ചെന്നൈ: വിജയ് നായകനായ തുപ്പാക്കി സിനിമയിൽ നിന്ന് പ്രചോദനം ഉൾക്കൊണ്ട് 150 ൽ അധികം യുവാക്കൾ സൈന്യത്തിൽ ചേർന്നതായി ടിവികെ എംഎൽഎ നിയമസഭയിൽ പറഞ്ഞു. ടിവികെ എംഎൽഎ എസ് വിജയകുമാറിന്റേതാണ് പരാമർശം. സിനിമയിൽ നിന്ന് വരുന്നവർക്ക് ഭരണത്തെ കുറിച്ച് എന്തറിയാമെന്ന പ്രതിപക്ഷ വിമർശനത്തിന് മറുപടിയായാണ് എംഎൽഎയുടെ പ്രതികരണം.
രാജ്യത്തെ സേവിക്കാനുള്ള ഉദ്ദേശ്യത്തോടെ നിരവധി എഞ്ചിനീയറിംഗ് ബിരുദധാരികൾ സൈന്യത്തിൽ ചേർന്നിട്ടുണ്ടെന്നും അദ്ദേഹം പരാമർശിച്ചു. ഗുമ്മിഡിപൂണ്ടി നിയോജകമണ്ഡലം എംഎൽഎ വിജയകുമാർ തന്റെ ആമുഖ പ്രസംഗത്തിനിടെ നടത്തിയ പരാമർശം സഭയിൽ ശ്രദ്ധേയമായി.
" 'തുപ്പാക്കി' എന്ന സിനിമ കണ്ടതിന് ശേഷം 150 ഓളം യുവാക്കൾ സൈന്യത്തിൽ ചേർന്നു. ആ യുവാക്കളിൽ പലരും എഞ്ചിനീയറിംഗ് ബിരുദധാരികളാണെന്നും വിജയ്യുടെ സിനിമ കണ്ടതിനുശേഷം അവർ മനസ്സ് മാറ്റി മാതൃരാജ്യത്തെ സേവിക്കുക എന്ന ഉദ്ദേശ്യത്തോടെ സൈന്യത്തിൽ ചേർന്നുവെന്നും" അദ്ദേഹം പറഞ്ഞു. എംഎൽഎയുടെ പ്രസംഗം ഇപ്പോൾ സോഷ്യൽ മീഡിയയിൽ വൈറലാണ്.
എ.ആർ. മുരുകദോസ് രചനയും സംവിധാനവും നിർവ്വഹിച്ച് 2012-ൽ പുറത്തിറങ്ങിയ ഒരു തമിഴ് ആക്ഷൻ ത്രില്ലർ ചലച്ചിത്രമാണ് തുപ്പാക്കി (അർത്ഥം : തോക്ക്). വിജയ്, കാജൾ അഗർവാൾ എന്നിവർ പ്രധാന വേഷങ്ങളിൽ അഭിനയിച്ച ഈ ചിത്രത്തിൽ വിദ്യുത് ജാംവാൽ ആണ് പ്രതിനായക വേഷം കൈകാര്യം ചെയ്തിരിക്കുന്നത്. നടൻ ജയറാമും ചിത്രത്തിൽ കഥാപാത്രമായെത്തിയിരുന്നു.