തിരുവനന്തപുരം: നിയമസഭാ തിരഞ്ഞെടുപ്പ് സ്ഥാനാർഥി നിർണയം അടക്കമുള്ള നിർണായക ചർച്ചകൾക്ക് സിപിഐഎം സംസ്ഥാന സെക്രട്ടേറിയറ്റ് യോഗം ഇന്ന് ചേരും. ജില്ലാ നേതൃത്വങ്ങൾ സമർപ്പിച്ച പ്രാഥമിക പട്ടിക സെക്രട്ടേറിയറ്റ് വിശദമായി പരിശോധിക്കും. ഒന്നിലേറെ പേരുകളുള്ളതും, തർക്കമുള്ളതുമായ സീറ്റുകളിൽ സംസ്ഥാന നേതൃത്വത്തിന്റെ നിലപാട് നിർണായകമാകും.
വിജയസാധ്യത മാത്രം മാനദണ്ഡമാക്കണമെന്നും ടേം വ്യവസ്ഥയിൽ ഇളവ് നൽകാമെന്നുമാണ് സംസ്ഥാന നേതൃത്വത്തിന്റെ നിർദേശം. കേന്ദ്ര കമ്മിറ്റി അംഗം കെ.കെ. ശൈലജയുടെ സ്ഥാനാർഥിത്വത്തിൽ ഉൾപ്പെടെ നിർണായകമായ തീരുമാനങ്ങൾ ഉണ്ടാകും. ഘടകകക്ഷികളുമായുള്ള സീറ്റ് വിഭജന ചർച്ചകളും സീറ്റ് വച്ചുമാറ്റങ്ങളും യോഗത്തിൽ ചർച്ചയാകും. സ്ഥാനാർഥി പട്ടികയ്ക്ക് അംഗീകാരം നല്കാന് അടുത്ത ആഴ്ച സംസ്ഥാന സമിതിയും ചേരുന്നുണ്ട്.
മന്ത്രി വീണാ ജോർജിനെതിരെ കെഎസ്യു പ്രതിഷേധത്തിൽ സ്വീകരിക്കേണ്ട തുടർസമരപരിപാടികളും യോഗം തീരുമാനിക്കും.