തിരുവനന്തപുരം: കായിക പരിശീലകരുടെ പരിശീലന പരിപാടിയായ 'കോച്ചസ് എംപവര്‍മെന്റ് പ്രോഗ്രാം 2025' ന് സമാപിച്ചു. കായിക യുവജന കാര്യാലയത്തിന്റെ നേതൃത്വത്തില്‍ സംസ്ഥാന സ്‌പോര്‍ട്‌സ് കൗണ്‍സിലുമായി ചേര്‍ന്നാണ് പരിപാടി സംഘടിപ്പിച്ചത്. സായി എല്‍എന്‍സിപിയില്‍ രണ്ടു ഘട്ടങ്ങളായി നടന്ന പരിശീലന പരിപാടിയില്‍ സംസ്ഥാനത്തെ വിവിധ കായിക വിഭാഗങ്ങളെ പ്രതിനിധീകരിച്ച 187 കോച്ചുമാര്‍ പങ്കെടുത്തു.
ജൂലായ് ഏഴിന് ആരംഭിച്ച് 11 അവസാനിച്ച ആദ്യ ബാച്ചില്‍ 88 പേരും, 14 ആരംഭിച്ച് 18ന് അവസാനിച്ച രണ്ടാം ബാച്ചില്‍ 99 പേരും പങ്കെടുത്തു. രാജ്യത്തെ കായികമേഖലയിലെ പ്രഗല്‍ഭരായ കോച്ചുമാരും വിഷയ വിദഗ്ധരായ റിസോഴ്‌സ് പേഴ്‌സണ്‍മാരുമാണ് 10 ദിവസം നീണ്ടു നിന്ന പരിശീലന പരിപാടിയില്‍ ക്ലാസുകള്‍ നയിച്ചത്.
പരിശീലന സെഷനുകള്‍ മികച്ച അനുഭവമായി മാറിയെന്ന് പരിശീലനം നേടിയ കോച്ചുമാര്‍ അഭിപ്രായപ്പെട്ടു. ഏപ്രില്‍ മെയ് മാസങ്ങള്‍ അടങ്ങുന്ന സമ്മര്‍ അവധി കാലഘട്ടത്തില്‍ ഇത്തരത്തില്‍ പരിശീലന പരിപാടി സംഘടിപ്പിച്ചാല്‍ കൂടുതല്‍ മികവുറ്റതാക്കാം എന്ന് പരിശീലന പരിപാടിയില്‍ പങ്കെടുത്തവര്‍ അഭിപ്രായപ്പെട്ടു. സായി മുന്‍കൈയെടുത്ത് ഇന്ത്യയില്‍ തന്നെ വിവിധ കായിക ഇനങ്ങളില്‍ പരിശീലനം നല്‍കുന്ന വിദേശ കോച്ചുമാരുടെ സേവനവും ഇത്തരം പരിപാടികള്‍ ഉള്‍പ്പെടുത്തണമെന്ന് പരിശീലനത്തിനെത്തിയ കോച്ചുമാരും അഭിപ്രായപ്പെട്ടു.
അവസാന ദിവസമായ വെള്ളിയാഴ്ച രാവിലെ ഫിറ്റ്‌നെസ് ടെസ്റ്റും, ഡോ. സോണി ജോണ്‍ (മത്സരങ്ങള്‍ക്കുള്ള മനഃശാസ്ത്രപരമായ തയ്യാറെടുപ്പുകള്‍), ഡോ. എ കെ ഉപ്പല്‍ (സ്‌പോര്‍ട്‌സ് ടെക്‌നോളജി ) എന്നീ സെഷനും സംഘടിപ്പിച്ചു. ആദ്യ ബാച്ചില്‍, എക്‌സര്‍സൈസ് ഫിസിയോളജി ഡോ. പ്രലയ് മജുംദാര്‍, മത്സരങ്ങള്‍ക്കുള്ള മനഃശാസ്ത്രപരമായ തയ്യാറെടുപ്പുകള്‍ ഡോ. സോണി ജോണ്‍, വോളിബോളില്‍ ഡോ. സദാനന്ദന്‍ & ഡോ. എം.എച്ച്. കുമാര, ബാസ്‌കറ്റ്‌ബോള്‍ കല്‍വ രാജേശ്വര റാവു, ഹോക്കി ഹരേന്ദര്‍സിംഗ്, ഖോഖോ മിസ് ത്യാഗി, കബഡി രാംവീര്‍ ഖോഖര്‍, മറ്റ് ഗെയിമുകള്‍/ഇവന്റ് സ്‌ട്രെങ്ന്ത് & കണ്ടീഷനിങ്ങും അക്ഷയ് എന്നിവര്‍ ക്ലാസുകള്‍ എടുത്തു.
