തിരുവനന്തപുരം: ബലാത്സംഗക്കേസിൽ ജാമ്യം കിട്ടി പുറത്തിറങ്ങിയതിന് പിന്നാലെ രാഹുൽ മാങ്കൂട്ടത്തിലിനെ തള്ളാതെ യുഡിഎഫ്. രാഹുലിനെ എംഎൽഎ സ്ഥാനത്ത് നിന്ന് അയോഗ്യനാക്കുന്നതിനെ എതിർക്കാനാണ് യുഡിഎഫ് തിരുമാനം. കുറ്റാരോപിതരെ അയോഗ്യരാക്കുന്ന കീഴ്വഴക്കമില്ല എന്ന് യുഡിഎഫ് പാർലമെന്ററി പാർട്ടിയിൽ വിലയിരുത്തൽ.
എത്തിക്സ് കമ്മറ്റി അധികാരപരിധി കടന്ന് പ്രവർത്തിക്കാൻ പാടില്ലെന്നും വിലയിരുത്തൽ. റോജി എം. ജോണും യു.എ. ലത്തിഫും എത്തിക്സ് കമ്മറ്റിയിൽ ഈ നിലപാടിനെ എതിർക്കും. കുറ്റക്കാരാണെന്ന് കണ്ടെത്തുന്നതിന് മുന്നേ തന്നെ അയോഗ്യരാക്കുന്നത് തെറ്റായ കീഴ്വഴക്കമാകുമെന്നാണ് നിഗമനം. എന്നാൽ രാഹുലിനെ പുറത്താക്കിയ നടപടിയിൽ മാറ്റമില്ല. കോൺഗ്രസ് നിലപാടിനോട് ഘടകകക്ഷികൾക്കും യോജിപ്പെന്നാണ് വിവരം.
അതേസമയം, നിയമസഭ തെരഞ്ഞെടുപ്പിൽ സീറ്റ് ആവശ്യവുമായി പാലക്കാട്ടെ യൂത്ത് കോൺഗ്രസ് രംഗത്തെത്തി. പാലക്കാട് ജില്ലയിൽ ഏഴ് സീറ്റുകൾ വേണമെന്നാണ് കെപിസിസിയോട് യൂത്ത് കോൺഗ്രസ് ആവശ്യപ്പെട്ടത്. നെന്മാറ സീറ്റ് സിഎംപിയിൽ നിന്നും കോൺഗ്രസ് ഏറ്റെടുക്കണമെന്നും ആവശ്യമുണ്ട്. യൂത്ത് കോൺഗ്രസ് സംസ്ഥാന ഭാരവാഹികളായ ആർ പേർ ചേർന്നാണ് കെപിസിസി പ്രസിഡൻ്റിന് കത്തയച്ചത്.