പഞ്ചാബ്: പഞ്ചാബിലെ തരൺ തരൺ സെക്ടറിൽ ഇന്ത്യ-പാകിസ്ഥാൻ അന്താരാഷ്ട്ര അതിർത്തി വഴി രാജ്യത്തേക്ക് നുഴഞ്ഞുകയറാൻ ശ്രമിച്ച രണ്ട് പാക് സ്വദേശികളെ അതിർത്തി രക്ഷാസേന വെടിവച്ച് കൊലപ്പെടുത്തി. തരൺ തരൺ സെക്ടറിലെ രാ ജോകെ അതിർത്തി ഔട്ട്പോസ്റ്റിന് സമീപമാണ് സംഭവം.
പാകിസ്ഥാൻ ഭാഗത്തുനിന്നും മൂന്ന് നുഴഞ്ഞുകയറ്റക്കാർ ഇന്ത്യൻ അതിർത്തിക്കുള്ളിലേക്ക് കടക്കാൻ ശ്രമിക്കുന്നത് ബിഎസ്എഫ് സൈനികരുടെ ശ്രദ്ധയിൽപ്പെട്ടു. ഇവരോട് പിന്തിരിയാൻ ആവശ്യപ്പെട്ട് സുരക്ഷാ ഉദ്യോഗസ്ഥർ മുന്നറിയിപ്പ് നൽകിയെങ്കിലും, അത് അവഗണിച്ച് മുന്നോട്ട് നീങ്ങിയതിനെ തുടർന്നാണ് സൈന്യം വെടിയുതിർത്തത്.
വെടിവയ്പ്പിൽ രണ്ട് പാക് നുഴഞ്ഞുകയറ്റക്കാർ കൊല്ലപ്പെടുകയും ഒരാൾ തിരികെ പാകിസ്ഥാനിലേക്ക് ഓടി രക്ഷപ്പെടുകയും ചെയ്തു. സംഭവത്തിന് ശേഷം പ്രദേശത്ത് ബിഎസ്എഫ് അതീവ ജാഗ്രത പ്രഖ്യാപിക്കുകയും വിശദമായ തിരച്ചിൽ ആരംഭിക്കുകയും ചെയ്തിട്ടുണ്ട്.