പുതിയതായി അമേരിക്കൻ പ്രസിഡൻ്റ് ഡൊണാൾഡ് ട്രംപ് ഒപ്പുവച്ച 'ബിഗ് ബ്യൂട്ടിഫുൾ ബിൽ' പ്രകാരം കുടിയേറ്റേതര വിസ വിഭാഗങ്ങൾക്ക് 250 ഡോളറിന്റെ പുതിയ 'വിസ ഇന്റഗ്രിറ്റി ഫീസ്' അവതരിപ്പിച്ചു. ഇതോടെ ടൂറിസം, പഠനം, ജോലി തുടങ്ങിയ ആവശ്യങ്ങൾക്കായി യുഎസ് സന്ദർശിക്കാൻ പദ്ധതിയിടുന്ന ഇന്ത്യൻ അപേക്ഷകർക്ക് 2026 മുതൽ വിസ ചെലവ് ഗണ്യമായി വർധിക്കും. 16,000 രൂപയിൽ താഴെ ചെലവുണ്ടായിരുന്ന ഒരു സാധാരണ ടൂറിസ്റ്റ് വിസയ്ക്ക് ഇനി മുതൽ 40,000 രൂപയിൽ കൂടുതൽ ചെലവാകും.
എന്താണ് യുഎസ് വിസ ഇന്റഗ്രിറ്റി ഫീസ്?
നിലവിലുള്ള വിസ ചെലവുകൾക്കൊപ്പം റീഫണ്ട് ചെയ്യാനാവാത്ത പുതിയ $250 (21,400 രൂപ) സർചാർജ് കൂടി ചേർത്താണ് യുഎസ് വിസ ഇന്റഗ്രിറ്റി ഫീസ്.
- വിസ നൽകുന്ന സമയത്ത് ഇത് നിർബന്ധമായിരിക്കും.
- 2026 മുതൽ പ്രാബല്യത്തിൽ വരും.
- കൺസ്യൂമർ പ്രൈസ് ഇൻ്റക്സ് (സിപിഐ) അളക്കുന്ന പണപ്പെരുപ്പത്തെ അടിസ്ഥാനമാക്കി, ഫീസ് വർഷം തോറും പരിഷ്കരിക്കും.
ആരാണ് ഈ ഫീസ് അടക്കേണ്ടത്?
B-1/B-2 (ടൂറിസ്റ്റ്, ബിസിനസ് വിസകൾ), F, M (വിദ്യാർഥി വിസകൾ), H-1B (വർക്ക് വിസകൾ), J (എക്സ്ചേഞ്ച് വിസിറ്റർ വിസകൾ) എന്നിവയുൾപ്പെടെ മിക്ക നോൺ-ഇമിഗ്രന്റ് വിസകൾക്കും ഈ ഫീസ് ബാധകമാണ്. എ, ജി വിഭാഗങ്ങളിലെ നയതന്ത്ര വിസ ഉടമകൾക്ക് മാത്രമേ ഇളവ് ലഭിക്കൂ.
ഇന്ത്യൻ യാത്രക്കാരെ സംബന്ധിച്ചിടത്തോളം, വിദ്യാർഥികൾ, ടെക് പ്രൊഫഷണലുകൾ, വിനോദസഞ്ചാരികൾ, യുഎസിലേക്കുള്ള ബിസിനസ് യാത്രക്കാർ എന്നിവരെയെല്ലാം അധിക നിരക്ക് ബാധിക്കുമെന്നാണ് ഇതിനർഥം.
എത്രയാകും ചിലവാകുക?
നിലവിൽ, ഒരു യുഎസ് ബി-1/ബി-2 വിസയ്ക്ക് 185 ഡോളർ ചിലവ് വരും, അതായത് 15,800 രൂപയിൽ കൂടുതൽ. വിസ ഇന്റഗ്രിറ്റി ഫീസ്, I-94 ഫീസ് ($24), ഇഎസ്ടിഎ ഫീസ് ($13) തുടങ്ങിയ മറ്റ് ചെറിയ ഫീസുകൾ എന്നിവ കൂടി ചേർക്കുന്നതോടെ മൊത്തം ചെലവ് ഏകദേശം $472 അഥവാ 40,502 രൂപയായി ഉയരും. ഇത് നിലവിലുള്ള വിസ ചെലവിന്റെ 2.5 ഇരട്ടിയിലധികമാണ്. എഫ് അല്ലെങ്കിൽ എച്ച്-1ബി പോലുള്ള വിസകൾക്ക് അപേക്ഷിക്കുന്ന വിദ്യാർഥികൾക്കോ ജീവനക്കാർക്കോ, ചെലവുകളും കുത്തനെ ഉയരും.
ഈ ഫീസ് തിരികെ ലഭിക്കുമോ?
ഫീസ് ഒഴിവാക്കാനോ കുറയ്ക്കാനോ കഴിയില്ലെങ്കിലും, ചില വ്യവസ്ഥകൾക്ക് വിധേയമായി അത് തിരികെ നൽകാവുന്നതാണ്. വിസ കാലാവധി കഴിഞ്ഞതിന് ശേഷം അഞ്ച് ദിവസത്തിനുള്ളിൽ യുഎസിൽ നിന്ന് പുറത്തുപോകുക, താമസം നിയമപരമായി നീട്ടുക അല്ലെങ്കിൽ സ്റ്റാറ്റസ് മാറ്റുക (ഉദാഹരണത്തിന് - ഗ്രീൻ കാർഡ് നേടുക) തുടങ്ങിയ എല്ലാ വിസ നിബന്ധനകളും വിസ ഉടമ പാലിക്കുകയാണെങ്കിൽ, അവർക്ക് റീഫണ്ടിന് അർഹതയുണ്ടായിരിക്കാം. ഒരു വ്യക്തി വിസ നിയമങ്ങൾ ലംഘിക്കുകയോ കാലാവധി കഴിഞ്ഞിട്ടും രാജ്യത്ത് തങ്ങുകയോ ചെയ്താൽ, റീഫണ്ട് ബാധകമാകില്ല.
എന്തുകൊണ്ടാണ് യുഎസ് ഈ ഫീസ് ചുമത്തിയത്?
രാജ്യം സന്ദർശിക്കുന്ന വിദേശ പൗരന്മാർക്കിടയിൽ നിയമാനുസൃതമായ പെരുമാറ്റം പ്രോത്സാഹിപ്പിക്കുന്നതിനുള്ള സുരക്ഷാ നടപടിയായാണ് യുഎസ് ഈ ഫീസ് ഏർപ്പെടുത്തിയത്. സന്ദർശകരെ അവരുടെ വിസയുടെ നിയമങ്ങൾ പാലിക്കാൻ പ്രോത്സാഹിപ്പിക്കുന്ന ഒരു സുരക്ഷാ നിക്ഷേപമായി പ്രവർത്തിക്കുന്നതിനായാണ് ഇത് രൂപകൽപ്പന ചെയ്തിരിക്കുന്നത്.