യൂസേബിയോ, പൗലോ ഫുത്രെ, ഡെക്കോ, റൂയി കോസ്റ്റ, റിക്കാർഡോ കാർവാലോ, ലൂയിസ് ഫിഗോ, ക്രിസ്റ്റ്യാനോ റൊണാൾഡോ, നാനി എന്നീ ഫുട്ബോൾ ഇതിഹാസങ്ങളെ ലോകത്തിന് സംഭാവന നൽകിയ മണ്ണ്... ബ്രൂണോ ഫെർണാണ്ടസ്, ബെർണാഡോ സിൽവ, ഡിയോഗോ ജോട്ട, നൂനോ മെൻഡസ്, വിറ്റീഞ്ഞ, ജാവോ കാൻസലോ, ഡിയോഗോ കോസ്റ്റ എന്ന് തുടങ്ങി അസംഖ്യം ഫുട്ബോൾ മജീഷ്യന്‍മാരെ ലോകത്തിന് പരിചയപ്പെടുത്തി കൊടുത്ത നാട്... പോർച്ചുഗീസുകാരുടെ 'അണ്ടർ സെവൻ്റീൻ' സ്ക്വാഡ് ചരിത്രത്തിലെ ആദ്യ ലോക കിരീടത്തിൽ മുത്തമിടുമ്പോൾ ഇപ്പറയുന്ന മുൻഗാമികളെ ഓർക്കാനും, അവരെയെല്ലാം നന്ദിയോടെ സ്മരിക്കാതിരിക്കുകയും ചെയ്യുന്നത് എങ്ങനെയാണ്.
ആദ്യമെ തന്നെ പറയട്ടെ ഒരു പോർച്ചുഗീസ് ദേശീയ ഫുട്ബോൾ ടീം നേടുന്ന ആദ്യത്തെ ലോകകപ്പ് അല്ല 2025ലേത്. 1989ലും 1991ലും ഫിഫ അണ്ടർ 20 വിഭാഗത്തിൽ തുടർച്ചയായ രണ്ട് ലോക കിരീടങ്ങൾ നേടിയിട്ടുണ്ട് മുൻഗാമികൾ. നീണ്ട 34 വർഷങ്ങൾക്ക് ശേഷം പോർച്ചുഗീസ് മണ്ണിലേക്ക് ഒരു ലോക കിരീടമെത്തുമ്പോൾ, ചുവപ്പും പച്ചയും ജേഴ്സിയെ ഹൃദയത്തിലേറ്റിയവർക്ക് ഇത് പുതുപ്രതീക്ഷയുടെ നാളുകളാണ്. സോക്കറിൻ്റെ പുതുയുഗത്തിൽ കൂടുതൽ മികച്ച നേട്ടങ്ങളാണ് പോർച്ചുഗലിനെ കാത്തിരിക്കുന്നതെന്ന് ഉറച്ചുവിശ്വസിക്കാനാണ് ആരാധകർക്ക് ഇഷ്ടം.
പോർച്ചുഗീസ് ഫുട്ബോൾ ഇതിഹാസം യൂസേബിയോ നയിച്ച പോർച്ചുഗീസ് ദേശീയ ഫുട്ബോൾ ടീം 1966 ലോകകപ്പിൽ മൂന്നാം സ്ഥാനക്കാരായതാണ് ലോകകപ്പിൽ പോർച്ചുഗീസ് ടീമിൻ്റെ ഏറ്റവും മികച്ച പ്രകടനം. പോർച്ചുഗീസുകാർ ഫുട്ബോളിൽ അത്ര മോശക്കാരല്ലെന്ന് ലോകത്തിന് മുന്നിൽ തെളിയിച്ചത് 1989ലും 1991ലുമാണ്. തുടർച്ചയായ രണ്ട് ഫിഫ അണ്ടർ 20 ലോകകപ്പ് കിരീടങ്ങൾ അവർ നേടിയിരുന്നു.
പിന്നീട് ലെജൻഡ് ക്രിസ്റ്റ്യാനോ റൊണാൾഡോയ്ക്ക് കീഴിൽ പോർച്ചുഗൽ 2006 ലോകകപ്പിൽ സെമി ഫൈനൽ വരെയെത്തി. സെമിയിൽ ഫ്രാൻസിനോട് 1-0ന് തോറ്റ പറങ്കിപ്പട... മൂന്നാം സ്ഥാനത്തിനായുള്ള പോരാട്ടത്തിൽ ജർമനിയോട് 3-1ന് അടിയറവ് പറയുകയും ചെയ്തു. എന്നാൽ റോണോയും സംഘവും ഒരു യൂറോ കപ്പും... രണ്ട് നേഷൻസ് ലീഗ് കിരീടങ്ങളും ജയിച്ചത് മാത്രമാണ് പോർച്ചുഗലിനെ ലോക ഫുട്ബോളിൽ അടയാളപ്പെടുത്തിയ ചില സന്ദർഭങ്ങൾ.
