2070-ലും ഇന്ത്യയിൽ ഹിന്ദുക്കൾ തന്നെ വലിയ ഭൂരിപക്ഷം; മുസ്ലീം ജനസംഖ്യ 20 ശതമാനമാകും; ഇന്ത്യയിൽ മതപരിവർത്തനം ജനസംഖ്യാ മാറ്റത്തിന് കാരണമാകില്ലെന്ന് പഠനം

ജനസംഖ്യാ വിഹിതത്തിലുണ്ടാകുന്ന ഈ മാറ്റത്തിന് പിന്നിലെ പ്രധാന കാരണം പ്രായത്തിലും പ്രത്യുൽപ്പാദന നിരക്കിലുമുള്ള വ്യത്യാസങ്ങളാണ്. 2020-ലെ കണക്കനുസരിച്ച് ഇന്ത്യൻ മുസ്ലീങ്ങളുടെ ശരാശരി പ്രായം 24 ആയിരുന്നപ്പോൾ ഹിന്ദുക്കളുടേത് 29 ആയിരുന്നു.
India to Remain Overwhelmingly Hindu in 2070 as Muslim Share Reaches 20%, Says New Pew Study
India to Remain Overwhelmingly Hindu in 2070 as Muslim Share Reaches 20%, Says New Pew StudyNews Malayalam 24x7
Published on: 
Updated on: 

ന്യൂഡൽഹി: വരും ദശകങ്ങളിലും ഇന്ത്യയിലെ ജനസംഖ്യയിൽ ഹിന്ദുക്കൾ തന്നെയായിരിക്കും വലിയ ഭൂരിപക്ഷമായി തുടരുകയെന്ന് പ്രമുഖ ഗവേഷണ സ്ഥാപനമായ പ്യൂ റിസർച്ച് സെന്ററിന്റെ പുതിയ പഠനം. 2020-നും 2070-നും ഇടയിൽ ഇന്ത്യയിലെ ജനസംഖ്യാ ഘടനയിൽ സാവധാനത്തിലുള്ള മാറ്റങ്ങൾ മാത്രമാണ് ഉണ്ടാകുകയെന്നും, 2070-ഓടെ ഹിന്ദു ജനസംഖ്യാ വിഹിതം 79 ശതമാനത്തിൽ നിന്ന് 76 ശതമാനമായി കുറയുമ്പോൾ മുസ്ലീം ജനസംഖ്യാ വിഹിതം 15 ശതമാനത്തിൽ നിന്ന് 20 ശതമാനമായി ഉയരുമെന്നും പഠനം വ്യക്തമാക്കുന്നു. നിലവിലെ ജനസംഖ്യാ പ്രവണതകൾ തുടരുകയാണെങ്കിൽ 2020 മുതൽ 2070 വരെയുള്ള കാലയളവിൽ ഇന്ത്യയിലെ ഹിന്ദു ജനസംഖ്യയിൽ 17.6 കോടിയുടെ വർദ്ധനവുണ്ടാകുമെന്നും, 2070-ലും രാജ്യത്തെ ജനസംഖ്യയുടെ നാലിൽ മൂന്ന് ഭാഗത്തിലധികം ഹിന്ദുക്കളായിരിക്കുമെന്നും റിപ്പോർട്ടിൽ പറയുന്നു.

