ശ്രീലങ്കയില്‍ കനത്ത നാശനഷ്ടം വിതച്ച ഡിറ്റ് വാ ചുഴലിക്കാറ്റ് തമിഴ്നാട്-പുതുച്ചേരി തീരത്തേക്ക് അടുത്തതോടെ തീരപ്രദേശങ്ങളോട് ചേര്‍ന്നുള്ള പല ഭാഗത്തും കനത്ത മഴ തുടരുകയാണ്. ഡീറ്റ് വാ, സെന്‍യാര്‍, മൊന്‍-താ, ഫെന്‍ജല്‍... അടുത്തിടെ ഭീതിപരത്തിയ ചുഴലിക്കാറ്റുകളുടെ പേരുകള്‍ ഇങ്ങനെയാണ്. ചുഴലിക്കാറ്റുകള്‍ക്ക് വിചിത്രമായ ഇത്തരം പേരുകള്‍ എങ്ങനെ ലഭിക്കുന്നു എന്ന് ആലോചിച്ചിട്ടുണ്ടോ?
ബംഗാള്‍ ഉള്‍ക്കടലിലും അറബിക്കടലിലും രൂപപ്പെടുന്ന ചുഴലിക്കാറ്റുകള്‍ക്ക് പേര് നല്‍കുന്ന ഒരു സംവിധാനം നിലവിലുണ്ട്. ഈ രീതി അനുസരിച്ചാണ് ഏറ്റവും ഒടുവില്‍ രൂപപ്പെട്ട ചുഴലിക്കാറ്റിന് 'ഡിറ്റ് വാ' എന്ന പേര് വന്നത്. യെമന്‍ ആണ് ഡീറ്റ് വാ എന്ന് പേര് നിര്‍ദേശിച്ചത്. യെമനിലെ സോകോത്ര ദ്വീപിലുള്ള 'ഡെറ്റ് വാ ലഗൂണ്‍' എന്ന പ്രസിദ്ധമായ പ്രദേശത്തെയാണ് ഈ പേര് സൂചിപ്പിക്കുന്നത്.
ലോക കാലാവസ്ഥാ സംഘടനയുടെ ഏഷ്യന്‍ പാനലാണ് ബംഗാള്‍ ഉള്‍ക്കടല്‍, അറബിക്കടല്‍ ഉള്‍പ്പെടുന്ന വടക്കന്‍ ഇന്ത്യന്‍ മഹാസമുദ്രത്തില്‍ രൂപപ്പെടുന്ന ചുഴലിക്കാറ്റുകള്‍ക്ക് പേര് നല്‍കുന്നത്. ബംഗ്ലാദേശ്, ഇന്ത്യ, ഇറാന്‍, മാലിദ്വീപ്, മ്യാന്‍മര്‍, ഒമാന്‍, പാകിസ്ഥാന്‍, ഖത്തര്‍, സൗദി അറേബ്യ, ശ്രീലങ്ക, തായ്ലന്‍ഡ്, യുഎഇ, യെമന്‍ എന്നീ 13 രാജ്യങ്ങളാണ് പാനലിലുള്ളത്.
ഓരോ രാജ്യവും 13 പേരുകള്‍ വീതം നിര്‍ദേശിക്കുകയും ഇവ ഉള്‍പ്പെടുത്തി പട്ടിക തയ്യാറാക്കുകയും ചെയ്യും. ചുഴലിക്കാറ്റ് രൂപപ്പെട്ട്, അതിന്റെ വേഗത ഒരു നിശ്ചിത പരിധി (മണിക്കൂറില്‍ 34 നോട്ട് അല്ലെങ്കില്‍ അതില്‍ കൂടുതല്‍) കടക്കുമ്പോള്‍, പട്ടികയില്‍ അടുത്തതായി നല്‍കിയിട്ടുള്ള പേര് ക്രമമനുസരിച്ച് നല്‍കുന്നു.
രാജ്യങ്ങളുടെ പേരിന്റെ അക്ഷരമാല ക്രമത്തിലാണ് പട്ടികയില്‍ പേരുകള്‍ ഉള്‍പ്പെടുത്തിയിരിക്കുന്നത്, ഓരോ രാജ്യവും നല്‍കിയ പേരുകള്‍ ഉപയോഗിക്കുന്നതിനും പ്രത്യേക ക്രമം പാലിക്കുന്നു.
ഡീറ്റ് വാ എന്ന പേര് യെമന്‍ നല്‍കിയ പേരുകളുടെ പട്ടികയില്‍ രണ്ടാമത്തേതായിരുന്നു. 2023 ലുണ്ടായ മോച്ച ചുഴലിക്കാറ്റിന് പേര് നല്‍കിയതും യെമന്‍ ആയിരുന്നു.
പേരുകള്‍ നീക്കം ചെയ്യുന്നതും എല്ലാ പേരുകളും ഉപയോഗിച്ച് കഴിഞ്ഞാലും എന്ത് ചെയ്യും?
പട്ടികയിലെ എല്ലാ പേരുകളും ഉപയോഗിച്ച് കഴിഞ്ഞാല്‍ അടുത്ത പടി എന്തായിരിക്കും? വലിയ നാശനഷ്ടങ്ങളുണ്ടാക്കിയ ചുഴലിക്കാറ്റിന്റെ പേര് ഭാവിയില്‍ ഉപയോഗിക്കാതിരിക്കാന്‍ ആ പേരുകള്‍ പട്ടികയില്‍ നിന്ന് നീക്കം ചെയ്യും. ദുരന്തങ്ങള്‍ സംഭവിച്ച ഒരു പേര് വീണ്ടും ഉപയോഗിക്കുന്നത്, ആ ദുരന്തത്തിന്റെ ഓര്‍മ്മകളെ ഉണര്‍ത്താനും ആശയക്കുഴപ്പങ്ങള്‍ ഉണ്ടാക്കാനും സാധ്യതയുണ്ട്. 'കത്രീന', 'ഫാണി', 'ഓഖി' തുടങ്ങിയ ചുഴലിക്കാറ്റുകളുടെ പേരുകള്‍ അവ ഉണ്ടാക്കിയ വലിയ നാശനഷ്ടങ്ങള്‍ കാരണം പട്ടികയില്‍ നിന്ന് നീക്കം ചെയ്തിട്ടുണ്ട്.
പേര് നീക്കം ചെയ്തതിന് ശേഷം, പേര് നല്‍കിയ രാജ്യം അടുത്ത യോഗത്തില്‍ ആ പേരിന് പകരമായി പുതിയൊരു പേര് നിര്‍ദ്ദേശിക്കുകയും അത് പട്ടികയില്‍ ചേര്‍ക്കുകയും ചെയ്യും.
നിലവില്‍ 13 രാജ്യങ്ങള്‍ നിര്‍ദേശിച്ച 169 പേരുകളുടെ വലിയ പട്ടികയുണ്ട്. ഈ പട്ടികയിലെ എല്ലാ പേരുകളും ഉപയോഗിച്ചു കഴിഞ്ഞാല്‍ പുതിയൊരു പട്ടിക തയ്യാറാക്കും. നിലവിലുള്ള പട്ടിക 2020-ല്‍ പ്രസിദ്ധീകരിച്ചതാണ്. ഈ 169 പേരുകള്‍ ഉപയോഗിച്ച് തീരാന്‍ ഇരുപത് വര്‍ഷത്തില്‍ കൂടുതല്‍ എടുക്കുമെന്നാണ് പ്രതീക്ഷിക്കുന്നത്.