തിരുവനന്തപുരം: കള്ളൻ വിജയൻ ലേഖന വിവാദത്തിൽ കെ.ആർ. അജയനെതിരെ കടുത്ത നടപടിയുമായി ദേശാഭിമാനി .അജയനോട് രാജിയോ അവധിയോ എടുക്കാൻ വാക്കാൽ നിർദേശം നൽകി. ദേശാഭിമാനി ചീഫ് എഡിറ്ററും സിപിഐഎം സംസ്ഥാന സെക്രട്ടേറിയറ്റ് അംഗവുമായ പുത്തലത്ത് ദിനേശനാണ് നിർദേശം നൽകിയത്.
ലേഖനം വിവാദമായതോടെ ദേശാഭിമാനി വാരാന്തപ്പതിപ്പ് ചുമതലയിൽ നിന്ന് നേരത്തെ അജയനെ മാറ്റിയിരുന്നു. ലേഖനത്തിൽ പാർട്ടി വിരുദ്ധത ഇല്ലെന്നും ഉചിതമായ തലക്കെട്ടാണ് നൽകിയത് എന്നുമായിരുന്നു വിവാദത്തിൽ കെ.ആർ. അജയൻ്റെ വിശദീകരണം.ഇത് അംഗീകരിക്കാതെയാണ് കൂടുതൽ കടുത്ത നടപടിയിലേക്ക് ദേശാഭിമാനിയും സിപിഐഎമ്മും കടക്കുന്നത്.
പുല്ലംപാറയിലെ നാടക പ്രവർത്തകൻ കള്ളൻ വിജയനെ കുറിച്ചുള്ള ലേഖനത്തിൻ്റെ തലക്കെട്ടിനെ കുറിച്ച് വലിയ തർക്കം ദേശാഭിമാനി എഡിറ്റോറിയൽ ബോർഡിലുണ്ടായിരുന്നു. ഇതേ തുടർന്ന് വിഎസിൻ്റെ അനുസ്മരണം അടങ്ങിയ വാരാന്തപ്പതിപ്പിൻ്റെ പ്രസിദ്ധീകരണം മുടങ്ങിയിരുന്നു. ലേഖനത്തിൻ്റെ തലക്കെട്ട് മാറ്റണമെന്ന ആവശ്യം അംഗീകരിക്കാത്തതിൻ്റെ പേരിലും വിവാദം മാധ്യമങ്ങളിൽ ചർച്ചയായതിന്റെ പേരിലുമാണ് അജയനെ ചുമതലയില് നിന്ന് മാറ്റിയത്.