ലിസ്ബൺ: ടീമിലെ സ്ഥാനത്തെ ചൊല്ലി പരിശീലകൻ ജോർജ് ജീസസുമായുള്ള അഭിപ്രായവ്യത്യാസത്തെ തുടർന്ന് ദേശീയ ടീം ക്യാമ്പ് വിട്ടതിന് ക്രിസ്റ്റ്യാനോ റൊണാൾഡോയെ പോർച്ചുഗീസ് ഫുട്ബോൾ അസോസിയേഷൻ 30 ദിവസത്തേക്ക് സസ്പെൻഡ് ചെയ്തു. 41കാരനായ ഇതിഹാസ ഫുട്ബോളർ കുറ്റം ചെയ്തതായി പൂർണമായും സമ്മതിച്ചതായും 255 യൂറോ (285 ഡോളർ) പിഴ ചുമത്തിയതായും ഫെഡറേഷൻ്റെ അച്ചടക്ക കൗൺസിൽ തിങ്കളാഴ്ച അറിയിച്ചു.
റൊണാൾഡോ ഈ മാസം ആദ്യം ഡെൻമാർക്കിനെതിരായ നേഷൻസ് ലീഗ് മത്സരത്തിന് മുമ്പ് കോപ്പൻഹേഗനിലെ പോർച്ചുഗൽ പരിശീലന ക്യാംപ് വിട്ടത് വലിയ വാർത്തയായിരുന്നു. നോർവേയ്‌ക്കെതിരെ കളിപ്പിക്കാതെ തന്നെ പകരക്കാരൻ്റെ ബെഞ്ചിൽ ഇരുത്തിയെന്നും കോച്ച് ഹോർഗെ ജീസസ് ടീമിലെ റോളിനെക്കുറിച്ച് രണ്ടുതവണ വാഗ്ദാനം ലംഘിച്ചുവെന്നും സൂപ്പർ താരം പിന്നീട് ആരോപിച്ചിരുന്നു.
ഫെഡറേഷൻ്റെ അച്ചടക്ക ചട്ടങ്ങളിലെ ആർട്ടിക്കിൾ 160(1) പ്രകാരമുള്ള ഒരു കുറ്റകൃത്യം റൊണാൾഡോ മനഃപൂർവ്വം ചെയ്തതായി അച്ചടക്ക കൗൺസിലിൻ്റെ നോൺ-പ്രൊഫഷണൽ വിഭാഗം കണ്ടെത്തി. രണ്ട് ദിവസം മുമ്പ് റിപ്പോർട്ട് ചെയ്ത വസ്തുതകളുടെ അടിസ്ഥാനത്തിൽ ഒക്ടോബർ 9നാണ് നടപടികൾ ആരംഭിച്ചത്.
പ്രശ്നം പരിഹരിച്ചു കഴിഞ്ഞാൽ റൊണാൾഡോ ദേശീയ ടീമിലേക്ക് മടങ്ങിവരണമെന്ന് ഫെഡറേഷനിലെ എല്ലാവരും ആഗ്രഹിക്കുന്നുവെന്ന് പോർച്ചുഗീസ് എഫ്എ പ്രസിഡന്റ് പെഡ്രോ പ്രോൻക പറഞ്ഞു.