താടി വളർത്തിയില്ല എന്ന കാരണം ചൂണ്ടിക്കാട്ടി സുരക്ഷാ സേനയിലെ അംഗങ്ങളെ പിരിച്ചുവിട്ട് താലിബാൻ. ധാർമിക മന്ത്രാലയമാണ് ഈ തീരുമാനം കൈക്കൊണ്ടത്. ഇസ്‌ലാമിക നിയമത്തിൻ്റെ വ്യാഖ്യാനത്തിന് അനുസൃതമായി അവരെ പിരിച്ചുവിട്ടതായി മന്ത്രാലയത്തിലെ പ്ലാനിംഗ് ആൻഡ് ലെജിസ്ലേഷൻ ഡയറക്ടർ മൊഹിബുള്ള മൊഖ്‌ലിസ് പറഞ്ഞു.


കഴിഞ്ഞ വർഷം "അധാർമ്മിക പ്രവൃത്തികൾക്ക്" 13,000-ത്തിലധികം ആളുകളെ അഫ്ഗാനിസ്ഥാനിൽ തടവിലാക്കിയതായും ഉദ്യോഗസ്ഥർ വെളിപ്പെടുത്തിയിരുന്നു.
കസ്റ്റഡിയിലെടുത്തവരിൽ പകുതിയോളം പേരെ 24 മണിക്കൂറിന് ശേഷം വിട്ടയച്ചതായും മന്ത്രാലയം അതിൻ്റെ വാർഷിക പ്രവർത്തന അപ്‌ഡേറ്റിൽ പറഞ്ഞു. കുറ്റകൃത്യങ്ങൾ ചെയ്തെന്ന് ആരോപിക്കപ്പെടുന്നവരുടെ വിവരങ്ങൾ വെളിപ്പെടുത്തിയില്ല.

കഴിഞ്ഞ വർഷം 21,328 സംഗീതോപകരണങ്ങൾ ഉദ്യോഗസ്ഥർ നശിപ്പിച്ചതായും ആയിരക്കണക്കിന് കമ്പ്യൂട്ടർ ഓപ്പറേറ്റർമാരെ വിപണിയിൽ "അധാർമ്മികമായ സിനിമകൾ വിൽക്കുന്നതിൽ നിന്ന് തടഞ്ഞതായും റിപ്പോർട്ടിൽ പറയുന്നു.

Also Read : 'അഫ്ഗാനിലെ സർക്കാർ ജീവനക്കാർ അഞ്ച് തവണ പള്ളിയിലെത്തി പ്രാർഥിക്കണം'; ലംഘിച്ചാൽ കടുത്ത ശിക്ഷയെന്ന് താലിബാൻ

2021-ൽ താലിബാൻ ഭരണം പിടിച്ചെടുത്തതിന് ശേഷം കാബൂളിലെ വനിതാ മന്ത്രാലയം പിരിച്ചുവിട്ട് ധാർമിക (സദാചാര) മന്ത്രാലയം ആരംഭിച്ചു. പിന്നീട് അധികൃതർ, സ്ത്രീകൾക്ക് മേൽ ഏർപ്പെടുത്തിയ നിയന്ത്രണങ്ങളേയും, അടിച്ചമർത്തലുകളേയും മനുഷ്യാവകാശ സംഘടനകളും ഐക്യരാഷ്ട്രസഭയും വിമർശിച്ചിരുന്നു.

ഇസ്ലാമിക വസ്ത്രധാരണത്തെക്കുറിച്ചുള്ള അവരുടെ വ്യാഖ്യാനം പാലിക്കാത്തതിൻ്റെ പേരിൽ ഉദ്യോഗസ്ഥർ സ്ത്രീകളെ മണിക്കൂറുകളോളം തടഞ്ഞുനിർത്തുകയും തടങ്കലിൽ വയ്ക്കുകയും ചെയ്ത സംഭവങ്ങൾ റിപ്പോർട്ട് ചെയ്തിട്ടുണ്ട്.

Also Read : അഫ്‌ഗാൻ മനുഷ്യാവകാശ പ്രവർത്തകയ്ക്ക് താലിബാൻ ജയിലിൽ ക്രൂരപീഡനം

എന്നാൽ ആരോപണങ്ങളെ അടിസ്ഥാനരഹിതമെന്നാണ് താലിബാൻ വിശേഷിപ്പിച്ചത്, കൂടാതെ സർക്കാരിൻ്റെ നിയമങ്ങൾ ഇസ്ലാമിക നിയമങ്ങളുടെയും അഫ്ഗാൻ ആചാരങ്ങളുടെയും വ്യാഖ്യാനത്തിന് ബാധകമാണെന്നും ന്യായീകരിക്കുന്നു.