കോഴിക്കോട് താമരശേരിയിൽ നിന്നും കാണാതായ പതിമൂന്ന് കാരിയെ ബെംഗളൂരുവിലുണ്ടെന്ന് സൂചന. പെൺകുട്ടി യുവാവിനൊപ്പം ബെംഗളൂരുവിൽ ഉണ്ടെന്ന് വിവരം കർണാടക പൊലീസ് അറിയിച്ചതിനെ തുടർന്ന് താമരശേരി പൊലീസ് ബെംഗളൂരുവിലേക്ക് പുറപ്പെട്ടു. കഴിഞ്ഞ പതിനൊന്നാം തീയതിയാണ് പതിമൂന്നുകാരിയെ കാണാതായ വിവരം പുറത്തുവന്നത്.
പെരുമ്പള്ളിയിൽ നിന്നും പുതുപ്പാടി ഹൈസ്കൂളിലേക്ക് പരീക്ഷയ്ക്ക് എന്ന് പറഞ്ഞ് പുറപ്പെട്ട എട്ടാം ക്ലാസുകാരിയെ കാണ്മാനില്ലെന്ന് കാണിച്ച് രക്ഷിതാക്കൾ പൊലീസിൽ പരാതി നൽകിയിരുന്നു. തുടർന്ന് അന്വേഷണം പുരോഗമിക്കെ കഴിഞ്ഞ പതിനാലാം തിയ്യതി തൃശൂർ കെഎസ്ആർടിസി ബസ് സ്റ്റാൻ്റിനു സമീപത്തെ ലോഡ്ജിൽ മുറിയെടുക്കാനായി കുട്ടി ബന്ധുവായ മുഹമ്മദ് അജ്നാസിന് ഒപ്പം
എത്തിയ സിസിടിവി ദൃശ്യങ്ങൾ പുറത്തുവന്നിരുന്നു. എന്നാൽ കുട്ടിയുടെ കൈയ്യിൽ മതിയായ തിരിച്ചറിയൽ രേഖ ഇല്ലാത്തതിനാൽ റൂം നൽകാൻ ലോഡ്ജ് ഉടമ തയ്യാറായില്ല.പിന്നിട് ഇവരെ കുറിച്ച് വിവരം ലഭ്യമായിരുന്നില്ല.ഇതിനിടെയാണ് ഇന്നു പുലർച്ചെയോടെ ബെംഗളൂരുവിൽ കണ്ടെത്തിയതായ വിവരം പൊലീസിന് ലഭിച്ചത്.