കിടിലൻ ക്രൈം ത്രില്ലർ! 'ദൃശ്യം' ഹിന്ദി ഫ്രാഞ്ചൈസിക്ക് ഗംഭീര 'കൺക്ലൂഷൻ'

ജീത്തു ജോസഫ്- മോഹൻലാൽ ചിത്രം 'ദൃശ്യം 3' കണ്ടിറങ്ങിയ പ്രേക്ഷകർക്ക് പല അഭിപ്രായങ്ങളുണ്ടായിരുന്നു. മുൻ ചിത്രങ്ങളുടെ വഴിയിൽ നിന്ന് മാറി നടന്ന മൂന്നാം 'ദൃശ്യം' പ്രതീക്ഷിക്കൊത്ത് ഉയർന്നില്ല എന്നാണ് പലരും അഭിപ്രായപ്പെട്ടത്. അതിനാടകീയതയും ത്രില്ലറിൽ നിന്ന് ഇമോഷണൽ ട്രാക്കിലേക്കുള്ള മാറ്റവും അവരെ നിരാശരാക്കി. തുടർച്ച നഷ്ടമായപോലെ. ഇതിൽ ജോർജുകുട്ടി എവിടെ എന്ന ചോദ്യങ്ങളുണ്ടായി. 'ദൃശ്യം 3'യുടെ ഹിന്ദി പതിപ്പിലേക്ക് വരുമ്പോൾ ഒരു പെർഫെക്ട് സീക്വലുകൊണ്ട്, കൺക്ലൂഷൻ കൊണ്ട് മലയാളിയുടെ നിരാശ ഇരട്ടിപ്പിക്കുകയാണ് അഭിഷേക് പഥക് എന്ന സംവിധായകൻ. മലയാളത്തിൽ ഈ കഥ വന്നിരുന്നെങ്കിൽ....മോഹൻലാൽ ആയിരുന്നു ഈ സിനിമയിലെങ്കിൽ...നിരാശരാകാൻ ഓരോരുത്തർക്കും അവരുടേതായ കാരണങ്ങളുണ്ട്. പക്ഷേ, ഇവരെല്ലാം ഒരു കാര്യത്തിൽ യോജിക്കും. 'ദൃശ്യം: ദ കൺക്ലൂഷൻ' ആ ഫ്രാഞ്ചൈസിയോട് നീതി പുലർത്തി. ആ ടൈറ്റിലിനോടും!