തൃശൂർ കൂർക്കഞ്ചേരിയിൽ വൻ കവർച്ച. അടച്ചിട്ടിരുന്ന വീടിന്റെ വാതിൽ തകർത്ത് 55 പവനും മൂന്നര ലക്ഷം രൂപയും കവർന്നു. സിസിടിവി ദൃശ്യങ്ങൾ അടക്കം കേന്ദ്രീകരിച്ച് മോഷ്ടാവിനായി തൃശൂർ സിറ്റി പൊലീസ് അന്വേഷണം ഊർജിതമാക്കി .
തൃശൂരിൽ വ്യാപാര സ്ഥാപനം നടത്തുന്ന ഹസൻ അലിയും കുടുംബവും മകന്റെ ചികിത്സാ ആവശ്യങ്ങൾക്കായി ഒരാഴ്ചയായി എറണാകുളത്തായിരുന്നു. ഇന്ന് രാവിലെ വീട്ടിൽ മടങ്ങിയെത്തിയപ്പോഴാണ് മോഷണം വിവരം അറിയുന്നത്. പുലർച്ചെ ഒന്നേകാലിനും രണ്ട് പത്തിനും ഇടയിലുള്ള സമയത്തായിരുന്നു മോഷണമെന്നാണ് പ്രാഥമിക വിവരം. മുൻവശത്തെ വാതിലിന്റെ പൂട്ടു പൊളിച്ച് അകത്തു കടന്ന മോഷ്ടാവ് അലമാരയിൽ സൂക്ഷിച്ച 55 പവൻ സ്വർണാഭരണങ്ങളും മൂന്നരലക്ഷം രൂപയുമാണ് കവർന്നത് .
സിസിടിവി ക്യാമറകളിൽ നിന്ന് ലഭ്യമായ തെളിവുകൾ പ്രകാരം റോഡിനോടു ചേർന്ന് വീടിന്റെ മതിൽ ചാടി കടന്നാണ് മോഷ്ടാവ് ഉള്ളിൽ പ്രവേശിച്ചത്. അരമണിക്കൂറിനുള്ളിൽ മോഷണം നടത്തി ഇതേ വഴിയിലൂടെ തന്നെ രക്ഷപ്പെട്ടു. മുഖം മറച്ചെത്തിയ പ്രതി ആയുധം ഉപയോഗിച്ചാണ് വാതിലിന്റെ പൂട്ടു പൊളിച്ചത്. ഫോറൻസിക് പരിശോധനയിൽ പ്രതിയുടെ വിരൽ അടയാളവും മറ്റ് തെളിവുകളും ലഭിച്ചു. വീട്ടിലും പരിസരത്തും ഡോഗ് സ്ക്വാഡിനെ അടക്കം എത്തിച്ച് പരിശോധന നടത്തി.
70 ലക്ഷം രൂപയുടെ മോഷണം നടന്നതായാണ് പൊലീസിന്റെ പ്രാഥമിക വിലയിരുത്തൽ. മോഷ്ടാവ് ഒറ്റയ്ക്കാണ് കൃത്യം നടത്തി മടങ്ങിയതെന്നാണ് അനുമാനം