1989ൽ ലൂയിസ് ഫിഗോയുടെ നേതൃത്വത്തിലുള്ള പോർച്ചുഗൽ അണ്ടർ 16 ടീം ലോകകപ്പിൽ ബഹ്റൈനെ തോൽപ്പിച്ച് മൂന്നാം സ്ഥാനക്കാർ ആയതായിരുന്നു ഇതിന് മുമ്പത്തെ മികച്ച പ്രകടനം. എന്നാൽ ദോഹയിൽ നടന്ന അണ്ടർ 17 ലോകകപ്പ് ഫൈനലിൽ ഓസ്ട്രിയയെ ഏകപക്ഷീയമായ ഒരു ഗോളിന് വീഴ്ത്തിയാണ് റോണോയുടെ പിന്മുറക്കാർ വിശ്വകിരീടത്തിൽ മുത്തമിട്ടത്. സെമി ഫൈനലിൽ പെനാൽറ്റി ഷൂട്ടൗട്ടിലൂടെ ബ്രസീലിൻ്റെ കൗമാരപ്പടയെ അട്ടിമറിച്ചാണ് പോർച്ചുഗൽ ഫൈനലിലേക്ക് മുന്നേറിയത്.
ഓസ്ട്രിയയുടെ ജോഹന്നാസ് മോസർ എട്ട് ഗോളുകളുമായി ലോകകപ്പിലെ ടോപ് സ്കോററായി മാറിയപ്പോൾ, പോർച്ചുഗീസ് സ്ട്രൈക്കർ കബ്രാൽ ഏഴ് ഗോളുകളുമായി രണ്ടാമതെത്തി. ഫൈനലിൽ പിറന്ന ഏക ഗോൾ വന്നത് അനിസ്യോ കബ്രാലിൻ്റെ ബൂട്ടുകളിൽ നിന്നായിരുന്നു. എതിർ ഗോൾമുഖത്തെ അതിവേഗ ഓട്ടങ്ങൾ നടത്തുന്നതിലും... ക്ലിനിക്കൽ ഫിനിഷിങ് നടത്തുന്നതിലും... ഗെയിം മനസിലാക്കി നീക്കങ്ങൾ നടത്തുന്നതിലും മികവ് കാട്ടുന്ന താരമാണ് അനിസ്യോ കബ്രാൽ. പോർച്ചുഗീസ് ഇതിഹാസം ക്രിസ്റ്റ്യാനോ റൊണാൾഡോയേയും ബ്രസീലിയൻ ഇതിഹാസ സ്ട്രൈക്കർ റൊണാൾഡോ നസാരിയോയേയുമാണ് ഈ യുവതാരം ഏറെ ആരാധിക്കുന്നത്.
പോർച്ചുഗീസ് കോച്ച് ബിനോ മകേസ് കിരീടനേട്ടത്തിന് പിന്നാലെ കബ്രാലിനെ വാനോളം പ്രശംസിച്ചു. എപ്പോഴും സ്വന്തം പ്രകടനം മെച്ചപ്പെടുത്താനുള്ള കബ്രാലിൻ്റെ പ്രയത്നത്തെ അദ്ദേഹം അഭിനന്ദിച്ചു. അവൻ നല്ലോണം മെച്ചപ്പെട്ട് വരികയാണ്. ഞങ്ങൾ പറഞ്ഞുകൊടുക്കുന്ന കാര്യങ്ങൾ കേൾക്കാനും പഠിക്കാനും ഇഷ്ടപ്പെടുന്ന താരമാണ്. അതാണ് അവനെ മെച്ചപ്പെടാനും കൂടുതൽ ശക്തനാകാനും സഹായിക്കുന്നതെന്നും കോച്ച് ബിനോ വ്യക്തമാക്കി.
അണ്ടർ 17 ലോകകപ്പിൽ പോർച്ചുഗലിൻ്റെ ക്യാപ്റ്റനായിരുന്നു റാഫേൽ ക്വിൻ്റാസ്. ഒരു ഫുട്ബോൾ താരത്തിൽ സാങ്കേതിക തികവ്, ബുദ്ധിപരമായി ഫുട്ബോൾ കളിക്കാനുള്ള ശേഷി എന്നിവ സമ്മേളിക്കുമ്പോൾ അയാൾ തീർത്തും അപകടകാരിയാകും. ഈ ഗുണങ്ങളോടൊപ്പം ഓരോ മത്സരങ്ങളിലും സ്ഥിരത കൂടി പുലർത്താനാകുന്നതാണ് റാഫേൽ ക്വിൻ്റാസിനെ ലോക ഫുട്ബോളിൽ ഭാവിയുടെ താരമാക്കി മാറ്റുന്നത്.
വിശ്വജേതാക്കളായ പറങ്കിപ്പടയുടെ ബുദ്ധികേന്ദ്രമായി പ്രവർത്തിച്ചത് നായകനായ റാഫേൽ ക്വിൻ്റാസായിരുന്നു എന്നാണ് സഹതാരമായ ജോസ് നെറ്റോ വെളിപ്പെടുത്തുന്നത്. കാര്യങ്ങൾ നല്ല രീതിയിൽ നടക്കാതെ വരുമ്പോൾ ടീമിനെ ശരിയായ മാനസികാവസ്ഥയിലേക്ക് നയിക്കാനും സദാ ഉന്മേഷഭരിതരാക്കി നിലനിർത്തിയതും ക്യാപ്റ്റൻ റാഫേലായിരുന്നു എന്ന് സഹതാരം വെളിപ്പെടുത്തുന്നു.
