ന്യൂ ഡൽഹി: 'അനിമൽ' എന്ന ഹിറ്റ് ബോളിവുഡ് ചിത്രത്തിന് ശേഷം സന്ദീപ് റെഡ്ഡി വാംഗ സംവിധാനം ചെയ്യുന്ന 'സ്പിരിറ്റി'ൽ രണ്‍ബീർ കപൂർ അതിഥി വേഷത്തിൽ എത്തിയേക്കുമെന്ന് റിപ്പോർട്ടുകൾ. 'അനിമലിൽ' റണ്‍ബീർ ആയിരുന്നു നായകൻ. ബ്ലോക്ക് ബസ്റ്റർ വിജയം നേടിയ സിനിമയിലെ കഥാപാത്രം രണ്‍ബീറിന് ഏറെ പ്രശംസയും നേടിക്കൊടുത്തിരുന്നു. ക്യാമിയോ റോളിൽ രണ്‍ബീർ എത്തുന്നു എന്ന വാർത്തകള്‍ക്ക് പിന്നാലെ പ്രഭാസ് നായകനാകുന്ന 'സ്പിരിറ്റി'ന്റെ ഹൈപ്പ് ഏറിയിരിക്കുകയാണ്.
ആക്ഷൻ ഡ്രാമ ഴോണറിലാണ് വാംഗ 'സ്പിരിറ്റ്' ഒരുക്കുന്നത് എന്നാണ് സൂചന. ഞായറാഴ്ച ആണ് സിനിമയുടെ പൂജാ ചടങ്ങുകൾ നടന്നത്. ചിരഞ്ജീവി ആയിരുന്നു ചടങ്ങിൽ മുഖ്യാതിഥി. ദീപിക പദുകോണിനെയാണ് സിനിമയിലെ നായികയായി ആദ്യം നിശ്ചിയിച്ചിരുന്നത്. എന്നാൽ നടി എട്ട് മണിക്കൂർ ജോലി സമയം എന്ന ആവശ്യം മുന്നോട്ടുവച്ചത് അണിയറപ്രവർത്തകരുമായുള്ള അഭിപ്രായഭിന്നതയ്ക്ക് വഴിവച്ചു. ഇതോടെ ദീപികയിൽ നിന്ന് നായികാ സ്ഥാനം തൃപ്തി ദിമ്രിയിലേക്ക് എത്തി. സന്ദീപിന്റെ 'അനിമലിൽ' ഒരു മുഖ്യ വേഷത്തിൽ തൃപ്തി എത്തിയിരുന്നു.
'സ്പിരിറ്റി'ല്‍ ഒരു നിർണായക കഥാസന്ദർഭത്തിലാകും രണ്‍ബീർ എത്തുക എന്നാണ് റിപ്പോർട്ടുകൾ പറയുന്നത്. പ്രഭാസിന് ഒപ്പം ആദ്യമായിട്ടാണ് രണ്‍ബീർ സ്ക്രീൻ പങ്കിടുന്നത്. 'അനിമലി'ലെ രൺവിജയ്‌ സിംഗ് എന്ന കഥാപാത്രമായിട്ടാണോ രൺബീർ 'സ്പിരിറ്റി'ൽ എത്തുക എന്നാണ് സോഷ്യൽ മീഡിയയിൽ ഉയരുന്ന ചോദ്യം. കൊറിയൻ സൂപ്പർ താരം മാ ഡോങ് സിയോക് എന്ന ഡോൺ ലീ ചിത്രത്തിൽ പ്രധാന വില്ലൻ കഥാപാത്രത്തെ അവതരിപ്പിക്കുമെന്ന തരത്തിൽ നേരത്തെ അഭ്യൂഹങ്ങൾ പരന്നിരുന്നു.
ഭൂഷൺ കുമാറിന്റെ ടി-സീരീസും സന്ദീപിന്റെ ഭദ്രകാളി പിക്ചേഴ്സും ചേർന്നാണ് 'സ്പിരിറ്റ്' നിർമിക്കുന്നത്. 2026 ൽ ആണ് ചിത്രത്തിന്റെ റിലീസ് നിശ്ചയിച്ചിരിക്കുന്നത്.