ജനസംഖ്യാ വിഹിതത്തിലുണ്ടാകുന്ന ഈ മാറ്റത്തിന് പിന്നിലെ പ്രധാന കാരണം പ്രായത്തിലും പ്രത്യുൽപ്പാദന നിരക്കിലുമുള്ള വ്യത്യാസങ്ങളാണ്. 2020-ലെ കണക്കനുസരിച്ച് ഇന്ത്യൻ മുസ്ലീങ്ങളുടെ ശരാശരി പ്രായം 24 ആയിരുന്നപ്പോൾ ഹിന്ദുക്കളുടേത് 29 ആയിരുന്നു. 2025-നും 2030-നും ഇടയിൽ ഇന്ത്യയിലെ മുസ്ലീം സ്ത്രീകൾക്ക് ശരാശരി 2.3 കുട്ടികളും ഹിന്ദു സ്ത്രീകൾക്ക് 1.8 കുട്ടികളും ഉണ്ടാകുമെന്നാണ് പ്യൂവിന്റെ അനുമാനം. 1992-ൽ ഒരു സ്ത്രീക്ക് ഒരു കുട്ടിയിലധികം എന്ന നിലയിലുണ്ടായിരുന്ന പ്രത്യുൽപ്പാദന നിരക്കിലെ അന്തരം സമീപ വർഷങ്ങളിൽ ഏകദേശം അര കുട്ടിയായി കുറഞ്ഞിട്ടുണ്ടെന്നും ഇത് ഇനിയും കുറയുമെന്നും പ്യൂ ഗവേഷകയായ സ്റ്റെഫാനി ക്രാമർ ചൂണ്ടിക്കാട്ടി. ഹിന്ദുക്കളിലെ പ്രത്യുൽപ്പാദന നിരക്ക് ഇതിനകം തന്നെ ജനസംഖ്യ സ്ഥിരമായി നിലനിർത്താൻ ആവശ്യമായ 'റീപ്ലേസ്‌മെന്റ് ലെവലിന്' താഴെയാണെന്നും അവർ വ്യക്തമാക്കി.

India to Remain Overwhelmingly Hindu in 2070 as Muslim Share Reaches 20%, Says New Pew Study
2035ല്‍ ഇസ്‌ലാം ലോകത്തെ ഏറ്റവും വലിയ മതമാകുമെന്ന് പഠനം; ജനസംഖ്യാ വളർച്ചയിൽ ക്രൈസ്തവ വിഭാഗത്തെ മറികടക്കും

ഇന്ത്യയിൽ മതപരിവർത്തനം ജനസംഖ്യാ മാറ്റത്തിന് കാരണമാകുന്നു എന്നതിന് തെളിവുകളൊന്നുമില്ലെന്നും, മുസ്ലീങ്ങൾ ഹിന്ദുക്കളെക്കാൾ കൂടുതലാകുമെന്ന തരത്തിലുള്ള ആശങ്കകൾക്ക് ഈ പഠനത്തിൽ യാതൊരു അടിസ്ഥാനവുമില്ലെന്നും പ്രിൻസ്റ്റൺ സർവകലാശാലയിലെ ജനസംഖ്യാശാസ്ത്രജ്ഞൻ കെ.എസ്. ജെയിംസ് ബി.ബി.സിയോട് പറഞ്ഞു. ദക്ഷിണേഷ്യൻ മേഖലയിലെ മറ്റു കണക്കുകൾ പ്രകാരം 2070-ഓടെ പാകിസ്ഥാൻ (ഏകദേശം 46.1 കോടി) ഇന്തോനേഷ്യയെ മറികടന്ന് ലോകത്തിലെ ഏറ്റവും വലിയ മുസ്ലീം ജനസംഖ്യയുള്ള രാജ്യമായി മാറും. 33.4 കോടി മുസ്ലീങ്ങളുമായി ഇന്ത്യ രണ്ടാം സ്ഥാനത്തും 21.8 കോടി മുസ്ലീങ്ങളുമായി ബംഗ്ലാദേശ് തൊട്ടുപിന്നിലുമുണ്ടാകും. അതേസമയം ഇന്ത്യയും നേപ്പാളും ലോകത്തിലെ ഏക ഹിന്ദു ഭൂരിപക്ഷ രാജ്യങ്ങളായി തുടരും എന്നാണ് പഠനം പറയുന്നത്.

