ഡൽഹി: കോക്രോച്ച് ജനതാ പാർട്ടി മാർച്ചിനിടെ ഉണ്ടായ പൊലീസ് അതിക്രമങ്ങളെക്കുറിച്ച് അന്വേഷിക്കാൻ രൂപീകരിച്ച ഉന്നതതല സമിതി പുനസംഘടിപ്പിക്കണമെന്ന ആവശ്യം സുപ്രീം കോടതി നിരസിച്ചു. സമിതിക്കെതിരെ ഉന്നയിച്ച ആക്ഷേപങ്ങൾ കേവലം മുൻവിധികളുടെ അടിസ്ഥാനത്തിലുള്ളതാണെന്ന് കോടതി നിരീക്ഷിച്ചു.
ചീഫ് ജസ്റ്റിസ് സൂര്യകാന്ത്, ജസ്റ്റിസ് ജോയ്മാല്യ ബാഗ്ചി, ജസ്റ്റിസ് വി. മോഹന എന്നിവരടങ്ങിയ ബെഞ്ചാണ് ഈ ഉത്തരവ് പുറപ്പെടുവിച്ചത്. സുപ്രീം കോടതിയുടെ നേരിട്ടുള്ള മേൽനോട്ടത്തിലാണ് ഈ സമിതി പ്രവർത്തിക്കുന്നത്. അതിനാൽ സമിതി കോടതിയുടെ തന്നെ ഭാഗമാണെന്നും, നിഷ്പക്ഷതയെ മുൻകൂട്ടി സംശയിക്കേണ്ടതില്ലെന്നും ബെഞ്ച് വ്യക്തമാക്കി.
മുൻ സുപ്രീംകോടതി ജഡ്ജി ജസ്റ്റിസ് ആർ. സുഭാഷ് റെഡിയുടെ നേതൃത്വത്തിലുള്ള അഞ്ച് അംഗ സമിതി തന്നെ അന്വേഷണവുമായി മുന്നോട്ട് പോകുമെന്ന് കോടതി വ്യക്തമാക്കി. പെല്ലറ്റ് ഗണ്ണുകളുടെ ഉപയോഗം, വനിതാ പ്രതിഷേധക്കാർക്ക് നേരെയുണ്ടായ അതിക്രമങ്ങൾ, പൊതുമുതൽ നശിപ്പിക്കൽ, പൊലീസുകാർക്കുണ്ടായ പരിക്കുകൾ എന്നിവയ്ക്കായിരിക്കും സമിതി മുൻഗണന നൽകുക.
സാക്ഷികളുടെ സുരക്ഷ ഉറപ്പാക്കാനും വിവരങ്ങൾ രഹസ്യമായി സമർപ്പിക്കാനുമായി പ്രത്യേക ഓൺലൈൻ പോർട്ടൽ ആരംഭിക്കാൻ സമിതിക്ക് അനുമതി നൽകിയിട്ടുണ്ട്. ഈ കേസിലെ മറ്റ് ഭരണഘടനാപരമായ ചോദ്യങ്ങൾ പിന്നീട് നേരിട്ട് പരിശോധിക്കുന്നതായിരിക്കുമെന്നും കോടതി പറഞ്ഞു.