പൂനെ: യുവ വ്യവസായി കേതൻ അഗർവാളിൻ്റെ കൊലപാതകം വീണ്ടും പുനഃസൃഷ്ടിക്കാൻ കേസിലെ കൂട്ടുപ്രതിയായ ചേതൻ ചൗധരിയെ കൃത്യം നടന്ന സ്ഥലത്ത് എത്തിച്ചു. പൂനെയിലെ ലോഹഗഡ് കോട്ടയിലേക്കാണ് ഇയാളെ എത്തിച്ചത്.
കറുത്ത വരയുള്ള ടീ-ഷർട്ടും വെള്ള പാൻ്റ്സും ധരിച്ചാണ് ചേതൻ എത്തിയത്. സ്ഥലത്ത് എത്തിയ പൊലീസ് സംഘം ലോഹഗഡ് കോട്ടയുടെ ചുവരുകളിൽ നിന്ന് ഡമ്മിയെ താഴേക്ക് തള്ളിയിട്ട് ചേതനെ കൊണ്ട് സീൻ വീണ്ടും അവതരിപ്പിക്കാൻ ആവശ്യപ്പെട്ടു. റൂറൽ പൊലീസ് ചേതൻ്റെ നടത്തം വിശകലനം ചെയ്യുകയും പുനർനിർമ്മിച്ച വീഡിയോ ഉപയോഗിച്ച് കോട്ടയിൽ നിന്നുള്ള സിസിടിവി ദൃശ്യങ്ങളുമായി താരതമ്യം ചെയ്യുകയും ചെയ്യും.
കോട്ടയിൽ നിന്ന് ലഭിച്ച ചേതൻ്റെ സിസിടിവി ദൃശ്യങ്ങളിലെ സമാനതയാണ് പൊലീസ് പരിശോധിക്കുന്നത്. പൂനെയിൽ നിന്ന് ഏകദേശം 90 കിലോമീറ്റർ അകലെയുള്ള ലോഹഗഡ് കോട്ടയിലേക്ക് കാറിന് പകരം സ്കൂട്ടറിലാണ് ചേതൻ യാത്ര ചെയ്തത്. കൊലപാതകത്തിന് 34 മിനിറ്റ് മുമ്പ് സിയ ചേതനുമായി ഒരു രഹസ്യ കോളും നടത്തിയിരുന്നുവെന്നും പൊലീസിന് തെളിവ് ലഭിച്ചിട്ടുണ്ട്.
കാമുകനായ ചേതനോടൊപ്പമാണ് സിയ കേതൻ അഗർവാളിനെ കൊലപ്പെടുത്തിയത്. സിയയുടെ മൊഴിയിലെ പൊരുത്തക്കേടുകളാണ് ഇവരെ പിടികൂടാൻ കാരണം. അതേസമയം സിയയുടെയും ചേതൻ്റെയും പൊലീസ് കസ്റ്റഡി ജൂലൈ മൂന്ന് വരെ നീട്ടി.