ആറോ ഏഴോ അംഗങ്ങളുള്ള കുടുംബത്തിന് സുഖമായി സഞ്ചരിക്കാൻ ഫൈവ് സീറ്റർ കാറുകൾ നല്ല ഓപ്ഷനായിരിക്കില്ല. തിക്കി തിരക്കിയുള്ള യാത്രകൾ അത്ര സുഖമുള്ള പരിപാടിയുമല്ല.
ഈ സാഹചര്യത്തിൽ ഇന്ത്യയിലെ സെവൻ സീറ്റർ കാർ വിഭാഗത്തിൽ നിരവധി മോഡലുകൾ ലഭ്യമാണ്. മാത്രമല്ല, ഈ മോഡലുകളിൽ പലതും സിഎൻജി കിറ്റുകളുമായാണ് വരുന്നത്. അതിനർഥം ഏഴ് പേർക്ക് സ്ഥലം നൽകുന്നതിനൊപ്പം മികച്ച മൈലേജും അവ വാഗ്ദാനം ചെയ്യുന്നു എന്നാണ്. ഇന്ത്യയിലെ ഇടത്തരം കുടുംബങ്ങൾക്കായി അത്തരം ചില സെവൻ സീറ്റർ കാറുകളെ കുറിച്ച് അറിയാം.
മാരുതി ഈക്കോ
മാരുതി ഈക്കോയുടെ പ്രാരംഭ വില വെറും 5.21 ലക്ഷം മാത്രമാണ്. ഇതിന്റെ സിഎൻജി മോഡലിന് 6.36 ലക്ഷം മാത്രമാണ് വില. രാജ്യത്തെ ഏറ്റവും വിലകുറഞ്ഞ 7 സീറ്റർ സിഎൻജി കാർ കൂടിയാണ് ഈക്കോ. മാരുതി ഈക്കോയിൽ കെ-സീരീസ് 1.2 ലിറ്റർ എഞ്ചിനാണ് പ്രവർത്തിക്കുന്നത്.
ഇത് പെട്രോളിൽ 80.76 PS പവറും 104.5 Nm പീക്ക് ടോർക്കും ഉത്പാദിപ്പിക്കുന്നു. സിഎൻജി പതിപ്പ് 71.65 PS ഉം 95 Nm പീക്ക് ടോർക്കും ആയി കുറയുന്നു. ടൂർ വേരിയന്റിന്, പെട്രോൾ ട്രിമിന് 20.2 km/l ഉം CNG-ക്ക് 27.05 km/kg ഉം ഇന്ധനക്ഷമത കമ്പനി അവകാശപ്പെടുന്നു. പാസഞ്ചർ ട്രിമിന്, ഇന്ധനക്ഷമത പെട്രോളിന് 19.7 km/l ഉം സിഎൻജിക്ക് 26.78 km/kg ഉം ആയി കുറയുന്നു.
മാരുതി എർട്ടിഗ
താങ്ങാനാവുന്ന വിലയുള്ള എംപിവിയുടെ എക്സ്-ഷോറൂം വില 8.80 ലക്ഷം മുതൽ ₹12.94 ലക്ഷം വരെയാണ്. 103PS ഉം 137Nm ഉം ഉത്പാദിപ്പിക്കുന്ന 1.5 ലിറ്റർ പെട്രോൾ എഞ്ചിനാണ് ഇതിന് കരുത്ത് പകരുന്നത്. CNG യും ലഭ്യമാണ്. പെട്രോൾ മോഡൽ 20.51 കിലോമീറ്റർ മൈലേജ് നൽകുന്നു, അതേസമയം സിഎൻജി വേരിയന്റ് 26.11 കിലോമീറ്റർ/കിലോഗ്രാം മൈലേജ് നൽകുന്നു.
പാഡിൽ ഷിഫ്റ്ററുകൾ, ഓട്ടോ ഹെഡ്ലൈറ്റുകൾ, ഓട്ടോ എയർ കണ്ടീഷനിംഗ്, ക്രൂയിസ് കൺട്രോൾ തുടങ്ങിയ സവിശേഷതകളോടെയാണ് ഇത് വരുന്നത്. സുരക്ഷയ്ക്കായി, ആറ് എയർബാഗുകൾ സ്റ്റാൻഡേർഡാണ്. 7 ഇഞ്ച് ടച്ച്സ്ക്രീൻ യൂണിറ്റിന് പകരം 9 ഇഞ്ച് ടച്ച്സ്ക്രീൻ ഇൻഫോടെയ്ൻമെന്റ് സിസ്റ്റമാണ് എർട്ടിഗയിൽ ലഭിക്കുന്നത്.
നിസാൻ ഗ്രാവൈറ്റ്
ഈ 7 സീറ്റർ കാറിന് 5.65 ലക്ഷമാണ് (എക്സ്-ഷോറൂം) പ്രാരംഭ വില. വിസിയ, അസെന്റ, എൻ-കണക്റ്റ, ടെക്ന, ലിമിറ്റഡ് ലോഞ്ച് എഡിഷൻ എന്നീ അഞ്ച് വേരിയന്റുകളിലാണ് ഇത് വാഗ്ദാനം ചെയ്യുന്നത്. ഫോറസ്റ്റ് ഗ്രീൻ, ഓണിക്സ് ബ്ലാക്ക്, ബ്ലേഡ് സിൽവർ, സ്നോ വൈറ്റ്, മെറ്റാലിക് ഗ്രേ എന്നീ നിറങ്ങളിലും ഗ്രാവൈറ്റ് ലഭ്യമാണ്.
ലേഔട്ട്, 5+2 സീറ്റിങ് കോൺഫിഗറേഷൻ എന്നിവയിൽ ഗ്രാവൈറ്റ് ട്രൈബറിന് സമാനമാണ്. എന്നാൽ കളർ സ്കീമുകൾ വ്യത്യസ്തമാണ്. ഡാഷ്ബോർഡിന്റെ ഡിസൈൻ ലളിതമാണ്. ഒരു ത്രീ-സ്പോക്ക് ഫ്ലാറ്റ്-ബോട്ടം സ്റ്റിയറിങ് വീൽ, മൂന്ന് ക്ലൈമറ്റ് കൺട്രോൾ നോബുകൾ, ധാരാളം സ്റ്റോറേജ് സ്പേസുകൾ, 8 ഇഞ്ച് ഇൻഫോടെയ്ൻമെൻ്റ് ടച്ച് സ്ക്രീൻ, 7 ഇഞ്ച് ഡിജിറ്റൽ ഡ്രൈവർ ഡിസ്പ്ലേ എന്നിവ ഉൾപ്പെടുന്നു.