേൾഡ് വൈഡ് ഫണ്ട് ഫോർ നേച്ചറിന്റെ ആഹ്വാനത്തിനൊപ്പം പങ്കാളികളായാണ് കെഎസ്ഇബിയുടെ പ്രഖ്യാപനം.
എല്ലാ വർഷവും 190ൽപ്പരം ലോകരാഷ്ട്രങ്ങൾ പങ്കാളികളായി മാര്‍ച്ച് മാസത്തിലെ അവസാന ശനിയാഴ്ചയാണ് ഭൗമ മണിക്കൂര്‍ ആചരിക്കുന്നത്. എന്നാല്‍ കഴിഞ്ഞ വർഷം മുതല്‍ അവസാനത്തെ ശനിയാഴ്ചയ്ക്ക് പകരം ലോകജലദിനം കൂടിയായ മാര്‍ച്ച് 22നാണ് ഭൗമ മണിക്കൂര്‍ ആചരിക്കുന്നത്. എല്ലാ മാർച്ചിലും, ലോകമെമ്പാടുമുള്ള ദശലക്ഷക്കണക്കിന് ആളുകളാണ് ഭൂമിയുടെ ഭാവിയിലുള്ള കരുതൽ പ്രകടിപ്പിക്കാൻ പ്രതീകാത്മകമായി ഒരു മണിക്കൂർ നീളുന്ന ഭൗമമണിക്കൂറിൽ ഒത്തുകൂടുന്നത്. ബിഗ് ബെൻ, സിഡ്‌നി ഓപ്പറ ഹൗസ് തുടങ്ങിയ പ്രശസ്തമായ ലാൻഡ്‌മാർക്കുകൾ മുതൽ ലോകമെമ്പാടുമുള്ള നഗരങ്ങൾ വരെ, ഈ സമയം ഐക്യദാർഢ്യ സൂചകമായി വിളക്കുകൾ അണയ്ക്കും.
ഭൗമ മണിക്കൂർ എന്നത് ലൈറ്റുകൾ അണയ്ക്കുക എന്നത് മാത്രമല്ല ,മാനസികമായി 'സ്വിച്ച് ഓഫ്' ചെയ്യാനും വിശ്രമിക്കാനും പ്രകൃതിയുമായി ബന്ധപ്പെടാനും ഒരു നിമിഷം ചെലവഴിക്കാനുമുള്ള മികച്ച സമയം കൂടിയാണെന്നാണ് വേൾഡ് വൈഡ് ഫണ്ട് ഫോർ നേച്ചർ പറയുന്നത്.