കൊച്ചി: "എന്റെ പേര് വേറെ ഒന്നായിരുന്നു. മുഹമ്മദ് കുട്ടി എന്ന പേര് അപരിഷ്കൃതമാണെന്ന് തോന്നിയതു കൊണ്ട് പരിചയമില്ലാത്ത സുഹൃത്തുക്കളോട് എന്റെ പേര് ഒമർ ഷരീഫ് എന്നാണ് പറഞ്ഞിരുന്നത്. ഒരു ദിവസം, കൂട്ടുകാരുമായി നടക്കുമ്പോൾ എന്റെ ഐഡന്റിറ്റി കാർഡ് താഴെ വീണു. ഐഡന്റിറ്റി കാർഡ് എടുത്തു നോക്കിയിട്ട് ഒരുത്തൻ ചോദിച്ചു, നിന്റെ പേര് ഒമറെന്നല്ലല്ലോ..മമ്മൂട്ടിയെന്നല്ലെ,"
തനിക്ക് മമ്മൂട്ടി എന്ന പേര് എങ്ങനെ വന്നുവെന്ന് പറയുന്നതിന് ആമുഖമായി മലയാളത്തിന്റെ പ്രിയപ്പെട്ട നടൻ പറഞ്ഞതാണ് ഈ വാക്കുകൾ. കൊച്ചി സുഭാഷ് പാർക്കിൽ സംഘടിപ്പിച്ച സാഹിത്യോത്സവമാണ് വേദി. മമ്മൂട്ടി കഥ പറഞ്ഞു തുടങ്ങിയതും കാണികൾ കൗതുകത്തോടെ കണ്ണും കാതും കൂർപ്പിച്ചു.
മഹാരാജാസ് കോളേജിലെ വിദ്യാർഥിയായിരുന്നതിന്റെ അനുഭവം പറഞ്ഞു തുടങ്ങിയ നടൻ പതിയെ തന്റെ 'പേര്' ഉണ്ടായ കഥയിലേക്ക് കടക്കുകയായിരുന്നു. "എനിക്ക് മമ്മൂട്ടി എന്നു പേരിട്ടയാൾ ദാണ്ടെ, അവിടിരിപ്പുണ്ട്" എന്ന് പറഞ്ഞ് എല്ലാവർക്കും കാണാനായി ആ സുഹൃത്തിനെ വേദിയിലേക്ക് വിളിച്ചുവരുത്തി. യഥാർഥ ജീവിതത്തില്‍ ഒരു സിനിമാറ്റിക് മൊമന്റ്. കൃത്യമായി പറഞ്ഞാൽ കഥപറയുമ്പോൾ മൊമന്റ്!
എടവനക്കാട് സ്വദേശി ശശിധരനെ വേദിയിലേക്ക് ക്ഷണിച്ച മമ്മൂട്ടി സുഹൃത്തിനെ മലയാളികൾക്കായി പരിചയപ്പെടുത്തി. ഒരു പൊതുവേദിയിൽ ശശിധരനെ പരിചയപ്പെടുത്തണം എന്നത് വലിയ ആഗ്രഹം ആയിരുന്നെന്നും മമ്മൂട്ടി പറഞ്ഞു.
"എനിക്കറിയാവുന്ന, എനിക്ക് പേരിട്ടയാൾ ഇദ്ദേഹമാണ്. ഇത്രയും കാലം ഞാൻ ഇദ്ദേഹത്തെ ഒളിപ്പിച്ചുവച്ചിരിക്കുകയായിരുന്നു, ഒരു സർപ്രൈസ്..നാലുപേര് കാൺകെ പരിചയപ്പെടുത്തണമെന്ന് ആഗ്രഹമുണ്ടായിരുന്നു. ഇദ്ദേഹത്തിന്റെ പേര് ശശിധരൻ, എടവനക്കാടാണ് വീട്. ഇദ്ദേഹമാണ് എനിക്ക് മമ്മൂട്ടി എന്ന പേരിട്ടത്," മമ്മൂട്ടി സുഹൃത്തിനെ ചേർത്തുനിർത്തി പറഞ്ഞു.
രണ്ട് സുഹൃത്തുക്കൾ, ഒരാൾ പേരെടുത്തയാൾ, മറ്റേ ആൾ ആ പേര് കൊടുത്തയാൾ - ആ കാഴ്ച ഏറ്റെടുത്തിരിക്കുകയാണ് സമൂഹമാധ്യമങ്ങളിൽ മലയാളികൾ.