ഡൽഹി: ദീപാവലി പ്രമാണിച്ച് ഡൽഹി-എൻസിആറിൽ അംഗീകൃത ഹരിത പടക്കങ്ങൾ പൊട്ടിക്കാൻ സുപ്രീംകോടതി അനുമതി നൽകി. നവംബർ ഏഴ്, എട്ട് തീയതികളിൽ മാത്രമാണ് ഉപാധികളോടെ അനുമതിയുള്ളത്. ഈ തീയതികളിൽ രാവിലെ ആറ് മുതൽ ഏഴ് വരെയും, രാത്രി എട്ട് മുതൽ പത്ത് വരെയും മാത്രമേ പടക്കം പൊട്ടിക്കാൻ അനുവാദമുള്ളൂ. ഈ നിയന്ത്രിത സമയത്തിന് പുറത്ത് പടക്കം പൊട്ടിക്കുന്നത് കർശനമായി തടയാൻ അധികാരികൾക്ക് നിർദേശം നൽകിയിട്ടുണ്ട്.
നവംബർ ഒൻപത് മുതൽ പടക്കങ്ങൾക്കുള്ള പൂർണ നിരോധനം വീണ്ടും നിലവിൽ വരും. കഴിഞ്ഞ വർഷം ഒക്ടോബർ 15ന് പുറപ്പെടുവിച്ച ഉത്തരവിലെ അതേ മാർഗനിർദേശങ്ങൾ പാലിച്ചാണ് ഇത്തവണയും അനുമതി നൽകിയിട്ടുള്ളത്.
ആശുപത്രികൾ, നഴ്സിങ് ഹോമുകൾ,ആരോഗ്യ കേന്ദ്രങ്ങൾ, വയോജന മന്ദിരങ്ങൾ, വിദ്യാഭ്യാസ സ്ഥാപനങ്ങൾ എന്നിവയുടെ 300 മീറ്റർ ചുറ്റളവിൽ പടക്കം പൊട്ടിക്കുന്നതിന് വിലക്കുണ്ട്. ഇത്തരം പ്രദേശങ്ങൾ നോ-ക്രാക്കർ സോണുകൾ ആയി മുൻകൂട്ടി അടയാളപ്പെടുത്താനും പൊതുജനങ്ങളെ അറിയിക്കാനും ഉത്തരവിൽ പറയുന്നു.
നവംബർ എട്ടാം തീയതിയാണ് രാജ്യത്ത് ദീപാവലി ആഘോഷിക്കുന്നത്. അഞ്ച് ദിവസം നീണ്ടുനിൽക്കുന്ന പരമ്പരാഗത ദീപാവലി ആഘോഷങ്ങളുടെ പ്രധാന ദിവസമായ ലക്ഷ്മി പൂജ നടക്കുന്നത് നവംബർ എട്ടിനാണ്. ഈ ദിവസം വീടുകളിൽ വിളക്കുകൾ തെളിയിക്കുകയും മധുരം പങ്കുവെക്കുകയും ചെയ്യും.