സാംഗ്ലി: മഹാരാഷ്ട്രയിലെ സാംഗ്ലി ഗ്രാമം ആഘോഷത്തിമിർപ്പിലാണ്. ഈ രാജ്യത്തെ കോടിക്കണക്കിന് ആരാധകർക്കൊപ്പം ആ നാട്ടുകാരും ഒരു വിവാഹത്തിൻ്റെ തിരക്കിലാണ്. ഇന്ത്യൻ ക്രിക്കറ്റ് ടീമിൻ്റെ വൈസ് ക്യാപ്റ്റൻ സ്മൃതി മന്ദാനയുടെ വിവാഹനാളാണ് ഇന്ന്. തങ്ങളുടെ മകളായും സഹോദരിയായും കൊച്ചു മകളായും കണ്ട സ്മൃതി ഇന്ന് വിവാഹിതയാകുന്നു എന്ന സന്തോഷമാണ് അവർക്കെല്ലാം.
സംഗീത സംവിധായകനും സിനിമാ നിർമാതാവുമായ പലാഷ് മുച്ചൽ ആണ് സ്മൃതിയുടെ വരൻ. ഇരുവരും ദീർഘകാലമായി പ്രണയത്തിലായിരുന്നു എങ്കിലും അടുത്തിടെയാണ് പലാഷ് വിവാഹ വാർത്ത പുറത്തുവിട്ടതും ബന്ധം സ്ഥിരീകരിച്ചതും.
പതിവ് രീതികളിൽ നിന്ന് വ്യത്യസ്തമായ ഉച്ചയ്ക്ക് ശേഷമാണ് വിവാഹം നടക്കുകയെന്നാണ് റിപ്പോർട്ടുകൾ. ഏറ്റവും കുറച്ച് ആളുകളെ മാത്രം ഉൾക്കൊള്ളിച്ച് നടത്തുന്ന ഇൻ്റിമേറ്റ് വെഡ്ഡിങ്ങിൽ ക്രിക്കറ്റ് ലോകത്തെ പ്രമുഖർ എല്ലാം പങ്കെടുക്കുമെന്നാണ് വിവരം. സ്മൃതിയുടെ വീട്ടിൽ നിന്നുള്ള വിവാഹത്തലേന്നത്തെ ആഘോഷങ്ങളുടെ ചിത്രങ്ങളും വീഡിയോകളും സമൂഹ മാധ്യമങ്ങളിൽ വ്യാപകമായി പ്രചരിപ്പിക്കുകയാണ്.
പൊതുവെ നാണക്കാരിയെന്ന് അറിയപ്പെടുന്ന സ്മൃതിയുടെ വിവാഹത്തലേന്നത്തെ ഡാൻസ് വീഡിയോകൾ ഇപ്പോൾ സമൂഹ മാധ്യമങ്ങളിൽ പ്രചരിക്കുന്നുണ്ട്. വിവാഹം കളറാക്കാൻ ഇന്ത്യൻ വനിതാ ക്രിക്കറ്റ് ടീമിലെ അംഗങ്ങളും നൃത്തവുമായി എത്തിയിരുന്നു.
മന്ദാനയും മുച്ചലും തമ്മിലുള്ള പ്രണയം 2019ലാണ് ആരംഭിച്ചത്. മുംബൈയിലുള്ള മ്യൂച്വൽ ഫ്രണ്ട്സുകളിലൂടെയാണ് ഇരുവരും ആദ്യം പരിചയപ്പെടുന്നത്. വളരെ പെട്ടെന്ന് തന്നെ ഇരുവരും തമ്മിൽ അടുപ്പത്തിലായി. ബോളിവുഡിൽ അറിയപ്പെടുന്ന സംഗീത സംവിധായകനും നിർമാതാവുമായ പലാഷ് മുച്ചലും, ഇന്ത്യൻ വനിതാ ക്രിക്കറ്റ് ടീമിലെ ഏറ്റവും പ്രശസ്തയായ ക്രിക്കറ്റായ സ്മൃതി മന്ദാനയും.... ഈ അടുപ്പം വർഷങ്ങളോളം രഹസ്യമായി സൂക്ഷിച്ചു വച്ചു.
2024 ജൂലൈയിൽ ഇരുവരും കണ്ടുമുട്ടിയതിൻ്റെ അഞ്ചാം വാർഷികത്തിലാണ് സ്മൃതി-പലാഷ് ജോഡി തങ്ങളുടെ പ്രണയം പരസ്യമാക്കിയത്.