ടെൽ അവീവ്: ഇസ്രയേൽ പൊതുതെരഞ്ഞെടുപ്പിൽ തൂക്കുസഭ പ്രവചിച്ച് എക്സിറ്റ് പോളുകൾ. പ്രധാനമന്ത്രി ബെഞ്ജമിൻ നെതന്യാഹുവിൻ്റെ ലികുഡ് പാർട്ടി 50 നും 52നുമിടയിൽ സീറ്റുകളോടെ ഏറ്റവും വലിയ ഒറ്റകക്ഷിയാകുമെന്ന് പ്രവചനം. എങ്കിലും ഭരണം പിടിക്കാൻ ആവശ്യമായ സീറ്റുകൾ സമാഹരിക്കുന്നതിൽ നെതന്യാഹുവിന്റെ സഖ്യവും പ്രതിപക്ഷ മുന്നണിയും ഒരുപോലെ പരാജയപ്പെടുമെന്നാണ് പ്രവചനം. ഗാധി ഐസെൻകോട്ടിൻ്റെ യാഷർ പാർട്ടിക്ക് 50 സീറ്റ് വരെ ലഭിക്കാനാണ് സാധ്യത. ഇവിടെ നിർണായകമാകുന്ന അറബ് കൂട്ടായ്മയ്ക്ക് 19 സീറ്റുകൾ വരെയാണ് എക്സിറ്റ് പോളുകൾ പ്രവചിക്കുന്നത്. അതേസമയം, ജെറുസലേമിൽ ദേശീയ വലത് സഖ്യത്തിന് ആഹ്വാനം ചെയ്തിരിക്കുകയാണ് നെതന്യാഹു.
ചാനൽ 12, ചാനൽ 13, പബ്ലിക് ബ്രോഡ്കാസ്റ്ററായ കാൻ (Kan) എന്നിവ പുറത്തുവിട്ട എക്സിറ്റ് പോളുകളിലാണ് ഇസ്രായേൽ വീണ്ടും രാഷ്ട്രീയ അനിശ്ചിതത്വത്തിലേക്ക് നീങ്ങുമെന്ന സൂചന നൽകുന്നത്. 24 മുതൽ 25 വരെ സീറ്റുകൾ നേടി നെതന്യാഹുവിന്റെ ലിക്യുഡ് (Likud) പാർട്ടി ഏറ്റവും വലിയ ഒറ്റക്കക്ഷിയായേക്കും. എന്നാൽ ഗാഡി ഐസൻകോട്ട് നയിക്കുന്ന മധ്യവർഗ്ഗ പാർട്ടിയായ 'യാഷാർ' (Yashar) 21 മുതൽ 23 വരെ സീറ്റുകളും പ്രവചിക്കപ്പെടുന്നുണ്ട്.
ഈ ഇഞ്ചോടിഞ്ച് ഫലങ്ങൾ വന്നാൽ നെതന്യാഹു വിരുദ്ധ പ്രതിപക്ഷ സഖ്യത്തിന് 52 മുതൽ 53 സീറ്റുകൾ വരെ ലഭിക്കുമ്പോൾ, നെതന്യാഹുവിനെ പിന്തുണയ്ക്കുന്ന വലതുപക്ഷ മുന്നണിക്ക് 50 സീറ്റുകൾ മാത്രമേ ലഭിക്കൂ.120 അംഗങ്ങളുള്ള നെസറ്റിൽ (Knesset) സർക്കാർ രൂപീകരിക്കാൻ 61 സീറ്റുകളുടെ പിന്തുണ വേണം. നിലവിലെ സാഹചര്യത്തിൽ ഇരുപക്ഷത്തിനും ഇത് തികയ്ക്കാനാവില്ല.
ഒരു മുന്നണിക്കും സഖ്യമുണ്ടാക്കാൻ സാധിച്ചില്ലെങ്കിൽ ഇസ്രയേൽ വീണ്ടും മറ്റൊരു തെരഞ്ഞെടുപ്പിലേക്ക് നീങ്ങും. 2019-2022 കാലയളവിൽ അഞ്ച് തവണയാണ് ഇസ്രായേലിൽ പൊതുതിരഞ്ഞെടുപ്പ് നടന്നത്. പുതിയ സർക്കാർ അധികാരമേൽക്കുന്നത് വരെ നെതന്യാഹു തന്നെയാകും താൽക്കാലിക പ്രധാനമന്ത്രിയായി തുടരുക. ഔദ്യോഗിക വോട്ടെണ്ണൽ പുരോഗമിക്കുകയാണ്.