പശ്ചിമ ബംഗാളിലെ പുരുലിയയിൽ 37 വർഷം കാണാമറയത്തായിരുന്ന മകൻ്റേയും കുടുംബത്തിൻ്റേയും പുനഃസമാഗമത്തിന് വഴിയൊരുക്കി എസ്ഐആർ. 1988 ൽ വീടുവിട്ട് പോയ വിവേക് ചക്രവർത്തിയുടേയും കുടുംബത്തിൻ്റേയും അപൂർവ സമാഗമമാണ് ഇപ്പോൾ വാർത്തകളിൽ ഇടംപിടിക്കുന്നത്.
1988-ലാണ് വിവേക് വീടുവിട്ട് പോകുന്നത്. വർഷങ്ങളുടെ തെരച്ചിലിന് ഫലമൊന്നുമില്ലാതായതോടെ കുടുംബത്തിലെ മൂത്ത മകൻ കൂടിയായ വിവേകിനെ കണ്ടെത്താമെന്ന പ്രതീക്ഷ കുടുംബവും അവസാനിപ്പിച്ചു. പിന്നീട്, അപ്രതീക്ഷിതമായ വഴിത്തിരിവിലൂടെ എന്നന്നേക്കുമായി അടഞ്ഞുവെന്ന് പ്രതീക്ഷിച്ച വാതിൽ അവർക്ക് മുന്നിൽ തുറക്കുകയായിരുന്നു.
പ്രദേശത്തെ ബൂത്ത് ഓഫീസറായി ജോലി ചെയ്യുന്ന വിവേകിൻ്റെ ഇളയ സഹോദരൻ പ്രദീപ് ചക്രവർത്തി എസ്ഐആർ ഡ്രൈവിനിടെ, പ്രദേശത്ത് വിതരണം ചെയ്ത എല്ലാ ഫോമിലും അദ്ദേഹത്തിൻ്റെ പേരും ഫോൺ നമ്പറും അച്ചടിച്ചിരുന്നു. ഇതാണ് സംഭവത്തിൽ വഴിത്തിരിവായത്. ഇതിന് പിന്നാലെ അപ്രതീക്ഷിതമായി ഒരു ഫോൺ കോൾ പ്രദീപിനെ തേടിയെത്തി. കൊൽക്കത്തയിൽ താമസിക്കുന്ന വിവേകിൻ്റെ മകൻ രേഖകൾ തയ്യാറാക്കുന്നതിനായി സഹായം തേടിയാണ് പ്രദീപിൻ്റെ നമ്പറിലേക്ക് വിളിച്ചത്. ഔപചാരികമായി തുടങ്ങിയ സംഭാഷണം പിന്നീട് കുടുംബ വിശേഷങ്ങളിലേക്ക് എത്തിയതോടെയാണ് അപ്രതീക്ഷിതമായ വൈകാരിക വഴിത്തിരിവ് സംഭവിക്കുന്നത്.
ഫോൺ വിളിച്ച വിവേകിൻ്റെ മകൻ്റെ ഉത്തരങ്ങൾ ഇവരുടെ കുടുംബത്തിന് മാത്രം അറിയാവുന്ന കാര്യങ്ങളുമായി പൊരുത്തപ്പെട്ടപ്പോഴാണ് സ്വന്തം മരുമകനോടാണ് സംസാരിക്കുന്നതെന്ന് തനിക്ക് മനസ്സിലായതെന്ന് പ്രദീപ് ഓർത്തെടുത്തു. അത് വിവരിക്കാനാവാത്ത അനുഭവമായി മാറുകയായിരുന്നുവെന്നും പ്രദീപ് വിവരിച്ചു. അധികം താമസിയാതെ 37 വർഷം കാത്തിരുന്നത് സംഭവിച്ചു. 37 വർഷങ്ങൾക്ക് ശേഷം രണ്ട് സഹോദരന്മാരും പരസ്പരം വീണ്ടും ശബ്ദങ്ങൾ കേട്ടു.
തൻ്റെ വികാരം വാക്കുകളിൽ പ്രകടിപ്പിക്കാൻ കഴിയില്ലെന്നാണ് വിവേക് ഇതിനോട് പ്രതികരിച്ചത്. "37 നീണ്ട വർഷങ്ങൾക്ക് ശേഷം, ഞാൻ ഒടുവിൽ വീട്ടിലേക്ക് മടങ്ങുകയാണ്. ഞാൻ എല്ലാവരോടും സംസാരിച്ചു കഴിഞ്ഞു. എസ്ഐആർ പ്രക്രിയ ഇല്ലായിരുന്നെങ്കിൽ ഈ പുനഃസമാഗമം ഒരിക്കലും സംഭവിക്കില്ലായിരുന്നു എന്നതിനാൽ തെരഞ്ഞെടുപ്പ് കമ്മീഷനോട് നന്ദി പറയുന്നു"- വിവേക് പറഞ്ഞു.
ഒരുകാലത്ത് വേദന കൊണ്ട് നിറഞ്ഞിരുന്ന വീട് ഇപ്പോൾ ഇപ്പോൾ കൃതജ്ഞതയാൽ നിറഞ്ഞിരിക്കുകയാണ്. അവരുടെ ആ മുറിവ് ഉണക്കുന്നതിൽ സർക്കാരിൻ്റെ പങ്ക് കൂടിയുണ്ട് എന്നതാണ് ഇപ്പോൾ ആ കുടുംബത്തിന് കൂടുതൽ സന്തോഷം നൽകുന്നത്. എസ്ഐആർ നടപടിക്രമങ്ങളെച്ചൊല്ലി സംസ്ഥാനത്തുടനീളം രാഷ്ട്രീയ ചർച്ചകൾ തുടരുന്നതിനിടെയാണ് ഗോബൊരാണ്ട ഗ്രാമത്തിൽ നിന്നുള്ള വേറിട്ട കഥ.