കോഴിക്കോട് താമരശേരി പൊലീസ് സ്റ്റേഷൻ പരിധിയിൽ നിന്നും കാണാതായ 13 കാരിയും യുവാവും തൃശൂരിൽ എന്ന് സൂചന. തൃശൂർ കെഎസ്ആർടിസിക്ക് സമീപം ലോഡ്ജിൽ മുറി അന്വേഷിച്ച് എത്തിയ യുവാവിന്റെയും പെൺകുട്ടിയുടെയും ദൃശ്യങ്ങൾ സിസിടിവിയിൽ പതിഞ്ഞു.
പതിനാലാം തീയതിയാണ് തൃശൂരിലെ ലോഡ്ജിൽ ഇരുവരും മുറിയെടുക്കാൻ എത്തിയത്. എന്നാൽ പെൺകുട്ടിക്ക് ഐഡി കാർഡ് ഇല്ലാത്തതിനാൽ മുറി അനുവദിക്കാൻ ലോഡ്ജ് ഉടമ തയ്യാറായില്ല. എന്തായാലും സിസിടിവി ദൃശ്യങ്ങൾ കേന്ദ്രീകരിച്ച് തൃശൂരിൽ ഉൾപ്പെടെ കൂടുതൽ പരിശോധന നടത്താനാണ് പൊലീസിന്റെ തീരുമാനം. പെൺകുട്ടിക്കൊപ്പം ഉള്ള ചെറുപ്പക്കാരൻ പോക്സോ കേസിൽ മുൻപ് ശിക്ഷ അനുഭവിച്ച ആളാണ്.
അഞ്ചു ദിവസം മുൻപാണ് പരീക്ഷയ്ക്ക് എന്ന് പറഞ്ഞ് ഇറങ്ങിയ പെൺകുട്ടിയെ കാണാതായത്. അഞ്ച് ദിവസം കഴിഞ്ഞിട്ടും കുട്ടിയെ കണ്ടെത്താനായിട്ടില്ല. താമരശേരി സ്വദേശിയായ ചെറുപ്പക്കാരൻ പെൺകുട്ടിയെ ബൈക്കിൽ കയറ്റി കൊണ്ടുപോയി എന്നാണ് ലഭിച്ച പ്രാഥമിക വിവരം.