കൗമാരപ്പട പുലിക്കുട്ടികളാണെന്ന് തെളിയിച്ചു. ഇനി ചേട്ടന്‍മാരുടെ അവസരമാണ്. പോർച്ചുഗൽ സീനിയർ ടീം 2026ൽ ലോകകപ്പ് നേടാൻ പ്രാപ്തിയുള്ളവരുടെ സംഘമാണെന്ന് വിശ്വസിക്കാൻ നിരവധി കാരണങ്ങളുണ്ട്. നേഷൻസ് ലീഗ് ഫൈനലിൽ സാക്ഷാൽ സ്പെയിനിനെ തകർത്ത പോർച്ചുഗീസ് സ്ക്വാഡിൻ്റെ ആഴം തന്നെയാണ് ഇവിടത്തെ പ്രധാന ചർച്ചാ വിഷയം.
തൻ്റെ കാലം കഴിഞ്ഞെന്ന് വിമർശിച്ചവർക്ക് ലോക കിരീടത്തോടെ മറുപടി നൽകാനാണ് ക്രിസ്റ്റ്യാനോ റൊണാൾഡോ 2026 ലോകകപ്പിനെത്തുന്നത്. ക്രിസ്റ്റ്യാനോ റൊണാൾഡോ, ബെർണാഡോ സിൽവ, ബ്രൂണോ ഫെർണാണ്ടസ് എന്നിവരുടെ പരിചയസമ്പത്താണ് പറങ്കിപടയുടെ കരുത്ത്. അവിടേക്ക് നൂനോ മെൻഡസ്, വിറ്റീഞ്ഞ, റാമോസ്, ജാവോ ഫെലിക്സ്, റാഫേൽ ലിയോ, ജാവോ നെവെസ് തുടങ്ങിയ യുവതാരങ്ങൾ കൂടി ചേരുമ്പോൾ പോർച്ചുഗലിൻ്റെ കരുത്ത് അതിലും എത്രയോ ഇരട്ടിയായി വർധിക്കും.
50 ലോകകപ്പ് യോഗ്യതാ മത്സരങ്ങളില്‍ നിന്നാണ് 41 ഗോളുകള്‍ എന്ന ചരിത്ര നേട്ടത്തിൻ്റെ കൂടി പിൻബലത്തിലാണ് CR7 ഇക്കുറി ലോകകപ്പിനെത്തുന്നത്. രണ്ട് നേഷൻസ് ലീഗ് കിരീടം നേടുന്ന ആദ്യ നായകനെന്ന റെക്കോർഡുമായി വർധിതവീര്യത്തോടെയാണ് ഇതിഹാസം ലോകകപ്പിനെത്തുന്നത്. 2022ലെ ഖത്തർ ലോകകപ്പിൽ നിറം മങ്ങിയ റൊണാൾഡോ ഇക്കുറി നാൽപ്പതാം വയസ്സിൽ ആറാമത്തെ ലോകകപ്പിനൊരുങ്ങുകയാണ്.
ടൂർണമെൻ്റിൽ നൂനോ മെൻഡസ്, വിറ്റീഞ്ഞ, ബ്രൂണോ ഫെർണാണ്ടസ്, ജാവോ നെവെസ് എന്നിവരുടെ പ്രകടനങ്ങൾ ഏറെ നിർണായകമാകും. ഇവരടങ്ങുന്ന എൻജിൻ റൂം എണ്ണയിട്ട യന്ത്രം പോലെ പ്രവർത്തിച്ചാൽ ടൂർണമെൻ്റിൽ സെമി ഫൈനൽ വരെയെങ്കിലും ഈ ടീം എത്തുമെന്ന് ഉറപ്പിക്കാം.
ഇനി മുന്നേറ്റത്തിൽ റൊണാൾഡോ ഇല്ലെങ്കിലും പോർച്ചുഗലിന് ഗോളടിക്കാൻ ആളുകളേറെയാണ്. റാഫേൽ ലിയോ, ജാവോ ഫെലിക്സ്, റാമോസ്, നെറ്റോ, കോൺസിക്കാവോ, ട്രിൻക്കാവോ, ഗോൺസാൽവസ് അങ്ങനെ പ്രതിഭകളേറെയാണ്. ഗോൾവലയ്ക്ക് താഴെ വിശ്വസ്തനായ ഡിയോഗോ കോസ്റ്റ കാവലുണ്ടാകും. റൂബൻ ഡയസ്, ഇനാസിയോ എന്നീ സെൻ്റർ ബാക്കുകൾ പ്രതിരോധത്തിൽ ഉറച്ചുനിന്നാൽ ഇക്കുറി കപ്പ് പോർച്ചുഗൽ കൊണ്ടുപോകും.