ഡല്‍ഹിയില്‍ സിജെപി പ്രക്ഷോഭകര്‍ക്കെതിരായ കേന്ദ്ര സര്‍ക്കാര്‍ നടപടികളെ വിമര്‍ശിച്ച് കോണ്‍ഗ്രസ് എംപി ശശി തരൂര്‍. തങ്ങളുടെ തെരഞ്ഞെടുപ്പുകളുടെ നീതിയിൽ ആത്മവിശ്വാസമുള്ള ഒരു സർക്കാർ അവയെക്കുറിച്ചുള്ള ചോദ്യങ്ങളെ സ്വാഗതം ചെയ്യും. സര്‍ക്കാര്‍ ഉത്തരങ്ങളാണ് നല്‍കേണ്ടത്, ലാത്തികളല്ല; അഭിപ്രായമാണ് പറയേണ്ടത്, അടിച്ചമര്‍ത്തലല്ല. കസ്റ്റഡിയിലെടുത്തവരെ മോചിപ്പിക്കേണ്ടി വരും. പ്രതിഷേധക്കാർ തിങ്കളാഴ്ച തിരിച്ചെത്തിയാൽ, അധികാരികൾ വീണ്ടും രാജ്യതലസ്ഥാനം പൂട്ടിയിടുമോ? നമ്മുടെ ജെന്‍ സികള്‍ ഒരു അപ്രഖ്യാപിത അടിയന്തരാവസ്ഥയേക്കാള്‍ നല്ലത് അർഹിക്കുന്നുണ്ടെന്നും തരൂര്‍ എക്സില്‍ കുറിച്ചു.
തരൂര്‍ പങ്കുവച്ച കുറിപ്പ്
പുലർച്ചെ രണ്ടിനു ശേഷമാണ് ഞാന്‍ രാജ്യതലസ്ഥാനത്ത് മടങ്ങിയെത്തിയത്. ഡല്‍ഹി ഇപ്പോള്‍ സാക്ഷ്യം വഹിക്കുന്നതുപോലെയുള്ള ഒന്ന് വളരെ അപൂര്‍വമായേ കണ്ടിട്ടുള്ളൂ. ഓരോ നൂറു മീറ്ററിലും ചെക്ക്‌പോസ്റ്റുകൾ, നമ്മുടെ റോഡുകളിലെല്ലാം കോൺക്രീറ്റ് ബാരിയറുകൾ, സ്‌പൈക്ക് സ്ട്രിപ്പുകൾ എന്നിവ സ്ഥാപിച്ചിട്ടുണ്ട്, നഗരത്തിലുടനീളം 22,000 പൊലീസിന്റെയും അർദ്ധസൈനികരുടെയും യുദ്ധസമാനമായ വിന്യാസം, 250 ട്രെയിനുകൾ റദ്ദാക്കി, 45 മെട്രോ സ്റ്റേഷനുകൾ അടച്ചുപൂട്ടി, ഡൽഹിയിലും പരിസര പ്രദേശങ്ങളിലും സ്വന്തം വീടുകളിൽ നിന്നും തെരുവുകളിൽ നിന്നും യുവാക്കളെ കസ്റ്റഡിയിലെടുത്തതായി റിപ്പോർട്ടുകൾ - ഇതെല്ലാം നമ്മുടെ തെരഞ്ഞെടുപ്പിന്റെ സമഗ്രതയെക്കുറിച്ച് പൗരന്മാർ സമാധാനപരമായി ചോദ്യങ്ങൾ ഉന്നയിക്കുന്നത് തടയാൻ വേണ്ടിയായിരുന്നു. രാജ്യതലസ്ഥാനത്തിന്റെ ഹൃദയഭാഗത്ത് ഇന്റർനെറ്റ് താൽക്കാലികമായി നിർത്തിവച്ചതാണ് ഏറ്റവും പിന്തിരിപ്പൻ (അതുപോലെ തന്നെ അടിച്ചമർത്തൽ) നടപടി.
