കാരണമായത് മറ്റൊരാളുമായി ബന്ധമുണ്ടെന്ന ആൺസുഹൃത്തിൻ്റെ സംശയം; മലപ്പുറത്തെ പതിനാലുകാരിയുടെ കൊലപാതകത്തിൻ്റെ നടുക്കുന്ന വിവരങ്ങൾ

മലപ്പുറം: കരുവാരക്കുണ്ടിലെ പതിനാലുകാരിയുടെ കൊലപാതകത്തിന് കാരണം ആൺസുഹൃത്തിൻ്റെ സംശയം കൊണ്ടെന്ന് പൊലീസ്. പെൺകുട്ടിക്ക് മറ്റൊരാളുമായി ബന്ധമുണ്ടെന്ന സംശയത്തെ തുടർന്നാണ് കൊലപാതകം. ഈ കാര്യം പറഞ്ഞ് പെൺകുട്ടിയെ പതിനാറുകാരൻ ശകാരിച്ചിരുന്നു. പെൺകുട്ടി ഇത് നിരസിച്ചതോടെ പ്രകോപിതനായ പതിനാറുകാരൻ ബലപ്രയോഗത്തിലൂടെ പെൺകുട്ടിയെ കീഴ്പെടുത്തുകയായിരുന്നു. പൊലീസ് കസ്റ്റഡിയിൽ ഉള്ള പതിനാറുകാരനെ ജെജെ ബോർഡിന് മുൻപാകെ ഹാജരാക്കി. ശേഷം കോഴിക്കോട് ചിൽഡ്രൻസ് ഹോമിലേക്ക് മാറ്റി.

കഴിഞ്ഞ ദിവസമാണ് പാണ്ടിക്കാട് തൊടികപ്പലം റെയിൽവേ ട്രാക്കിന് സമീപത്തെ കുറ്റിക്കാട്ടിൽ നിന്നും പെൺകുട്ടിയുടെ മൃതദേഹം കണ്ടെത്തിയത്. സ്കൂൾ യൂണിഫോമിലും കൈകൾ കൂട്ടിക്കെട്ടിയ നിലയിലും ആയിരുന്നു മൃതദേഹം. ആൺസുഹൃത്താണ് മൃതദേഹം കാണിച്ചു കൊടുത്തത്. കസ്റ്റഡിയിലെടുത്ത ആൺസുഹൃത്ത് കുറ്റം സമ്മതിക്കുകയും കുറ്റിക്കാട്ടിലെത്തിച്ച് ബലാത്സംഗം ചെയ്ത് കൊലപ്പെടുത്തിയെന്ന് പൊലീസിനോട് പറയുകയും ചെയ്തിരുന്നു.

ജനുവരി 15ന് രാവിലെ പതിവുപോലെ സ്കൂളിലേക്ക് പോയ ഒൻപതാം ക്ലാസുകാരി വൈകീട്ട് വീട്ടിലെത്താത്തതിനെ തുടർന്നാണ് രക്ഷിതാക്കൾ പൊലീസിൽ പരാതി നൽകിയത്. കരുവാരകുണ്ട് പൊലീസ് നടത്തിയ അന്വേഷണത്തിൽ ക്ലാസിൽ കുട്ടി എത്തിയില്ലെന്ന് കണ്ടെത്തി. വിശദമായ അന്വേഷണത്തിലാണ് ഇതേ സ്കൂളിലെ +1 വിദ്യാർഥിക്കൊപ്പം കുട്ടിയെ കണ്ടതായി പൊലീസിന് വിവരം ലഭിച്ചത്. +1 വിദ്യാർഥിയെ പൊലീസ് കസ്റ്റഡിയിലെടുത്ത് ചോദ്യം ചെയ്തപ്പോഴാണ് നടുക്കുന്ന കൊലപാതക വിവരം പുറത്തറിയുന്നത്.