ഗുവാഹത്തി: ഇന്ത്യക്കെതിരെ ഗുവാഹത്തിയിൽ നടക്കുന്ന രണ്ടാം ക്രിക്കറ്റ് ടെസ്റ്റിൻ്റെ ഒന്നാമിന്നിങ്സിൽ കൂറ്റൻ സ്കോർ പടുത്തുയർത്തി സന്ദർശകരായ ദക്ഷിണാഫ്രിക്ക. രണ്ടാം ദിനം മൂന്നാം സെഷനിലാണ് സന്ദർശകർ പുറത്തായത്. ആദ്യ ദിനം 81.5 ഓവറിൽ ആറ് വിക്കറ്റ് നഷ്ടത്തിൽ 247 റൺസെടുത്തിരുന്ന ദക്ഷിണാഫ്രിക്കയ്ക്കായി, രണ്ടാം ദിനം വാലറ്റക്കാർ അവിശ്വസനീയമായ ബാറ്റിങ് പ്രകടനമാണ് നടത്തിയത്.
സെനുരൻ മുത്തുസ്വാമി (109), മാർക്കോ ജാൻസൺ (93), കൈൽ വെറീൻ (45) എന്നിവർ പ്രോട്ടീസ് പടയ്ക്കായി മാച്ച് വിന്നിങ് പെർഫോമൻസാണ് നടത്തിയതെന്ന് വേണം പറയാൻ. 151.1 ഓവറിൽ 489 റൺസെടുത്താണ് ദക്ഷിണാഫ്രിക്കൻ ബാറ്റർമാർ മടങ്ങിയത്. മറുപടിയായി ഇന്ത്യ 6.1 ഓവറിൽ വിക്കറ്റ് നഷ്ടമില്ലാതെ ഒൻപത് റൺസെടുത്തു നിൽക്കെ രണ്ടാം ദിവസത്തെ കളി അവസാനിച്ചു. നിലവിൽ ദക്ഷിണാഫ്രിക്കയുടെ ഒന്നാമിന്നിങ്സ് സ്കോറിനേക്കാൾ 480 റൺസിന് പിറകിലാണ് ഇന്ത്യയുള്ളത്.
ഇന്ത്യൻ ബൗളർമാരിൽ നാല് വിക്കറ്റുമായി കുൽദീപ് യാദവ് മുന്നിലെത്തി. രവീന്ദ്ര ജഡേജ, ജസ്പ്രീത് ബുമ്ര, മുഹമ്മദ് സിറാജ് എന്നിവർ രണ്ട് വീതം വിക്കറ്റെടുത്തു. ഒന്നാം ദിനം ട്രിസ്റ്റൺ സ്റ്റബ്സ് (49), ക്യാപ്റ്റൻ ടെംപ ബാവുമ (41), എയ്ഡൻ മാർക്രം (38), റയാൻ റിക്കൽറ്റൺ (35), ടോണി ഡി സോർസി (28) എന്നിവരും ടീമിന് മികച്ച സംഭാവനകൾ നൽകിയിരുന്നു.
ഇന്ത്യൻ ടീം -
കെ.എൽ. രാഹുൽ, യശസ്വി ജയ്‌സ്വാൾ, സായ് സുദർശൻ, ധ്രുവ് ജുറേൽ, റിഷഭ് പന്ത് (ക്യാപ്റ്റൻ, വിക്കറ്റ് കീപ്പർ), രവീന്ദ്ര ജഡേജ, നിതീഷ് കുമാർ റെഡ്ഡി, വാഷിംഗ്ടൺ സുന്ദർ, കുൽദീപ് യാദവ്, ജസ്പ്രീത് ബുംറ, മുഹമ്മദ് സിറാജ്.
ദക്ഷിണാഫ്രിക്കൻ ടീം -
എയ്ഡൻ മാർക്രം, റയാൻ റിക്കെൽട്ടൺ, വിയാൻ മുൾഡർ, ടെംബ ബാവുമ (സി), ടോണി ഡി സോർസി, ട്രിസ്റ്റൻ സ്റ്റബ്സ്, കൈൽ വെറിൻ, മാർക്കോ ജാൻസൻ, സെനുരാൻ മുത്തുസാമി, സൈമൺ ഹാർമർ, കേശവ് മഹാരാജ്.