മിലാൻ: ഇറ്റലിയിൽ ശൈത്യകാല ഒളിമ്പിക്സിന്റെ ആദ്യഘട്ടത്തിൽ തന്നെ സംഘാടകർ കടുത്ത പ്രതിസന്ധിയാണ് നേരിടുന്നത് . ഒളിമ്പിക്സിന്റെ ആദ്യ ദിനങ്ങളിൽ തന്നെ അത്ലറ്റ്സ് വില്ലേജിൽ നൽകിയിരുന്ന സൗജന്യ കോണ്ടം തീർന്നു. ഇതിനോടകം അത്ലറ്റ്സ് വില്ലേജിൽ 10,000 സൗജന്യ കോണ്ടം വിതരണം ചെയ്തുകഴിഞ്ഞു. സംഘാടകർക്ക് കരുതിയ പ്രാരംഭ സ്റ്റോക്ക് തീർന്ന് പോയതായാണ് റിപ്പോർട്ടുകൾ. എന്നാൽ ആവശ്യക്കാരുടെ എണ്ണം ദിനം പ്രതി വർധിക്കുകയും ചെയ്യുന്നു. നിലവിലെ പ്രതിസന്ധി പരിഹരിക്കുമെന്ന് സംഘാടകർ ഉറപ്പു നൽകിയിയെങ്കിലും അത്ലറ്റുകൾ പരാതിപ്പെടാൻ തുടങ്ങിയതായാണ് വിവരം.
ആദ്യ ഘട്ടത്തിൽ തന്നെ കോണ്ടം ആവശ്യകതയിൽ വൻ വർധനവ് ഉണ്ടായതിൽ സംഘാടക സമിതി അമ്പരന്നു. ഗെയിംസിന്റെ ശേഷിക്കുന്ന ഭാഗങ്ങൾക്കായി കൂടുതൽ വിതരണം ക്രമീകരിക്കാനുള്ള ശ്രമത്തിലാണ് ഇപ്പോൾ അവർ. എന്നാൽ മത്സരങ്ങൾ ആരംഭിച്ച് "മൂന്ന് ദിവസത്തിനുള്ളിൽ കോണ്ടം ഉൾപ്പെടെ അവശ്യസാധനങ്ങൾ തീർന്നതായി കായികതാരം വെളിപ്പെടുത്തിയെന്ന് ഇറ്റാലിയൻ പത്രമായ ലാ സ്റ്റാമ്പ റിപ്പോർട്ട് ചെയ്തു."പാരീസിൽ അത്ലറ്റുകൾക്ക് 300,000 കോണ്ടം ലഭിച്ചു - പ്രതിദിനം രണ്ട് വീതം - എന്നാൽ ഈ ശൈത്യകാല ഗെയിംസിനുള്ള അവ വളരെ കുറവായിരുന്നു: 10,000 പോലും ഇല്ല, എന്നായിരുന്നു ലാ സ്റ്റാമ്പയിലെ റിപ്പോർട്ട്.
ലോംബാർഡി മേഖലയിലെ ഗവർണർ ആറ്റിലിയോ ഫോണ്ടാന ഗെയിംസ് വില്ലേജിൽ സൗജന്യ കോണ്ടം വിതരണത്തെക്കുറിച്ച് നേരത്തേ വിശദീകരിച്ചിരുന്നു. "ചിലർക്ക് ഇത് വിചിത്രമായി തോന്നുന്നുണ്ടെങ്കിൽ, അവർക്ക് സ്ഥാപിതമായ ഒളിമ്പിക് രീതിയെക്കുറിച്ച് അറിയില്ലെന്ന് ആറ്റിലിയോ പറഞ്ഞു. ലൈംഗികമായി പകരുന്ന രോഗ പ്രതിരോധത്തെക്കുറിച്ച് അത്ലറ്റുകളിലും യുവാക്കളിലും അവബോധം വളർത്തുന്നതിനായി 1988 ൽ സിയോളിലാണ് ഇത് ആരംഭിച്ചത് - നാണക്കേട് ഉണ്ടാക്കാൻ പാടില്ലാത്ത ഒരു വിഷയമാണെന്നും അദ്ദേഹം പറഞ്ഞിരുന്നു.
ഇതുമായി ബന്ധപ്പെട്ട് മഞ്ഞ ലോംബാർഡി റീജിയൻ ലോഗോയുള്ള കോണ്ടം എടുത്തുകാണിക്കുന്ന ഒരു വീഡിയോ ഇൻസ്റ്റാഗ്രാമിൽ പങ്കിട്ട സ്പാനിഷ് ഫിഗർ സ്കേറ്റർ ഒലിവിയ സ്മാർട്ട് എഴുതിയ ഒരു ഇൻസ്റ്റാഗ്രാം പോസ്റ്റും ഫോണ്ടാന പങ്കുവച്ചിരുന്നു. കോണ്ടം മാത്രമല്ല ഗെയിംസ് വില്ലേജിൽ അത്ലറ്റുകൾക്ക് ഒരു വലിയ ജിം, ടേബിൾ ഫുട്ബോൾ, എയർ ഹോക്കി ഗെയിമുകൾ, ഒരു പിയാനോ എന്നിവയും ലഭ്യമാണ്. കൊക്കകോളയും സ്മൂത്തികളും അടങ്ങിയ സൗജന്യ പാനീയ മെഷീനുകളും ലഭ്യമാണ്.
93 രാജ്യങ്ങളിൽ നിന്നായി 3,500-ലധികം അത്ലറ്റുകളാണ് 16 കായിക വിഭാഗങ്ങളിലായി വിന്റർ ഒളിംപിക്സിൽ മാറ്റുരയ്ക്കുന്നത്. ഫെബ്രുവരി 6-ന് മിലാനിലെ ഐതിഹാസികമായ സാൻ സിറോ സ്റ്റേഡിയത്തിൽ ദീപശിഖ എത്തിയതോടെ 25-ാമത് ശൈത്യകാല ഒളിംപിക്സിന് തുടക്കമായി.