തിരുവനന്തപുരം: കോൺഗ്രസിൽ ഇനി തലമുറ മാറ്റത്തിൻ്റെ കാലമെന്ന് പ്രതിപക്ഷ നേതാവ് വി.ഡി. സതീശൻ. 2026 നിയമസഭാ തെരഞ്ഞെടുപ്പിൽ കോൺഗ്രസ് പാർട്ടിയിൽ യുവാക്കൾക്കും സ്ത്രീകൾക്കും 50 ശതമാനം സീറ്റ് നൽകുമെന്നും വി.ഡി. സതീശൻ ദി ഇന്ത്യൻ എക്സ്പ്രസിന് നൽകിയ അഭിമുഖത്തിൽ പറഞ്ഞു. നിയമസഭാ തെരഞ്ഞെടുപ്പുകളിൽ കോൺഗ്രസ് സാധാരണയായി പരിചിത മുഖങ്ങളെയാണ് മത്സരിപ്പിക്കുന്നതെന്നും ഇത്തവണ ഈ പ്രവണത മാറുമോ എന്ന ചോദ്യത്തിനാണ് സതീശൻ മറുപടി നൽകിയത്.
"ഞങ്ങളുടെ സ്ഥാനാർഥികളിൽ തലമുറമാറ്റം ഉണ്ടാകും. യുവാക്കൾക്കും സ്ത്രീകൾക്കും 50 ശതമാനം സീറ്റുകൾ നൽകും. കൂടാതെ വലിയ മാറ്റം ആവശ്യമില്ലാത്തതിനാൽ പ്രക്രിയ സുഗമമായിരിക്കും. മുഖ്യധാരാ രാഷ്ട്രീയത്തിൽ ഞങ്ങൾക്ക് ഇതിനോടകം തന്നെ നിരവധി യുവ, ജനപ്രിയ നേതാക്കളുണ്ട്. സിപിഐഎമ്മിൽ നിന്ന് വ്യത്യസ്തമായി ഞങ്ങൾക്ക് രണ്ടാംനിര, മൂന്നാംനിര നേതാക്കളുണ്ട്," പ്രതിപക്ഷ നേതാവ് മറുപടി നൽകി.
യുഡിഎഫിനെ ആര് നയിക്കുമെന്ന ചോദ്യത്തിന് യുഡിഎഫിന് കൂട്ടായ നേതൃത്വമുണ്ടെന്നായിരുന്നു സതീശൻ്റെ മറുപടി. "ഞങ്ങൾ ഒരു ടീമായി പ്രവർത്തിക്കുന്നു. കോൺഗ്രസ് അവരുടെ മുഖ്യമന്ത്രിയായി ആരെയും മുൻകൂട്ടി പ്രഖ്യാപിക്കാറില്ല. കേരളത്തിലും ഇത് തന്നെയായിരിക്കും പിന്തുടരുക. തെരഞ്ഞെടുപ്പിന് ശേഷം നടപടിക്രമങ്ങൾക്ക് അനുസൃതമായി എഐസിസിയായിരിക്കും മുഖ്യമന്ത്രിയെ തീരുമാനിക്കുക," വി.ഡി. സതീശൻ പറഞ്ഞു.
"നിയമസഭാ തെരഞ്ഞെടുപ്പ് തദ്ദേശ സ്വയംഭരണ സ്ഥാപനങ്ങളിലെ വോട്ടിംഗ് രീതികളിൽ നിന്ന് വ്യത്യസ്തമാണെങ്കിലും, ഈ ഫലങ്ങൾ തീർച്ചയായും ഒരു സൂചനയാണ്. വലിയ വാർഡുകളുള്ളതും രാഷ്ട്രീയ വോട്ടിംഗുള്ളതുമായ ജില്ലാ പഞ്ചായത്തുകളുടെ ഫലം പരിഗണിക്കുകയാണെങ്കിൽ, കഴിഞ്ഞ തവണ (2020ൽ) ഞങ്ങൾ വിജയിച്ച മൂന്ന് സീറ്റുകളുമായി താരതമ്യപ്പെടുത്തുമ്പോൾ, ഇത്തവണ 14ൽ ഏഴെണ്ണത്തിൽ ഞങ്ങൾ വിജയിച്ചു. ഞങ്ങളുടെ ജില്ലാ പഞ്ചായത്തുകളുടെ എണ്ണം സിപിഐഎമ്മിനേക്കാൾ കൂടുതലാണ്," സതീശൻ പറഞ്ഞു.
"ഈ ഘട്ടത്തിൽ യുഡിഎഫിന് മുൻതൂക്കമുണ്ട്. സംസ്ഥാനതല വിഷയങ്ങൾക്ക് പ്രാധാന്യം ലഭിക്കുന്ന നിയമസഭാ തെരഞ്ഞെടുപ്പിൽ എൽഡിഎഫിനെതിരായ ഭരണവിരുദ്ധ വികാരം കൂടുതൽ ശക്തമാകും. 140ൽ 100 സീറ്റുകൾ ഞങ്ങൾ ലക്ഷ്യമിടുന്നുണ്ട്. ഞങ്ങൾ തയ്യാറാണ്, തികഞ്ഞ ആത്മവിശ്വാസമുണ്ട്. കഴിഞ്ഞ നാലര വർഷത്തിനിടയിൽ എല്ലാ ഉപതിരഞ്ഞെടുപ്പുകളിലും യുഡിഎഫ് ഉയർന്ന ഭൂരിപക്ഷത്തോടെ വിജയിച്ചു. അതേസമയം, സിപിഐഎം വിജയിച്ച ചേലക്കരയിൽ, എൽഡിഎഫിൻ്റെ ഭൂരിപക്ഷം 40,000ൽ നിന്ന് 12,000 ആയി കുറഞ്ഞു. നിലവിലുള്ള ഈ യുഡിഎഫ് അനുകൂല പ്രവണത നിയമസഭാ തെരഞ്ഞെടുപ്പിൽ അതിൻ്റെ ഉച്ചസ്ഥായിയിലെത്തും," വി.ഡി. സതീശൻ കൂട്ടിച്ചേർത്തു.