പെർത്ത് ടെസ്റ്റിൽ പ്ലേയർ ഓഫ് ദി മാച്ചായ മിച്ചെൽ സ്റ്റാർക്ക് Source: X/ ICC
NEWSROOM

വെറും രണ്ട് ദിവസം കൊണ്ട് തീർന്ന ആഷസ് മത്സരങ്ങളുടെ മുൻകാല ചരിത്രം അറിയാം!

104 വർഷത്തിനിടെ ഇതാദ്യമാണ് ഒരു ആഷസ് ടെസ്റ്റ് ഇത്ര വേഗത്തിൽ അവസാനിക്കുന്നത്

Author : ശരത്‌ലാൽ ചിറ്റടിമംഗലത്ത്

പെർത്ത്: ശനിയാഴ്ച പെർത്തിൽ അവസാനിച്ച ഒന്നാം ആഷസ് ടെസ്റ്റ് നിരവധി സവിശേഷതകളാൽ സമ്പന്നമായിരുന്നു. വെറും രണ്ട് ദിവസം കൊണ്ട് അവസാനിച്ച ആദ്യത്തെ ആഷസ് ടെസ്റ്റ് ആയിരുന്നില്ല പെർത്തിലേത്. കഴിഞ്ഞ 104 വർഷത്തിനിടെ നടന്ന ആഷസ് മത്സരങ്ങളിൽ രണ്ട് ദിവസം കൊണ്ട് അവസാനിച്ച ആദ്യ ടെസ്റ്റാണെന്ന് മാത്രം.

അതായത് ഏറെ ചരിത്രം അവകാശപ്പെടാനുള്ള ആഷസ് പരമ്പരയിൽ ഇത് ആറാം തവണ മാത്രമാണ് രണ്ട് ദിവസം കൊണ്ട് ആഷസിൽ റിസൾട്ട് ലഭിക്കുന്നത്. 1888 എന്ന വർഷം മാത്രം മൂന്ന് തവണയാണ് ആഷസ് പരമ്പര വെറും രണ്ട് ദിവസത്തിനകം തീർന്നിട്ടുള്ളത്. 1888ൽ ഇംഗ്ലണ്ടിലെ ലോർഡ്സ്, ഓവൽ, മാഞ്ചസ്റ്റർ എന്നീ ഗ്രൌണ്ടുകളിൽ നടന്ന ആഷസ് ടെസ്റ്റ് മാച്ചുകളാണ് രണ്ട് ദിനം കൊണ്ട് തീർന്നത്.

രണ്ട് വർഷത്തിനിപ്പുറം 1890ൽ ഓവലിൽ തന്നെ മറ്റൊരു ടെസ്റ്റ് മത്സരവും രണ്ട് ദിവസത്തിനകം അവസാനിച്ചിരുന്നു. പിന്നീട് 1921ൽ ഇംഗ്ലണ്ടിലെ തന്നെ നോട്ടിംഗ്ഹാമിൽ വച്ച് നടന്ന മറ്റൊരു മത്സരവും രണ്ട് ദിവസം കൊണ്ട് അവസാനിച്ചു.

രണ്ട് ദിവസത്തിനകം അവസാനിച്ച ആഷസ് ടെസ്റ്റുകൾ

  • ലോർഡ്‌സ് 1888

  • ദി ഓവൽ 1888

  • മാഞ്ചസ്റ്റർ 1888

  • ദി ഓവൽ 1890

  • നോട്ടിംഗ്ഹാം 1921

  • പെർത്ത് 2025

പെർത്ത് സ്റ്റേഡിയത്തിൽ ഇതേവരെ ആറ് ആഷസ് ടെസ്റ്റുകളാണ് നടന്നിട്ടുള്ളത്. അതേസമയം, ഇവിടെ നടന്ന ആഷസ് മത്സരങ്ങളിൽ രണ്ടാമത് ബാറ്റ് ചെയ്ത ഒരു ടീം വിജയം നേടുന്നത് ഇതാദ്യമായാണ്.

ആഷസ് ടെസ്റ്റുകളുടെ ചരിത്രം പരിശോധിക്കുമ്പോൾ ഏറ്റവും കുറവ് പന്തുകൾ എറിഞ്ഞ് വിജയിച്ച മത്സരങ്ങളുടെ കണക്കെടുക്കുമ്പോൾ, അതിൽ മൂന്നാമതായാണ് പെർത്ത് ടെസ്റ്റ് ചരിത്ര താളുകളിൽ ഇടം നേടുക. ശനിയാഴ്ച അവസാനിച്ച പെർത്ത് ടെസ്റ്റിൽ ആകെ എറിഞ്ഞത് 847 പന്തുകളാണ്.

ആഷസ് ചരിത്രത്തിൽ ഏറ്റവും കുറച്ച് പന്തുകൾ എറിഞ്ഞ് ഫലമുണ്ടായ ടെസ്റ്റ് മാച്ച് നടന്നത് 1888ൽ മാഞ്ചസ്റ്ററിലാണ്. അന്നത്തെ ആ മത്സരത്തിൽ 788 പന്തുകൾ മാത്രമെ എറിഞ്ഞിരുന്നുള്ളൂ. അതേവർഷം തന്നെ ലോർഡ്സിൽ നടന്ന മറ്റൊരു ആഷസ് ടെസ്റ്റിലും 792 പന്തുകൾ എറിയുമ്പോഴേക്കും ഒരു ടീം വിജയിക്കുകയുണ്ടായി. ഈ പട്ടികയിൽ നാലാം സ്ഥാനത്തുള്ളത് 1895ലെ സിഡ്നി ടെസ്റ്റാണ്. ആ ആഷസ് മാച്ചിൽ 911 പന്തുകളാണ് എറിയപ്പെട്ടത്.

ഏറ്റവും ചെറിയ ആഷസ് ടെസ്റ്റുകൾ (എറിഞ്ഞ പന്തുകൾ പ്രകാരം)

  • 788 മാഞ്ചസ്റ്റർ 1888

  • 792 ലോർഡ്‌സ് 1888

  • 847 പെർത്ത് 2025

  • 911 സിഡ്‌നി 1895

SCROLL FOR NEXT