ആഗോളതലത്തിൽ 2035-ഓടെ മുസ്ലീങ്ങൾ ക്രിസ്ത്യാനികളെ മറികടന്ന് ലോകത്തിലെ ഏറ്റവും വലിയ മതവിഭാഗമായി മാറുമെന്നും പഠനം പ്രവചിക്കുന്നു. 2070-ഓടെ ലോകജനസംഖ്യയുടെ 36 ശതമാനം അഥവ 364 കോടി മുസ്ലീങ്ങളായിരിക്കും; ക്രിസ്ത്യാനികളുടെ എണ്ണം 300 കോടിയിൽ താഴെയായിരിക്കുമെന്നും കണക്കാക്കുന്നു. 2070-ഓടെ ലോകത്തിലെ പകുതിയിലധികം ക്രിസ്ത്യാനികളും സബ് സഹാറൻ ആഫ്രിക്കയിലായിരിക്കും താമസിക്കുക. ഡെമോക്രാറ്റിക് റിപ്പബ്ലിക് ഓഫ് കോംഗോ അമേരിക്കയെ മറികടന്ന് ഏറ്റവും വലിയ ക്രിസ്ത്യൻ ജനസംഖ്യയുള്ള രാജ്യമാകും. യൂറോപ്പിലെ ക്രിസ്ത്യൻ ജനസംഖ്യാ വിഹിതം 22 ശതമാനത്തിൽ നിന്ന് 11 ശതമാനമായി കുറയും. 2065-ഓടെ അമേരിക്കയ്ക്ക് ക്രിസ്ത്യൻ ഭൂരിപക്ഷം നഷ്ടപ്പെടുമെങ്കിലും 2070-ലും അവിടെ ഏറ്റവും വലിയ വിഭാഗം ക്രിസ്ത്യാനികൾ തന്നെയായിരിക്കും; കുടിയേറ്റത്തിലൂടെ അമേരിക്ക ലോകത്തിലെ അഞ്ചാമത്തെ വലിയ ഹിന്ദു ജനസംഖ്യയുള്ള രാജ്യമായി മാറുമെന്നും പഠനം പറയുന്നു.

India to Remain Overwhelmingly Hindu in 2070 as Muslim Share Reaches 20%, Says New Pew Study
ഹിന്ദു മതം വിട്ട് ഇസ്‌ലാം സ്വീകരിച്ച വ്യക്തിക്ക് മുസ്‌ലിം ഒബിസി സംവരണത്തിന് അർഹതയില്ല; സുപ്രീം കോടതിയുടെ സുപ്രധാന വിധി

മതത്തിൽ വിശ്വസിക്കാത്തവരുടെ എണ്ണം 2070-ഓടെ യു.കെ, ഫ്രാൻസ്, ദക്ഷിണ കൊറിയ, ഓസ്‌ട്രേലിയ എന്നിവിടങ്ങളിൽ ഭൂരിപക്ഷമാകുമെങ്കിലും ചൈനയിലെ ജനസംഖ്യാ ഇടിവ് കാരണം ആഗോളതലത്തിൽ ഇവരുടെ വിഹിതം 24 ശതമാനത്തിൽ നിന്ന് 17 ശതമാനമായി കുറയും. കിഴക്കൻ ഏഷ്യയിലെ ജനസംഖ്യാ കുറവ് കാരണം ചൈന, ജപ്പാൻ, ദക്ഷിണ കൊറിയ എന്നിവിടങ്ങളിൽ ബുദ്ധമതക്കാരുടെ എണ്ണം പകുതിയിലധികം കുറയുമെന്നും, ലാവോസിനും മംഗോളിയയ്ക്കും ബുദ്ധമത ഭൂരിപക്ഷം നഷ്ടപ്പെടുമെന്നും റിപ്പോർട്ട് വ്യക്തമാക്കുന്നു.

യുദ്ധങ്ങൾ, പ്രകൃതിദുരന്തങ്ങൾ, പകർച്ചവ്യാധികൾ, സാമൂഹിക-സാമ്പത്തിക മാറ്റങ്ങൾ എന്നിവ പഠനത്തിൽ ഉൾപ്പെടുത്തിയിട്ടില്ലെന്നും, ഇന്ത്യയിലെ പുതിയ സെൻസസ് വൈകിയതിനാൽ 2011-ലെ സെൻസസ് അടിസ്ഥാനമാക്കിയാണ് 2020-ലെ കണക്കുകൾ അനുമാനിച്ചതെന്നും പ്യൂ വ്യക്തമാക്കിയിട്ടുണ്ട്. ചുരുക്കത്തിൽ, 2070-ലെ ലോകത്തിന്റെ മതപരമായ ഭൂപടം മതപരിവർത്തനത്തേക്കാൾ ഉപരി ജനനം, മരണം, കുടിയേറ്റം എന്നിവയെ അടിസ്ഥാനമാക്കിയായിരിക്കും രൂപപ്പെടുകയെന്നാണ് പഠനം ചൂണ്ടിക്കാട്ടുന്നത്.