ന്യൂഡൽഹി: ഇന്ത്യൻ ക്രിക്കറ്റ് താരം സ്മൃതി മന്ദാനയും സംഗീത സംവിധായകൻ പലാഷ് മുച്ഛലും തമ്മിലുള്ള വിവാഹം മാറ്റിവച്ചതിന് പിന്നാലെ വിവിധങ്ങളായ അഭ്യൂഹങ്ങളാണ് സമൂഹ മാധ്യമങ്ങളിൽ പ്രചരിച്ചുകൊണ്ടിരിക്കുന്നത്. വിവാഹാഘോഷങ്ങള്‍ക്കിടെ സ്മൃതിയുടെ പിതാവ് ശ്രീനിവാസന് നെഞ്ചുവേദനയും ദേഹാസ്വാസ്ഥ്യവും അനുഭവപ്പെട്ടതോടെ ആശുപത്രിയില്‍ പ്രവേശിപ്പിച്ചതിനാലാണ് കല്യാണം മാറ്റിവച്ചത്. എന്നാൽ, ഇതിന് കാരണം സ്മൃതിയെ പലാഷ് വഞ്ചിച്ചതാണെന്നും മറ്റൊരു സ്ത്രീയുമായി ഇയാൾക്ക് ബന്ധമുണ്ടെന്നുമാണ് സോഷ്യൽ മീഡിയയിൽ പ്രചരിച്ചത്.
നന്ദിക ദ്വിവേദി, ഗുൽനാസ് എന്നീ കൊറിയോഗ്രാഫർമാരുടെ പേരുകളാണ് പലാഷുമായി ബന്ധപ്പെടുത്തി ഉയർന്നുവന്നത്. ഇപ്പോഴിതാ, വിവാദങ്ങളിൽ പ്രതികരിച്ച് ഗുൽനാസ് തന്നെ രംഗത്തെത്തിയിരിക്കുന്നു. പലാഷുമായി അത്തരത്തിലൊരു ബന്ധമില്ലെന്നാണ് ഗുൽനാസിന്റെ വിശദീകരണം. തീരുമാനങ്ങളിലേക്ക് എടുത്തുചാടരുത് എന്നും ഗുൽനാസ് അഭ്യർഥിച്ചു. ഇന്‍സ്റ്റഗ്രാമിലൂടെ ആയിരുന്ന പ്രതികരണം.
"എന്നെയും എന്റെ സുഹൃത്ത് നന്ദികയെയും കുറിച്ച് ധാരാളം ഊഹാപോഹങ്ങളും തെറ്റായ അവകാശവാദങ്ങളും പ്രചരിക്കുന്നത് എന്റെ ശ്രദ്ധയിൽപ്പെട്ടു. അതുകൊണ്ട് തന്നെ ഈ വിഷയത്തിൽ ഞങ്ങൾ ഉൾപ്പെട്ടിട്ടില്ല എന്ന് വ്യക്തമാക്കാൻ ഞാൻ ആഗ്രഹിക്കുന്നു. നമുക്ക് ഒരാളെ സോഷ്യലായി അറിയാം എന്നതോ അവരോടൊപ്പം ഫോട്ടോ ഉണ്ടെന്നതോ അവരുടെ വ്യക്തിപരമായ കാര്യങ്ങളിൽ നമുക്ക് ബന്ധുമുണ്ടെന്ന് അർത്ഥമാക്കുന്നില്ല. ദയവായി തിടുക്കത്തിൽ നിഗമനങ്ങളിൽ എത്താതിരിക്കുക," ഗുൽനാസ് ഇന്‍സ്റ്റഗ്രാം സ്റ്റോറിയിൽ കുറിച്ചു.
അതേസമയം, 2017ൽ പലാഷ് മുച്ഛൽ മുൻ കാമുകി ബിർവ ഷായെ പ്രപ്പോസ് ചെയ്യുന്ന ചിത്രവും സമൂഹമാധ്യങ്ങളിൽ ഉയർന്നുവന്നിട്ടുണ്ട്. ഇരുവരും ഒന്നിച്ചുള്ള ചിത്രങ്ങളും ഇപ്പോൾ സമൂഹമാധ്യമങ്ങളിൽ പ്രചരിക്കുന്നുണ്ട്.
നവംബർ 23ന് ആയിരുന്നു സ്മൃതി മന്ദാനയുടേയും പലാഷിന്റെയും വിവാഹം നിശ്ചയിച്ചിരുന്നത്. സ്മൃതിയുടെ പിതാവ് ശ്രീനിവാസിന് ഹൃദയാഘാതം നേരിട്ടതോടെ ചടങ്ങുകൾ നിർത്തിവച്ചു. വിവാഹാഘോഷങ്ങള്‍ക്കിടെ ശ്രീനിവാസന് നെഞ്ചുവേദനയും ദേഹാസ്വാസ്ഥ്യവും അനുഭവപ്പെടുകയായിരുന്നു. പിന്നാലെ, അണുബാധയെ തുടർന്ന് പലാഷിനെയും ആശുപത്രിയിൽ പ്രവേശിപ്പിച്ചു. ഇരുവരും ആശുപത്രി വിട്ടെങ്കിലും വിവാഹത്തെക്കുറിച്ചുള്ള പുതിയ അറിയിപ്പൊന്നും സ്മൃതിയുടേയോ പലാഷ് മുച്ഛലിന്റെയോ ഭാഗത്തു നിന്നുണ്ടായിട്ടില്ല. ഇതാണ് ഇതോടെയാണ് പലതരം അഭ്യൂഹങ്ങൾ പ്രചരിക്കാൻ ആരംഭിച്ചത്.