കഴിഞ്ഞ അഞ്ചു ദിവസമായി നടന്ന രണ്ടാം ബാച്ചിന്റെ പരിശീലന പരിപാടിയില്‍ പ്ലാനിങ് & പീരിയഡൈസേഷനില്‍ ഡോ. പി. ടി. ജോസഫ് & ഡോ. സദാനന്ദന്‍ സി.എസ്., അത്‌ലറ്റിക്‌സ് ഡോ. ആര്‍. നടരാജന്‍ ഐആര്‍എസ്, ബോക്‌സിങ് ഭാസ്‌കര്‍ ഭട്ട്, ജെഡി ജോണ്‍ അല്‍മേഡ (ഫുട്‌ബോള്‍), നീന്തല്‍ എസ്. പ്രദീപ് കുമാര്‍, ജൂഡോ യശ്പാല്‍ സോളങ്കി, മറ്റ് ഗെയിമുകള്‍/ഇവന്റ് സ്‌ട്രെങ്ന്ത് & കണ്ടീഷനിംഗില്‍ അക്ഷയ് തുടങ്ങിയവര്‍ ക്ലാസുകള്‍ നയിച്ചു.
രണ്ടാം ബാച്ചിന്റെ പരിശീലന പരിപാടിയുടെ സമാപന ചടങ്ങില്‍ പരിശീലനം നില്‍കിയ വിശിഷ്ട വ്യക്തികള്‍ക്കും റിസോഴ്‌സ് പേഴ്‌സണ്‍മാര്‍ക്കും ഉപഹാരം നല്‍കി ആദരിച്ചു. പരിശീലനം നേടിയ 99 പേര്‍ക്കും സര്‍ട്ടിഫിക്കറ്റ് വിതരണം ചെയ്തു. ചടങ്ങില്‍ സ്‌പോര്‍ട്‌സ് കൗണ്‍സില്‍ സ്റ്റാന്‍ഡിംഗ് കമ്മിറ്റി അംഗം ജെ.എസ്. ഗോപന്‍, സ്‌പോര്‍ട്‌സ് കൗണ്‍സില്‍ വൈസ് പ്രസിഡന്റ് എം.ആര്‍. രഞ്ജിത്ത്, ഡോ. വില്‍ഫ്രഡ് വാസ് എന്നിവര്‍ മുഖ്യാത്ഥികളായി.
ഡോ. എ.കെ. ഉപ്പല്‍ (സ്‌പോര്‍ട്‌സ് ടെക്‌നോളജി), ആര്‍. നടരാജന്‍ (അത്‌ലറ്റിക്‌സ്), ഭാസ്‌കര്‍ ഭട്ട് (ബോക്‌സിംഗ്), എസ്. പ്രദീപ് കുമാര്‍ (നീന്തല്‍), യശ്പാല്‍ സോളങ്കി (ജൂഡോ), ജെ.ഡി. ജോണ്‍ അല്‍മേഡ (ഫുട്‌ബോള്‍), ഡോ. സദാനന്ദന്‍ സിഎസ് (അസോസിയേറ്റ് പ്രൊഫ., സായി-എല്‍എന്‍സിപി), അക്ഷയ് വി (സ്‌ട്രെങ്ത് & കണ്ടീഷനിങ് വിദഗ്ധന്‍), ഡോ. പ്രദീപ് സി.എസ്. (അഡീഷണല്‍ ഡയറക്ടര്‍, സ്‌പോര്‍ട്‌സ് & യൂത്ത് അഫയേഴ്‌സ്) എന്നിവര്‍ ചടങ്ങില്‍ പങ്കെടുത്തു. രാജേഷ് (ടെക്‌നിക്കല്‍ ഓഫീസര്‍, സ്‌പോര്‍ട്‌സ് കൗണ്‍സില്‍) സ്വാഗതവും, ഡോ. പി.ടി. ജോസഫ് (എച്ച്പിഎം, ജി. വി. രാജ സ്‌പോര്‍ട്‌സ് സ്‌കൂള്‍) നന്ദിയും പറഞ്ഞു.