സഞ്ചാര സ്വാതന്ത്ര്യം പൂർണമായും അടച്ചിരിക്കുന്നു. ഡൽഹിയുടെ മധ്യഭാഗത്ത് പൗരന്മാർക്ക് വിയോജിപ്പ് പ്രകടിപ്പിക്കാൻ കഴിയുന്ന തരത്തിലാണ് ജന്തർ മന്തർ നിയുക്തമാക്കിയത്, എന്നാലിന്ന് അങ്ങോട്ടുള്ള റോഡുകൾ പോലും പരിധിക്കു പുറത്താണെന്ന് പ്രഖ്യാപിക്കപ്പെട്ടിരിക്കുന്നു. രാജ്യ തലസ്ഥാനത്ത് സ്ത്രീകൾക്ക് സംരക്ഷണം ആവശ്യമുള്ളപ്പോൾ ഈ അസാധാരണ മനുഷ്യശക്തിയും കാര്യഗൗരവവും എവിടെയാണ് അപ്രത്യക്ഷമാകുന്നത് എന്ന് ചോദിക്കാൻ ഒരാൾക്ക് അവകാശമുണ്ട്.
കസ്റ്റഡിയിലെടുത്തവരെ മോചിപ്പിക്കേണ്ടി വരും. പ്രതിഷേധക്കാർ തിങ്കളാഴ്ച തിരിച്ചെത്തിയാൽ, അധികാരികൾ രാജ്യ തലസ്ഥാനം വീണ്ടും പൂട്ടിയിടുമോ? നമ്മുടെ ജെന്‍ സികള്‍ ഒരു അപ്രഖ്യാപിത അടിയന്തരാവസ്ഥയേക്കാള്‍ (Emer-GenZ) നല്ലത് അർഹിക്കുന്നു.
തങ്ങളുടെ തെരഞ്ഞെടുപ്പുകളുടെ നീതിയിൽ ആത്മവിശ്വാസമുള്ള ഒരു സർക്കാർ അവയെക്കുറിച്ചുള്ള ചോദ്യങ്ങളെ സ്വാഗതം ചെയ്യും, അതേസമയം അവയെ ഒഴിവാക്കാൻ തലസ്ഥാനത്തെ ഒരു കോട്ടയാക്കി മാറ്റുന്നത്, അവര്‍ അടിച്ചമർത്താൻ ശ്രമിക്കുന്ന സംശയങ്ങളെ കൂടുതൽ ആഴത്തിലാക്കുകയേയുള്ളൂ. സര്‍ക്കാര്‍ ഉത്തരങ്ങളാണ് നല്‍കേണ്ടത്, ലാത്തികളല്ല; അഭിപ്രായമാണ് പറയേണ്ടത്, അടിച്ചമര്‍ത്തലല്ല.
തെരഞ്ഞെടുപ്പ് കമ്മീഷനിൽ വിശ്വാസം പുനഃസ്ഥാപിക്കാൻ ബാരിക്കേഡുകൾക്ക് ഒന്നും ചെയ്യാനാവില്ല. പൊതുജനങ്ങളുടെ ചോദ്യങ്ങൾക്ക് എത്രയും വേഗം ഉത്തരം നൽകുന്നുവോ അത്രയും വേഗം ശാന്തത പുനഃസ്ഥാപിക്കപ്പെടും. തങ്ങളുടെ പ്രവര്‍ത്തനത്തെ ചോദ്യം ചെയ്യുന്നവരെ എങ്ങനെ പരിഗണിക്കുന്നു എന്നത് അടിസ്ഥാനമാക്കിയാണ് ഒരു ജനാധിപത്യത്തിന്റെ ശക്തി അളക്കുന്നത്. ഇന്ന് നമ്മൾ കണ്ടത് തികച്ചും ലജ്ജാകരവും മനസാക്ഷിക്ക് നിരക്കാത്തതുമാണ്.