എറണാകുളം കളമശ്ശേരി മെഡിക്കൽ കോളേജിൽ ചികിത്സയ്ക്ക് എത്തിയ യുവതിക്ക് മരുന്നു മാറി നൽകിയതായി പരാതി. കളമശ്ശേരി സ്വദേശി അനാമികയാണ് മരുന്ന് മാറി നൽകിയതിന് ചികിത്സിച്ച ഡോക്ടർക്കും, എക്സ്-റേ വിഭാഗത്തിനും എതിരെ പരാതി നൽകിയത്.
നടുവേദനയും കാലുവേദനയും കാരണമാണ് അനാമിക ആശുപത്രിയിൽ എത്തിയത്. എന്നാൽ, 34കാരിയായ അനാമികയ്ക്ക് മരുന്ന് നൽകിയത് 61കാരിയായ ലതികയുടെ എക്സ്-റേ റിപ്പോർട്ടിന്റെ അടിസ്ഥാനത്തിലാണ്. വീട്ടിൽ ചെന്ന് എക്സ്- റേ റിപ്പോർട്ട് പരിശോധിച്ചപ്പോഴാണ് തന്റെ റിപ്പോർട്ട് അല്ല എന്നും, പിഴവ് പറ്റിയെന്നും മനസിലായത്. മാറിയ റിപ്പോർട്ട് നോക്കി പ്രായാധിക്യം മൂലമുള്ള തേയ്മാനം ഉണ്ടെന്ന് ഡോക്ടർ പറഞ്ഞതായി അനാമിക പറയുന്നു. തിരക്കിനിടയിൽ എക്സ്-റേ റിപ്പോർട്ട് മാറിപ്പോയെന്ന് പിന്നീട് റേഡിയോളജിസ്റ്റ് പറഞ്ഞതായും കുടുംബം വ്യക്തമാക്കി.
സംഭവത്തിൽ ആശുപത്രി സൂപ്രണ്ടിനും പൊലീസിനും കുടുംബം പരാതി നൽകി. പരാതി ലഭിച്ചെന്നും, വിശദമായി അന്വേഷിക്കുമെന്നും ആശുപത്രി മെഡിക്കൽ കോളേജ് സൂപ്രണ്ട് വ്യക്തമാക്കി.