കൊൽക്കത്തയിൽ ഓഗസ്റ്റ് 9ന് വനിതാ ജൂനിയർ ഡോക്ടറെ ബലാത്സംഗം ചെയ്ത് കൊലപ്പെടുത്തിയ സംഭവത്തിൽ രാജ്യവ്യാപക പ്രതിഷേധം ശക്തമാകുന്നതിനിടെ അന്വേഷണം ഊർജിതമാക്കി സിബിഐ. വെള്ളിയാഴ്ച ആർ.ജി. കർ മെഡിക്കൽ കോളേജ് ആശുപത്രിയിലെ മുൻ പ്രിൻസിപ്പൽ സന്ദീപ് ഘോഷിനെ സിബിഐ ഉദ്യോഗസ്ഥർ ഒന്നര മണിക്കൂറിലേറെ നേരം ചോദ്യം ചെയ്തു.
ഉച്ചയ്ക്ക് കൊൽക്കത്തയിലെ സിജിഒ കോംപ്ലക്സിലുള്ള സിബിഐ ഓഫീസിൽ സന്ദീപ് ഘോഷ് ചോദ്യം ചെയ്യലിന് ഹാജരായി. കൊൽക്കത്ത പൊലീസ് കേസ് കൈകാര്യം ചെയ്യുന്നതുമായി ബന്ധപ്പെട്ട് ചോദ്യങ്ങൾ ഉയർന്നതിനെ തുടർന്നാണ് സിബിഐ അന്വേഷണം ഏറ്റെടുത്തത്. ഘോഷ് തൻ്റെ സുരക്ഷയെക്കുറിച്ച് ആശങ്ക പ്രകടിപ്പിച്ചിരുന്നതായും, അതിനാലാണ് സിബിഐ ഉദ്യോഗസ്ഥർ അദ്ദേഹത്തെ ഏജൻസി വാഹനത്തിൽ അവരുടെ ഓഫീസിലേക്ക് കൊണ്ടുപോയതെന്നും ദി ഇന്ത്യൻ എക്സ്‌പ്രസ് റിപ്പോർട്ട് ചെയ്തു.
ആദ്യം കേസ് അന്വേഷിച്ച കൊൽക്കത്ത പൊലീസ് എസ്ഐടിയിലെ രണ്ട് അംഗങ്ങളെയും, ആശുപത്രിയിലെ നാല് ഡോക്ടർമാരെയും സിബിഐ നേരത്തെ ചോദ്യം ചെയ്തിരുന്നു. സിബിഐയുടെ 12 അംഗ പ്രത്യേക സംഘമാണ് കേസ് അന്വേഷിക്കുന്നത്. തിങ്കളാഴ്ച ധാർമികതയുടെ പേരിൽ പ്രിൻസിപ്പൽ തസ്തികയിൽ നിന്ന് ഘോഷ് രാജിവെച്ചിരുന്നു.
മണിക്കൂറുകൾക്ക് ശേഷം പശ്ചിമ ബംഗാൾ സർക്കാർ അദ്ദേഹത്തെ കൊൽക്കത്ത നാഷണൽ മെഡിക്കൽ കോളേജ് ആൻഡ് ഹോസ്പിറ്റലിൻ്റെ (സിഎൻഎംസിഎച്ച്) പ്രിൻസിപ്പലായി നിയമിച്ചു. ക്യാമ്പസിനുള്ളിൽ പ്രവേശിക്കാൻ അനുവദിക്കാതെ വിദ്യാർത്ഥികളിൽ നിന്ന് പ്രതിഷേധവും അദ്ദേഹം നേരിട്ടിരുന്നു.