ഡൽഹി: കത്തില് ബിജെപിയുടെ സീല് എന്ന സിപിഐഎമ്മിൻ്റെ ആരോപണത്തിന് മറുപടിയുമായി തെരഞ്ഞെടുപ്പ് കമ്മീഷൻ. കേന്ദ്ര തെരഞ്ഞെടുപ്പ് കമ്മീഷൻ്റെ ഉത്തരവിൽ ബിജെപി സീൽ വച്ച കത്ത് കമ്മീഷന് ലഭിച്ചിരുന്നു. ഇതേ കത്ത് രാഷ്ട്രീയ പാർട്ടികൾക്ക് തെറ്റായി ഫോർവേഡ് ചെയ്തു. പിശക് തിരുത്താൻ ആവശ്യപ്പെട്ടിരുന്നുവെന്നും, സന്ദേശം പിൻവലിക്കാൻ കത്ത് പുറപ്പെടുവിച്ചിരുന്നുവെന്നും കമ്മീഷൻ വിശദീകരണം നൽകി.
തെരഞ്ഞെടുപ്പ് കമ്മീഷൻ്റെ കത്തില് ബിജെപിയുടെ സീല് ഉണ്ടെന്നായിരുന്നു സിപിഐഎമ്മിൻ്റെ ആരോപണം. 2019 മാർച്ചിൽ രാഷ്ട്രീയ പാർട്ടികൾക്ക് നൽകിയ കത്തിലാണ് സീൽ ഉള്ളതെന്നും സിപിഐഎം ആരോപിച്ചിരുന്നു. ബിജെപി കേരള എന്ന സീലാണ് കത്തിലുള്ളതെന്ന് സിപിഐഎം. കത്തിൽ ബിജെപിയുടെ സീൽ വന്നതെങ്ങനെ എന്ന കാര്യത്തിൽ തെരഞ്ഞെടുപ്പ് കമ്മീഷൻ മറുപടി നൽകണമെന്നും സിപിഐഎം ആവശ്യപ്പെട്ടിരുന്നു. ഇതിനുപിന്നാലെയാണ് തെരഞ്ഞെടുപ്പ് കമ്മീഷൻ പ്രസ്താവന പുറത്തിറക്കിയത്.