തിരുവനന്തപുരം: കള്ളിക്കാട് ചെക്പോസ്റ്റിലെ ഡ്യൂട്ടിക്കിടെ മദ്യപിച്ച് അബോധാവസ്ഥയിലായ എക്സൈസ് ഉദ്യോഗസ്ഥന് സസ്പെൻഷൻ. കഴിഞ്ഞ ദിവസത്തെ രാത്രി ഡ്യൂട്ടിക്കിടെയാണ് പ്രിവൻ്റീവ് ഓഫീസർ ഷിൻരാജ് മദ്യപിച്ച് ബോധം പോയത്. ഷിൻരാജ് യൂണിഫോമിൽ മദ്യപിച്ച് നിൽക്കുന്നത് കണ്ട നാട്ടുകാരാണ് ഉന്നത ഉദ്യോഗസ്ഥരെ വിവരം അറിയിച്ചത്. വിവരം ലഭിച്ചതിനെ തുടർന്ന് നെയ്യാറ്റിൻകരയുടെ എക്സൈസ് സർക്കിൾ ഇൻസ്പെക്ടറുടെ നേതൃത്വത്തിലുള്ള സംഘം ചെക്പോസ്റ്റിൽ എത്തി, പരിശോധിച്ചപ്പോഴാണ് ഉദ്യോഗസ്ഥൻ മദ്യപിച്ച് തറയിൽ കിടക്കുന്നതായി കണ്ടത്. ഉദ്യോഗസ്ഥനെ ചെക്പോസ്റ്റ് ഓഫീസിന്റെ പരിസരത്ത് കാണാത്തിനെ തുടർന്ന് സമീപമുള്ള വിശ്രമ മുറി പരിശോധിച്ചപ്പോഴാണ് ഉദ്യോഗസ്ഥനെ അബോധാവസ്ഥയിൽ കണ്ടെത്തിയത്.
ഡ്യൂട്ടി സമയത്ത് എന്തിനാണ് ഈ മുറിയിൽ നിൽക്കുന്നതെന്ന് പൊലീസ് ചോദിച്ചപ്പോൾ ഷിൻരാജ് അവ്യക്തമായ മറുപടിയാണ് നൽകിയത് എന്ന് സസ്പെൻഷൻ ഓർഡറിൽ പറയുന്നു. പിന്നീട് ഇയാളെ വൈദ്യപരിശോധയ്ക്കായി മലയിൻകീഴ് താലൂക്ക് ഹെഡ് കാർേട്ടേഴ്സ് ആശുപത്രിയിൽ ഹാജറാക്കി. ശേഷം ഇയാൾ മദ്യപിച്ചിട്ടുണ്ട് ഡോക്ടർ സ്ഥിരീകരിക്കുകയും ചെയ്തു.
ഡ്യൂട്ടിക്കിടെയുള്ള ഷിൻരാജിന്റ മദ്യപാനം ഗുരുതരമായ അച്ചടക്കലംഘനമാണെന്ന് ചൂണ്ടിക്കാട്ടി ഉദ്യോഗസ്ഥനെ സസ്പെൻഡ് ചെയ്യുകയായിരുന്നു. എക്സൈസ് കമ്മിഷണറുടെ നിർദേശപ്രകാരമാണ് ഉദ്യോഗസ്ഥനെ സസ്പെൻഡ് ചെയ്തത്