പോപ് താരം ടെയ്‌ലർ സ്വിഫ്റ്റും എന്‍എഫ്എല്‍ താരം ട്രാവിസ് കെല്‍സിയും വിവാഹിതരാകുന്നുവന്ന വാര്‍ത്തയാണ് ഇപ്പോള്‍ ട്രെന്‍ഡിങ്. ഇരുവരുടേയും എന്‍ഗേജ്‌മെന്റ് വാര്‍ത്തയാണ് ഇന്ന് ആരാധകര്‍ കേട്ടത്. എന്‍ഗേജ്‌മെന്റ് ചിത്രങ്ങള്‍ ടെയ്‌ലര്‍ സ്വിഫ്റ്റ് സോഷ്യല്‍മീഡിയിയലൂടെയാണ് ആരാധകരെ അറിയിച്ചത്.
ടെയ്‌ലര്‍ സ്വിഫ്റ്റിന്റെ എന്‍ഗേജ്‌മെന്റ് മോതിരത്തെ കുറിച്ചുള്ള വലിയ ചര്‍ച്ചകളും നടന്നു കൊണ്ടിരിക്കുകയാണ്. ഒരു വിന്റേജ് സ്‌റ്റൈല്‍ ഡിസൈനിലാണ് മോതിരം ഒരുക്കിയിരിക്കുന്നത്. പ്രശസ്ത ആഭരണ ഡിസൈനറായ കിന്‍ഡ്രെഡ് ലുബെക്കിനൊപ്പം ചേര്‍ന്നാണ് ട്രാവിസ് ഈ മോതിരം ഡിസൈന്‍ ചെയ്തത്.
ഓള്‍ഡ് മൈന്‍ കട്ട് (Old Mine Cut) ഡയമണ്ടാണ് മോതിരത്തിന്റെ പ്രധാന ആകര്‍ഷണം. പഴയകാലത്തെ ഡയമണ്ട് കട്ടിങ് രീതിയാണിത്. ഡയമണ്ടിന് പ്രത്യേക തിളക്കവും വിന്റേജ് സൗന്ദര്യവുമാണ് ഇതിന്റെ സവിശേഷത. 8 മുതല്‍ 10 കാരറ്റ് വരെ ഡയമണ്ടിന് ഭാരമുണ്ടെന്നാണ് കരുതുന്നത്. പ്രത്യേക കൊത്തുപണികള്‍ മോതിരത്തിന് ക്ലാസിക് ലുക്ക് നല്‍കുന്നു.
മോതിരത്തിന്റെ കൃത്യമായ വിലയെ കുറിച്ച് ഔദ്യോഗിക വിവരങ്ങളൊന്നുമില്ലെങ്കിലും ഈ രംഗത്തെ വിദഗ്ധര്‍ പറയുന്നത് പ്രകാരം ഏകദേശം 550,000 ഡോളര്‍ മുതല്‍ 750,000 ഡോളര്‍ വരെ വിലവരും. ഏകദേശം 4.5 കോടി മുതല്‍ 6.2 കോടി രൂപയെങ്കിലും വരും ഈ തുക.
മോതിരത്തിന്റെ ഇന്ത്യന്‍ കണക്ഷനും ആരാധകര്‍ കണ്ടെത്തിക്കഴിഞ്ഞു. 18,19 നൂറ്റാണ്ടുകളില്‍ ഇന്ത്യയില്‍ പ്രചാരത്തിലുണ്ടായിരുന്നതാണ് ഓള്‍ഡ് മൈന്‍ കട്ട്. ഡിസൈനര്‍ കിന്‍ഡ്രെഡ് ലുബെക്കിന്റെ ഇന്ത്യന്‍ ബന്ധത്തിലേക്കാണ് ഇത് ചെന്നെത്തുക.
പാരമ്പര്യമായി ആഭരണ നിര്‍മാതാക്കളായ കിന്‍ഡ്രെഡ് ലൂബെക്കിന്റെ കുടുംബം ഇന്ത്യയില്‍ നിന്നുള്ളവരാണ്. അദ്ദേഹത്തിന്റെ പൂര്‍വികര്‍ ഇന്ത്യയിലെ ആഭരണ നിര്‍മാതാക്കളായിരുന്നു. പഴയകാല ഇന്ത്യന്‍ ആഭരണ രൂപകല്‍പ്പനയെ കുറിച്ച് അറിവുള്ളവരാണ് ലൂബെക്കും.
ഈ ഇന്ത്യന്‍ പാരമ്പര്യം സ്വന്തം ഡിസൈനില്‍ അനന്യമായ ഭംഗി അവര്‍ കൊണ്ടുവരാന്‍ ശ്രമിക്കാറുണ്ട്. ടെയ്‌ലറിന്റെ മോതിരത്തിലെ വിന്റേജ് സ്‌റ്റൈല്‍, ഓള്‍ഡ് മൈന്‍ കട്ട്, കൊത്തുപണികള്‍ എന്നിവ ഇന്ത്യന്‍ ആഭരണങ്ങളുമായി സാമ്യമുള്ളതാണ്.
എന്നാല്‍, ടെയ്‌ലര്‍ സ്വിഫ്റ്റിനു വേണ്ടി രൂപകല്‍പ്പന ചെയ്ത മോതിരത്തില്‍ ഇന്ത്യന്‍ ടച്ച് കൊണ്ടുവന്നിട്ടുണ്ടെന്ന് ലൂബെക്ക് ഔദ്യോഗികമായി സ്ഥിരീകരിച്ചിട്ടില്ല.