ന്യൂ ഡൽഹി: ഇന്ത്യൻ ടെലിവിഷനിലെ ഏറ്റവും പ്രശസ്തമായ ഗെയിം ഷോ ആണ് അമിതാഭ് ബച്ചൻ അവതാരകനാകുന്ന 'കോൻ ബനേഗാ ക്രോർപതി'. ഷോയുടെ 17ാം സീസണിൽ നിരവധി മനോഹ മുഹൂർത്തങ്ങൾക്കാണ് പ്രേക്ഷകർ സാക്ഷിയായത്. ലോകകപ്പ് ജേതാക്കളായ ഇന്ത്യൻ വനിതാ ക്രിക്കറ്റ് ടീമിലെ അംഗങ്ങളാണ് അടുത്ത എപ്പിസോഡിൽ അതിഥികൾ. ക്രിക്കറ്റ് കഥകളും തമാശയും നിറഞ്ഞ ആ എപ്പിസോഡിനായുള്ള കാത്തിരിപ്പിലാണ് ആരാധകർ.
ഇന്ത്യൻ ടീം ക്യാപ്റ്റർ ഹർമൻപ്രീത് കൗർ, ഹർലീൻ കൗർ ഡിയോൾ, റിച്ചാ ഘോഷ്, ഷഫാലി വർമ, ദീപ്തി ശർമ, സ്നേഹ റാണ, ടീം കോച്ച് അമോൽ മസുംദാർ എന്നിവരാകും ഈ എപ്പിസോഡിൽ ഹോട്ട് സീറ്റിൽ എത്തുക. എന്നാൽ, കാണികൾ കാത്തിരുന്ന ആ താരം ഷോയിൽ പങ്കെടുക്കില്ല. ഇന്ത്യയുടെ സ്റ്റാർ ഓപ്പണർ സ്മൃതി മന്ദാന. സ്മൃതിയുടെ അസാന്നിധ്യം ആരാധകരെ നിരാശരാക്കിയിരിക്കുകയാണ്.
നവംബർ 23ന് ആയിരുന്നു സ്മൃതി മന്ദാനയുടെ വിവാഹം നിശ്ചയിച്ചിരുന്നത്. ബോളിവുഡ് ഗായകൻ പലാഷ് മുച്ഛൽ ആയിരുന്നു വരൻ. എന്നാൽ വിവാഹം നടന്നില്ല. സ്മൃതിയുടെ പിതാവ് ശ്രീനിവാസിന് ഹൃദയാഘാതം നേരിട്ടതാണ് ചടങ്ങ് മുടങ്ങാൻ ഇടയാക്കിയത്. വിവാഹാഘോഷങ്ങള്‍ക്കിടെ ശ്രീനിവാസന് നെഞ്ചുവേദനയും ദേഹാസ്വാസ്ഥ്യവും അനുഭവപ്പെട്ടതോടെ ആശുപത്രിയിൽ പ്രവേശിപ്പിക്കുകയായിരുന്നു. ശ്രീനിവാസ് ആശുപത്രിയില്‍ നിന്നും തിരിച്ചെത്തിയെങ്കിലും വിവാഹത്തെക്കുറിച്ചുള്ള പുതിയ അറിയിപ്പൊന്നും സ്മൃതിയുടേയോ ഭാവി വരന്‍ പലാഷ് മുച്ഛലിന്റെയോ ഭാഗത്തു നിന്നുണ്ടായിട്ടില്ല.
പിതാവ് ആശുപത്രിയിലായതിനു പിന്നാലെ, സ്മൃതി സോഷ്യല്‍ മീഡിയയില്‍ നിന്ന് വിവാഹ ചിത്രങ്ങളും പലാഷിനൊപ്പമുള്ള ചിത്രങ്ങളും റിമൂവ് ചെയ്തിരുന്നു. ഇത് പലതരത്തിലുള്ള അഭ്യൂഹങ്ങൾക്കും കാരണമായി.സ്മൃതിക്കു പുറമെ, വിവാഹത്തിനെത്തിയ ഇന്ത്യന്‍ ക്രിക്കറ്റ് ടീം അംഗങ്ങളും അവരുടെ സോഷ്യല്‍ മീഡിയയില്‍ നിന്നും ചിത്രങ്ങളും വീഡിയോയും നീക്കം ചെയ്തിരുന്നു. ഇതോടെ, വിവാഹം മാറ്റിവയ്‌ക്കാന്‍ മറ്റെന്തെങ്കിലും കാരണമുണ്ടോ എന്ന ചര്‍ച്ചയും സോഷ്യല്‍ മീഡിയയില്‍ സജീവമാണ്.