മുംബൈ: നവംബർ 30 മുതൽ ആരംഭിക്കുന്ന ദക്ഷിണാഫ്രിക്കയ്‌ക്ക് എതിരായ മൂന്ന് മത്സരങ്ങളുടെ ഏകദിന പരമ്പരയിൽ കെ.എൽ. രാഹുൽ ഇന്ത്യൻ ടീമിനെ നയിക്കാൻ സാധ്യതയെന്ന് സൂചന. കഴുത്തിനേറ്റ പരിക്കിനെ തുടർന്ന് ശുഭ്മാൻ ഗിൽ ടീമിൽ നിന്ന് പുറത്തായതിനാൽ ദക്ഷിണാഫ്രിക്കയ്‌ക്ക് എതിരായ ഏകദിന പരമ്പരയിൽ രാഹുൽ ഇന്ത്യൻ ടീമിനെ നയിക്കാൻ സാധ്യതയുണ്ടെന്ന് ബിസിസിഐ വൃത്തങ്ങൾ ഉദ്ധരിച്ച് എൻഡിടിവി റിപ്പോർട്ട് ചെയ്തു.
കൊൽക്കത്തയിൽ ദക്ഷിണാഫ്രിക്കയ്‌ക്ക് എതിരായ ആദ്യ ടെസ്റ്റിനിടെയാണ് ഇന്ത്യയുടെ ഏകദിന ക്യാപ്റ്റനായ ഗില്ലിന് പരിക്കേറ്റത്. താരം നിലവിൽ മുംബൈയിൽ വിദഗ്ധ ചികിത്സയ്ക്ക് വിധേയനാവുകയാണ്. നേരത്തെ രണ്ടാം ടെസ്റ്റിന് മുന്നോടിയായി ഗില്ലിന് ഫിറ്റ്നസ് വീണ്ടെടുക്കാനായിരുന്നില്ല.
ഗില്ലും വൈസ് ക്യാപ്റ്റൻ ശ്രേയസ് അയ്യരും കളിക്കളത്തിൽ നിന്ന് പുറത്തായതോടെ രാഹുൽ പകരം ക്യാപ്റ്റനാകാൻ സാധ്യതയുണ്ട്. ഏകദിനത്തിൽ 88 മത്സരങ്ങളിൽ നിന്ന് 48.31 ശരാശരിയിലും 88.41 സ്ട്രൈക്ക് റേറ്റിലും 3092 റൺസ് നേടിയ രാഹുൽ മികച്ച പ്രകടനമാണ് കാഴ്ചവയ്ക്കുന്നത്.
നവംബർ 30ന് റാഞ്ചിയിലാണ് ആദ്യ ഏകദിനം. പിന്നീട് ഡിസംബർ 3ന് റായ്പൂരിലും ഡിസംബർ 6ന് വിശാഖപട്ടണത്തും മത്സരങ്ങൾ നടക്കും. ഇന്ത്യൻ ആരാധകർ ഏറെ പ്രതീക്ഷയോടെ കാത്തിരിക്കുന്ന പരമ്പരയിൽ രോഹിത് ശർമയും വിരാട് കോഹ്‌ലിയും സ്വന്തം നാട്ടിൽ അന്താരാഷ്ട്ര മത്സരങ്ങൾക്കായി തിരിച്ചെത്തുന്നു എന്നതും ശ്രദ്ധേയമാണ്.